சென்னை: சினிமாவில் நடிக்க வைப்பதாக கூறி பல பெண்களிடம் மோசடியில் ஈடுபட்டு தலைமறைவாக உள்ள பாஜக பெண் நிர்வாகி மற்றும் அவரது மகனை போலீசார் தேடி வருகின்றனர். இதே போல் ரயில்வேயில் லோகோ பைலட் வேலை வாங்கி தருவதாக கூறி இளைஞரிடம் 15 லட்சம் ரூபாய் வரை பண மோசடியில் ஈடுபட்டு தலைமறைவாக உள்ள நபரை போலீசார் தேடி வருகின்றனர்.
பெண்களிடம் மோசடியில் ஈடுபட்ட பாஜக பெண் நிர்வாகி: தமிழக பாஜகவில் ஆன்மீகம் மற்றும் ஆலய மேம்பாட்டு பிரிவு மாவட்டச் செயலாளராக நெல்லை பகுதியைச் சேர்ந்த விஜயா என்பவர் இருந்து வருகிறார். இவரது மகன் மதன் பெண் ஒருவரை காதலித்து திருமணம் செய்து கொண்ட நிலையில் அவருடன் வாழ்ந்து வந்தார்.
இந்நிலையில் கணவன் மதனும், மாமியாரும் இணைந்து அவரது மனைவியிடம் வரதட்சணை கேட்டு கொடுமைப்படுத்தி வந்ததாக கூறப்படும் நிலையில் மதனின் மனைவி ஒரு நாள் அவரது செல்போனை எடுத்து மின்னஞ்சலை சோதனை செய்துள்ளார். அப்போது சினிமா வாய்ப்பு வாங்கி தருவதாக கூறி பல பெண்களிடம் மதன் மோசடியில் ஈடுபட்டு இருப்பதும் இதற்கு அவரது தாய் உடனடியாக இருந்ததும் தெரியவந்துள்ளது.
இதையடுத்து தொடர்ந்து கணவன் மனைவி இருவருக்கும் பிரச்னைகள் ஏற்பட்டு வந்ததை தொடர்ந்து இருவரும் பிரிந்து வாழ்ந்து வருகின்றனர். இந்த நிலையில் மதன் சினிமா வாய்ப்பு வாங்கி தருவதாக கூறி தன்னை ஏமாற்றியதாக பெண் ஒருவர் சென்னை அண்ணா நகர் காவல் நிலையத்தில் புகார் அளித்துள்ளார். இந்த புகாரின் பேரில் வழக்கு பதிவு செய்த போலீசார் தலைமறைவாக உள்ள மதன் மற்றும் அவரது தாய் விஜயாவை தேடி வருகின்றனர்.
ரயில்வேயில் வேலை வாங்கி தருவதாக இளைஞரிடம் ரூ.15 லட்சம் மோசடி: ராமநாதபுரம் மாவட்டத்தை சேர்ந்த வினோத் மைக்கேல் என்பவர் சென்னை பெரம்பூரில் தங்கி தனியார் உணவகத்தில் கணக்காளராக பணிபுரிந்து வருகிறார். இவர் ரயில்வேயில் வேலை வாங்க வேண்டும் என்பதற்காக சிலரை அணுகி உள்ளார். அப்போது விஜயகுமார் என்பவர் வினோத் மைகளுக்கு அறிமுகமாகியுள்ளார்.
இதையடுத்து ரயில்வே துறையில் லோகோ பைலட் வேலை வாங்கி தருவதாக கூறிய வினோத் மைக்கலிடம் இருந்து விஜயகுமார் 15 லட்ச ரூபாய் பணத்தை பெற்றுள்ளதாக கூறப்படுகிறது. இதையடுத்து ரயில்வே துறையில் வேலை கிடைத்தது போல் போலியாக தயாரிக்கப்பட்ட பணி நியமான ஆணை ஒன்றை விஜயகுமார் வினோத் மைக்கலிடம் கொடுத்துள்ளார். இதையடுத்து வினோத் மைக்கேல் அந்த பணி ஆணையை எடுத்துக்கொண்டு மும்பை ரயில்வே துறை அலுவலகத்திற்கு சென்று விசாரித்துள்ளார்.
