சென்னை: சென்னை தேனாம்பேட்டையில் உள்ள அண்ணா அறிவாலயத்தில் திமுக அமைப்பு செயலாளர் ஆர்.எஸ்.பாரதி இன்று செய்தியாளர்கள் சந்தித்தார். அப்போது பேசிய அவர், 'தான் திருடி பிறரை நம்பாள்' என்ற பழமொழி போல உள்ளது அதிமுக புறக்கணிப்பு, அதிமுக ஆட்சியில் செய்ததை இன்று மக்கள் மறந்ததாக நினைக்கிறார்கள் என விக்கிரவாண்டி இடைத்தேர்தலை அதிமுக புறக்கணித்ததை குறித்து தெரிவித்தார்.
தொடர்ந்து பேசியவர், "ஜெயலலிதா ஆட்சிக்கு வந்தவுடன் 1992 ஆம் ஆண்டு நடைபெற்ற பரங்கிமலை கண்டோன்மெண்ட் தேர்தல் தான் இது எல்லாம். எடப்பாடிக்கு தெரிய வாய்ப்பில்லை அப்போது அவர் எங்கே இருந்தார் என்பது ஊருக்கு தெரியும் அந்த கட்சிக்காரர்களுக்கும் தெரியும். இந்தியாவில் பூத் கேப்சரிங் என்ற ஒரு விஷயம் தமிழ்நாட்டில் அப்போது தெரியாமல் இருந்தது ஆனால் அப்போது தமிழ்நாட்டில் பூத் கேப்ச்சரிங்கை அரங்கேற்றியது அதிமுக தான், அது ஜெயலலிதா தலைமையில் நடந்தது.
தேர்தல் ஆணையம் இருக்கும்பொழுது ஏன் அதிமுக பயப்படுகிறது தேர்தல் ஆணையம் யார் கையில் இருக்கிறது என்பது இந்திய மக்களுக்கு தெரியும். இந்தியாவிலேயே தமிழ்நாட்டில்தான் நடந்து முடிந்த நாடாளுமன்ற தேர்தலில் எந்த கலவரமும் இல்லாமல் வாக்குப்பதிவு நடந்தது. ஜனநாயகத்தை காப்பாற்றியது தமிழ்நாடு. ஆனால் அதிமுக எப்படியாவது பாஜகவுடன் செல்ல வேண்டும் என்பதற்காக இதை ஒரு சாக்காக வைத்து சொல்கிறார்கள்.
அதிமுக இன்னும் தோல்வியடைவார்கள் நடந்து முடிந்த நாடாளுமன்ற தேர்தலில் பல இடங்களில் டெபாசிட் வாங்கவில்லை. இந்த தேர்தலிலும் டெபாசிட் போனால் என்ன வாகும். 2001 ல் ஜெயலலிதா எதிராக டான்சி வழக்கில் நான் மேல்முறையீடு செய்ததன் காரணமாக என்னை தோற்கடிக்க அதிமுக சதி செய்தது. வேடிக்கையே 2000 வாக்குகள் உள்ள தொகுதியில் 2300 வாக்குகள் போடப்பட்டிருந்தது. 20 வாக்குச்சாவடிகளில் வாக்குக்கு அதிகமான வாக்கு பதிவிட்டு பூத் கேப்சரிங் செய்தவர்கள் அதிமுகவினர்.
ஒரு கட்சி தேர்தலை புறக்கணிக்கிறது என்றால் அந்த கட்சியை சேர்ந்தவர்கள் யாரும் வாக்களிக்கக்கூடாது. நாங்களும் கணக்கெடுக்க போகிறோம் நடைபெற உள்ள இடைத்தேர்தலில் யார் யார் வாக்களிக்க போகிறார்கள் என்று. அதிமுக கிளைக் கழக செயலாளர்கள் கவுன்சிலர்கள் ஓட்டு போட்டார்கள் என்றால் அவர்கள் அனைவரும் எடப்பாடியை புறக்கணித்து விட்டார்கள் என்று அர்த்தம்" என்றார்.
மேலும், தேர்தலை புறக்கணி என்று கட்சியில் சொல்லிவிட்டு அப்படி அந்த தொகுதி அதிமுகவினர் தேர்தலில் பங்கேற்றால் அதை மீறி யாரேனும் வாக்களித்தால் உங்களை அதிமுகவிலிருந்து நீக்கிவிடுவோம் நடவடிக்கை எடுப்போம் என்று சொல்ல எடப்பாடி தயாரா என்று சவால் விட்டு அவர், அண்டர் கிரவுண்ட் டீலிங் வைக்கலாம் என்று பார்க்கிறார்கள் என்றார்.
மேலும், வன்னிய பெருமக்களுக்கு கலைஞர் செய்ததைப் போல யாரும் செய்ததில்லை. 20 சதவீத இட ஒதுக்கீட்டை கொடுத்தது கலைஞர் அதன் மூலம் எத்தனை வன்னியர்கள் மருத்துவர்கள் ஆனார்கள் எத்தனை நபர்கள் இன்ஜினியர், ஐஏஎஸ் ஆனார்கள் இவை அனைத்தையும் அந்த மக்கள் மறந்து விட மாட்டார்கள்.
தமிழ்நாட்டுப் பெண்களுக்கு மாதம் ஆயிரம் ரூபாயை முதலமைச்சர் அவர்கள் கொடுத்து வருகிறார். அது மக்களிடத்தில் சென்றுள்ளதால் தான் நாடாளுமன்ற தேர்தலில் மிகப்பெரிய வெற்றியை திமுக பெற்றது. இந்த இடைத்தேர்தலிலும் வன்னிய பெருமக்கள் ஆயிரம் ராமதாஸ் வந்து சொன்னாலும் மனசாட்சி உள்ளவர்கள் நல்லவர்கள், இதயம் படைத்த வன்னியர்கள் அனைவரும் திமுக கூட்டணிக்கு தான் வாக்களிப்பார்கள்.
பாமகவை கை கழுவி விட்டார்கள் அவர்கள் சின்னமே போய்விட்டது. கடந்த தேர்தலில் ஒரு சின்னத்திற்கு வாக்கு கேட்டு விட்டு தற்போது ஒரு சின்னத்திற்கு வாக்கு கேட்டால் அந்த தொகுதி மக்கள் உங்களை மதிப்பார்களா என்று கேள்வி எழுப்பினார். அதிமுக அண்டர் கிரவுண்ட் டீலிங் வைக்கலாம் என முயற்சிக்கிறது. தேர்தல் ஆணையம் அதிகார அமைப்புடன் தொடர்பில் இருப்பதாக அதிமுக குறை சொல்வது மத்திய அரசை சந்தேகிப்பதாக அர்த்தம். அங்கே ஆட்சியில் இருப்பது மோடி அவர் இவங்க தாத்தா” என்றார்.
