சென்னை: சென்னை மாவட்டத்தை உள்ளடக்கிய 16 சட்டமன்றத் தொகுதிகளுக்கான வாக்காளர் பட்டியல்கள் சிறப்பு சுருக்கமுறை திருத்தம் தொடர்பாக அங்கீகரிக்கப்பட்ட அரசியல் கட்சி பிரதிநிதிகள், வாக்குப்பதிவு அலுவலர்கள் மற்றும் வாக்குச்சாவடி நிலை அலுவலர்களுடனான ஆலோசனைக் கூட்டமானது சென்னை மாவட்ட வாக்காளர் பட்டியல் பார்வையாளர் அனில் மேஸ்ரம் தலைமையில் நடைபெற்றது.
ஆலோசனைக் கூட்டம்: ரிப்பன் மாளிகையில் நடைபெற்ற இந்த ஆலோசனைக்கூட்டத்தில் அதிமுக சார்பாக மாவட்ட செயலாளர்கள் தியாகராய நகர் சத்யா, ஆர்.எஸ்.ராஜேஷ், திமுக சார்பில் வழக்கறிஞர் மருது கணேஷ், பாஜக சார்பில் கராத்தே தியாகராஜன் உட்பட அரசியல் கட்சிகளின் பிரதிநிதிகள் பங்கேற்றனர்.
இந்த கூட்டத்தில் பேசிய கட்சி பிரதிநிதிகள், 16,17 ஆம் தேதிகளில் நடைபெற்ற சிறப்பு வாக்காளர் முகாமில் வாக்காளர்களின் விவரங்கள் பூத் வாரியாக இல்லாமல் சீரியல் வரிசையாக உள்ளது. இதனால் முறையாக சரி பார்க்க முடியவில்லை பூத் வாரியாக கொடுத்தால் சோதனை செய்ய சரியாக இருக்கும். இறந்தவர்கள் பெயரை இன்னுமும் வாக்காளர் பட்டியலிலிருந்து நீக்க வில்லை. வாக்காளர் பெயர் சேர்த்தல் நீக்குதல் உள்ளிட்டவற்றை அரசு முறையாக செய்ய வேண்டும் உள்ளிட்ட பிரச்சனைகளை எடுத்துரைத்தனர்.
பாஜக தியாகராஜன்: இதன் பின்னர் செய்தியாளர்களை சந்தித்த பாஜக பிரதிநிதி கராத்தே தியாகராஜன் கூறியதாவது,"பெருநகர சென்னை மாநகராட்சி ஆணையாளரும், மாவட்ட தேர்தல் அதிகாரியுமான குமரகுருபரன் தொடர்ந்து இந்த கூட்டத்தை புறக்கணித்து வருகிறார். வாக்காளர் பட்டியலில் நிறைய குளறுபடிகள் நடைபெறுகிறது.
பல புகார்களை கொடுத்து இருக்கிறோம். எங்கள் புகாரை அவர் எடுத்து கொண்டிருக்கிறார். குமரகுருபரன் மீது ஏற்கனவே புகார் கொடுத்திருக்கிறோம். இன்றைய கூட்டத்திலும் அவர் பங்கேற்கவில்லை எங்களுடைய கருத்துக்களை தெரிவித்து இருக்கிறோம்.
2026 ஜனவரி மாதம் வரக்கூடிய வாக்காளர் பட்டியல் தான் இறுதி வாக்காளர் பட்டியல்.
வாக்குச்சாவடி அலுவலர்கள் அனைத்தும் திமுகவை சேர்ந்தவர்கள் தான் இருக்கிறார்கள். காலம் காலமாக இப்படித்தான் இருக்கிறது.
விஐபி ஓட்டுகளை சரியாகச் சரிபார்க்கவில்லை" என தெரிவித்தார்.
இதையும் படிங்க: பொங்கல் பண்டிகையில் தேர்வு வைப்பதா! என்ன கொடுமை அரசே இது? - சு.வெ. காட்டம்
அதிமுக பிரதிநிதி சத்யா: "இறந்தவர்களின் ஓட்டு பலமுறை எழுதிக் கொடுத்தும் நீக்காமல் இருக்கிறார்கள். இறந்த வாக்காளர்களின் சில வாக்குகள் நடந்து முடிந்த நாடாளுமன்ற தேர்தலில் வாக்களித்து இருக்கிறார்கள். இதை நாங்கள் ஆராய்ந்து அதிகாரியிடம் கொடுத்திருக்கிறோம்.
சில யோசனையைச் சொல்லி இருக்கிறோம். அவர்களும் சரி செய்வதாக வாக்குறுதி கொடுத்திருக்கிறார்கள்.
குறிப்பிட்ட வாக்காளர்களின் ஓட்டுக்களை OTP மூலமாக நீக்கப்பட்டுள்ளனர்" என தெரிவித்தார். இந்த கூட்டத்தின் இறுதியில் வாக்குச்சாவடி அலுவலர்களை (Booth level office) திறமையான அதிகாரிகளாக நியமிக்க வேண்டும் என சென்னை மாநகராட்சி வட்டார ஆணையர்களை வாக்காளர்கள் பட்டியல் பார்வையாளர் அனில் மேஸ்ரம் கேட்டுக்கொண்டார்.
திமுக-தவெக மோதல்: அயோத்தி குப்பம் லேடி வில்லிங்டன் பள்ளி எதிரே வாக்காளர் சிறப்பு முகாம் நடைபெற்றது. இதற்காக பல்வேறு கட்சியினர் வாக்காளர்களுக்கு உதவுவதற்காகக் கட்சி கொடி கட்டி மேஜை போட்டனர். அப்போது திமுக - தவெக இடையே மேஜை போடுவதில் பிரச்சனை ஏற்பட்டு மோதல் வரை சென்றது. இதையடுத்து மெரினா காவல் துறையினர் சம்பவ இடத்திற்க்கு வந்து இரு தரப்பினரிடையே பேசி சமாதானம் செய்து வைத்ததாகவும், இவ்விவகாரம் தொடர்பாக விசாரணை மேற்கொண்டு வருவதாகவும் தெரிவித்தனர்.
ஈடிவி பாரத் வாட்ஸ்அப் சேனலில் இணைய இங்கே கிளிக் செய்யவும்