அப்போது அது போலியான பணி ஆணை என அங்கிருந்த அலுவலர்கள் தெரிவித்த நிலையில் அதிர்ச்சி அடைந்த வினோத் மைக்கல் சென்னை செம்பியம் காவல் நிலையத்தில் இந்த மோசடி குறித்து புகார் அளித்துள்ளார். இந்த புகாரின் அடிப்படையில் மோசடியில் ஈடுபட்டு தலைமறைவாக உள்ள விஜயகுமாரை போலீசார் தீவிரமாக தேடி வருகின்றனர்.
அமலாக்கத்துறை சோதனையில் கணக்கில் வராத 33 லட்ச ரூபாய் பணம் பறிமுதல்: சென்னையில் செயல்பட்டு வரும் ஓஷன் லைப் ஸ்பேஸ் (ocean life spaces) எனும் பிரபல கட்டுமான நிறுவனங்கள் தொடர்புடைய இடங்களில் மூன்று நாட்களாக அமலாக்கத்துறை அதிகாரிகள் சோதனை மேற்கொண்டனர்.
இந்த பிரபல கட்டுமான நிறுவனத்தின் உரிமையாளர்களான எஸ்கே பீட்டர் மற்றும் பால சுப்ரமனியம் ஆகியோர் கருத்து வேறுபாடு காரணமாக சில தினங்களுக்கு முன்பு பிரிந்துள்ளனர். இதன் காரணமாக தனக்கு சேர வேண்டிய பங்கை பாலசுப்ரமணியன் கேட்டுள்ளார். ஆனால் எஸ்கே பீட்டர் அவரது பங்கை கொடுக்க மறுத்து விட்டதாக கூறப்படுகிறது.
இதனால் விரக்தி அடைந்த பாலசுப்பிரமணியம் இது குறித்து சென்னை காவல் ஆணையர் அலுவலகத்தில் புகார் அளித்தார். இந்த புகாரின் அடிப்படையில் மத்திய குற்றப்பிரிவு போலீசார் 6 பிரிவின் கீழ் வழக்கு பதிவு செய்து விசாரணை மேற்கொண்டு வந்தனர்.
மேலும் இது தொடர்பாக சென்னை உயர்நீதிமன்றத்திலும் வழக்கு நடந்து வந்த நிலையில் இந்த வழக்கை தனக்கு சாதகமாக சரி செய்து கொள்ள இடைத்தரகர்கள் மூலம் சுமார் 50 கோடி ரூபாய் பணம் பரிமாற்றம் செய்ததாக பீட்டர் மீது குற்றச்சாட்டு வைக்கப்பட்டது.
இந்த குற்றச்சாட்டின் அடிப்படையில் சட்டவிரோத பண பரிமாற்றம் நடந்திருப்பதாக கூறி அமலாக்கத்துறை அதிகாரிகள் சென்னை அபிராமிபுரம், கோட்டூர்புரம், அசோக் நகர் உள்ளிட்ட எஸ்கே பீட்டருக்கு சொந்தமான 7 இடங்கள் மற்றும் அவரது இல்லத்தில் மூன்று நாளாக தொடர்ந்து சோதனை மேற்கொண்டனர்.
3 நாட்களாக நடந்த இந்த சோதனையில் ரூ.450 கோடி மதிப்புள்ள சொத்து ஆவணங்கள், கணக்கில் காட்டப்படாத 33 லட்ச ரூபாய் பணம் ஆகியவற்றை பறிமுதல் செய்துள்ளதாக தகவல் வெளியாகியுள்ளது. மேலும் இந்த கட்டுமான நிறுவனத்தின் உரிமையாளர் எஸ் கே பீட்டர் மற்றும் அவரது மனைவி ஆகியோர் இணைந்து புகார்தாரர் பாலசுப்பிரமணியத்தின் நிறுவனத்தின் பங்கை 50 சதவிகிதத்திலிருந்து 10 சதவிகிதமாக குறைத்ததும் தெரியவந்துள்ளது.
இது மட்டுமின்றி பங்குதாரரின் கையொப்பத்தை போலியாக பயன்படுத்தி நிறுவனத்தில் இருந்து நீக்கி உள்ளதும் விசாரணையில் தெரியவந்துள்ளதாக தகவல் வெளியாகியுள்ளது.
இதையும் படிங்க: திமுக எம்.எல்.ஏ மகன் மற்றும் மருமகளை கைது செய்யாதது ஏன்? அண்ணாமலை ஆவேசம்..!
