கன்னியாகுமரி: கன்னியாகுமரி மாவட்டம், நாகர்கோவில் மாநகரப் பகுதிகளுக்கு குடிநீர் விநியோகம் செய்ய, கிருஷ்ணன் கோவில் பகுதியில் குடிநீர் சுத்திகரிப்பு நிலையம் உள்ளது. இது 1945ஆம் ஆண்டு திருவிதாங்கூர் மன்னர் காலத்தில், முக்கடல் அணையில் இருந்து தண்ணீர், குழாய் மூலம் கொண்டு வரப்பட்டு, தினமும் 70 லட்சம் லிட்டர் குடிநீர் சுத்திகரிப்பு செய்த பின்னர், நாகர்கோவில் பகுதி மக்களுக்கு விநியோகம் செய்யப்பட்டது.
இதே பின்னாளில், இங்கு 3 நிலையங்கள் அமைக்கப்பட்டு, 200 லட்சம் லிட்டர் குடிநீர் சுத்திகரிக்கப்பட்டு, மாநகராட்சி பகுதிகளில் விநியோகிக்கப்பட்டு வருகிறது. இங்கு தண்ணீர் சுத்திகரிக்க குளோரின் வாயு பயன்படுத்தப்பட்டு வருகிறது.
இதற்காக சுத்திகரிப்பு நிலையத்தில் நான்கு குளோரின் சிலிண்டர்கள் உள்ளன. ஒரு சிலிண்டரில் ஒரு டன் அளவிற்கு குளோரின் இருக்கும். இந்த சிலிண்டரில் குளோரின் காலியாக காலியாக, சுத்திகரிப்பு நிலையத்தில் பணியில் இருப்பவர்கள் அதனை மாற்றி வருவது வழக்கம்.
இந்த நிலையில், இன்று (ஏப்.25) காலை சுத்திகரிப்பு நிலையத்தில் குளோரின் சிலிண்டரில் ஒரு சிலிண்டர் காலியானதால், புதிய குளோரின் சிலிண்டரை மாற்ற ஊழியர்கள் நடவடிக்கை மேற்கொண்டுள்ளனர். அப்போது எதிர்பாராத விதமாக, குளோரின் சிலிண்டரில் இருந்து குளோரின் கேஸ் வெளியேறி உள்ளது.
சிறிது நேரத்தில் குளோரின் அதிக அளவு வெளியேறியதால், அங்கு பணியில் இருந்த ஐந்து ஊழியர்களுக்கு கண் எரிச்சல், மூச்சுத்திணறல் ஏற்பட்டுள்ளது. இது குறித்து மாநகராட்சி ஊழியர்கள் அதிகாரிகளுக்கும், தீயணைப்பு நிலையத்திற்கும் தகவல் தெரிவித்துள்ளனர்.
அதனைத் தொடர்ந்து, தகவலறிந்து வந்த தீயணைப்பு வீரர்கள், சம்பவ இடத்தில் மீட்புப் பணியை மேற்கொண்டு, மயக்கம் அடைந்தவர்களை ஆம்புலன்ஸ் மூலம் ஆசாரிபள்ளம் அரசு மருத்துவக் கல்லூரி மருத்துவமனைக்கு அனுப்பி வைத்துள்ளனர்.
மேலும், குளோரின் கசிவைச் சரி செய்ய வந்த தீயணைப்பு வீரர்களில் 3 பேருக்கு மயக்கம் ஏற்பட்டுள்ளது. அவர்களையும் உடனடியாக சக தீயணைப்பு வீரர்கள் மீட்டு, அருகாமையில் உள்ள தனியார் மருத்துவமனையில் சிகிச்சைக்காக அனுமதித்துள்ளனர். தற்போது அங்கு அவர்களுக்கு தீவிர சிகிச்சை அளிக்கப்பட்டு வருகிறது.
இதன் பின்னர், பாதுகாப்பு உபகரணங்கள் மூலம் ஒருவரை சுத்திகரிப்பு நிலையத்திற்குள் அனுப்பி வாயுக்கசிவைக் கட்டுப்படுத்தி உள்ளனர். இதில் தீயணைப்பு வீரர்கள் 3 பேர் மற்றும் மாநகராட்சி ஊழியர்கள் 5 பேர் மருத்துவமனையில் அனுமதிக்கப்பட்டு உள்ளனர்.
அதேபோன்று, அருகிலுள்ள வாத்தியார் விளை, கிருஷ்ணன் கோவில் உள்ளிட்ட பகுதிகளில் பொதுமக்களுக்கு உடல் உபாதை ஏற்பட்டால், உடனடியாக மருத்துவமனைக்குச் செல்லவும் மாநகராட்சி ஊழியர்கள் அறிவுறுத்தியுள்ளனர் என்பது குறிப்பிடத்தக்கது.
இதையும் படிங்க: திரவ நைட்ரஜனை நேரடியாக கலந்து விற்பனை செய்தால் சட்ட நடவடிக்கை!
