சென்னை: ஒவ்வொரு ஆண்டும் சென்னை ஐஐடியில் படிக்கும் மாணவர்களுக்கு சராசரியாக 90 சதவீதம் வேலைவாய்ப்பு ஏற்படுத்தி தரப்படுகிறது என்றும், ஐஐடியிலிருந்து வெளியில் சென்று 6 மாதத்திற்கு மேல் வேலையில்லாமல் எவரும் இருந்ததில்லை என்றும் ஐஐடி இயக்குனர் காமகோடி தெரிவித்துள்ளார்.
சென்னை ஐஐடி இயக்குனர் காமகோடி செய்தியாளர்களைச் சந்தித்தார். அப்போது பேசிய அவர், “கடந்த ஆண்டு 83 விழுக்காடு மாணவர்களுக்கு வேலை வாய்ப்புகள் கிடைத்துள்ளது. மற்ற மாணவர்கள் உயர்கல்விக்காகவும், சுயதொழில் காரணமாகவும் வேலை வாய்ப்புகளைப் பெற முன் வருவதில்லை. ஒவ்வொரு ஆண்டும் சராசரியாக 90 சதவீதத்திற்கும் அதிகமான மாணவர்களுக்கு வேலை வாய்ப்புகள் கிடைத்துள்ளது.
பிஇ (BE), பிடெக் (B.Tech) படிப்பினை முடித்து விட்டு, வேலை வாய்ப்பு முகாமில் கலந்து கொண்டு வேலைக்குச் செல்கின்றனர். அவர்களுக்கு வேலை வாய்ப்பு ஏற்படுத்தி தரப்படுகிறது. 90 சதவீதம் மாணவர்கள் வேலைக்குச் சென்று விடுகின்றனர். 10 சதவீதம் மாணவர்கள் உயர்கல்விக்குச் செல்கின்றனர். ஆராய்ச்சி படிப்புகளில் ஈடுப்படும் மாணவர்கள் வேலைக்குச் செல்வது குறித்து அவர்கள் தான் முடிவு செய்ய வேண்டும்.
நட்பாண்டில் 83 சதவீதம் மாணவர்களுக்கு வேலை வாய்ப்பு ஏற்படுத்தி தரப்பட்டுள்ளது. ஜூலை மாதம் பட்டமளிப்பு விழாவின் போது தான் வேலைக்குச் சென்ற மாணவர்களின் விவரங்கள் முழுவதும் தெரியும். எம்எஸ் பட்டப்படிப்புகளை படிக்கும் மாணவர்களுக்கு ஜூலை மாதம் தான் பட்டம் வழங்கப்படும். அதன் பின்னர், அவர்கள் வேலைக்குச் செல்வது குறித்து முடிவு செய்வார்கள்.
சில மாணவர்கள் அரசுப் பணிக்கு செல்வதற்கான தேர்வினை எழுதுகின்றனர், சிலர் ஆராய்ச்சியில் ஈடுபடுகின்றனர். இதற்கு சில கால அவகாசம் எடுத்துக் கொள்வதால், அவர்கள் நேரடியாக வேலைவாய்ப்புகளைப் பெறுவதற்கு முன் வருவதில்லை. நன்றாக படிக்கக்கூடிய மாணவர்கள் அனைவருக்கும் வேலைவாய்ப்பு கண்டிப்பாக கிடைக்கிறது. ஐஐடியிலிருந்து வெளியில் சென்று 6 மாதத்திற்கு மேல் வேலையில்லாமல் எவரும் இருந்ததில்லை” என்று அவர் உறுதியளித்தார்.
இதையும் படிங்க: அரசுப் பள்ளிகளில் வரும் கல்வியாண்டு முதல் 100 MBPS வேகத்தில் இணையதள வசதி! - Internet In TN Govt Schools
