சென்னை: இந்தியாவின் பொது போக்குவரத்தில் ஏழை, நடுத்தர மக்களின் முதல் தேர்வாக திகழ்வது ரயில்கள்தான். அந்த அளவிற்கு போக்குவரத்தில் ரயில்கள் மிக முக்கிய பங்கு வகிக்கிறது. தமிழகத்திலும் ரயில் போக்குவரத்தை மக்கள் அதிகமாக பயன்படுத்துகின்றனர். அனைவருக்கும் பயன்படும் வகையில் சிறப்பாக செயல்படக்கூடிய ரயில்வேயில் தமிழகத்தில் பல்வேறு திட்டங்கள் கொண்டுவரப்பட்டுள்ளன. நடப்பு நிதியாண்டில் (2024-25) மத்திய அரசு தமிழ்நாடு ரயில்வே திட்டங்களுக்கு 6,362 கோடி ஒதுக்கப்பட்டுள்ளது.
இவற்றில் தமிழகத்தில் 10 புதிய ரயில் பாதை திட்டங்கள், 3 அகல பாதை திட்டங்கள் மற்றும் 9 இரட்டை வழி பாதை திட்டங்கள் அடங்கும். இவற்றில் புதிய ரயில் பாதைக்கு ரூ.246 கோடியும் அகலப் பாதை திட்டத்திற்கு ரூ.478 கோடியும் இரட்டை வழி பாதைக்கு ரூ.812 கோடியும் ஒதுக்கப்பட்டுள்ளது. மொத்தமாக நடப்பு நிதியாண்டில் மேற்கண்ட திட்டங்களுக்கு ரூ.1,536 கோடி ஒதுக்கப்பட்டுள்ளது.
இந்த நிலையில், மத்திய நிதியமைச்சர் நிர்மலா சீதாராமன் வரும் பிப்ரவரி 1 ஆம் தேதி, 2025 -26 நிதியாண்டுக்கான பட்ஜெட்டை நாடாளுமன்றத்தில் தாக்கல் செய்ய உள்ளார். இந்த நிலையில், ஏற்கெனவே தமிழ்நாட்டுக்கு அறிவிக்கப்பட்ட பல்வேறு ரயில்வே திட்டங்களில் நடப்பு நிதியாண்டு வரை நிலுவையில் உள்ள பல்வேறு திட்டங்கள் மற்றும் அதற்காக கடந்த பட்ஜெட்டில் ஒதுக்கப்பட்ட நிதி குறித்து இந்த செய்தித்தொகுப்பில் காணலாம்.
நிலுவையில் உள்ள ரயில் பாதை திட்டங்கள்
1.திண்டிவனம் - திருவண்ணாமலை (செஞ்சி வழியாக 70 கிலோமீட்டர்) புதிய ரயில் பாதை திட்டத்தின் மதிப்பு ரூ. 900 கோடி. இந்த திட்டமானது 2006 ஆம் ஆண்டு தொடங்கப்பட்டது. இதுவரை ரூ.72.87 கோடி மட்டுமே செலவிடப்பட்டுள்ளது. இந்த திட்டத்தில் 4 பெரிய பாலங்கள் மட்டுமே கட்டி முடிக்கப்பட்டுள்ளன. கடந்த பட்ஜெட்டில் இந்த திட்டத்திற்கு ஒதுக்கப்பட்டது ரூ. 1000 மட்டுமே.
2. திண்டிவனம் - நகரி திட்டம் (179 கிலோ மீட்டர்) 2008 ஆம் ஆண்டு துவக்கப்பட்டது. இந்த திட்டத்தின் தற்போதைய மதிப்பு ரூ.3631 கோடி. இந்த திட்டத்திற்கு ரூ.806 கோடி இதுவரை செலவிடப்பட்டு இருக்கிறது. இதற்கு தேவையான 594 ஹெக்டர் நிலத்தில் 510 ஹெக்டர் நிலம் கையகப்படுத்தப்பட்டுள்ளது. மீதமுள்ள நிலம் கையகப்படுத்தபட்ட பின்னரே திட்டத்தின் பணிகள் தொடரும் என்று ரயில்வே அமைச்சகம் தெரிவித்துள்ளது. கடந்த பட்ஜெட்டில் இத்திட்டத்துக்கு ரூ.153.27 கோடி நிதி ஒதுக்கப்பட்டது.
3. அத்திப்பட்டு - புத்தூர் (88.30 கி.மீ.) திட்டம். 2008- இல் தொடங்கப்பட்ட இந்த திட்டத்தின் மொத்த மதிப்பு ரூ.1105 கோடி. இத்திட்டத்துக்கான நிலத்தை தமிழக அரசு கையகப்படுத்தியது. ஆனால். தமிழ்நாடு தொழில்துறை நோக்கங்களுக்காக நிலம் கையகப்படுத்துதல் சட்டத்தின் கீழ் இந்த நிலங்கள் இருந்ததால், சென்னை உயர் நீதிமன்றம் நிலம் கையகத்தை ரத்து செய்தது. இதனால் இந்த திட்டமும் முடங்கியுள்ளது. இந்த திட்டத்திற்கும் 2024 -25 மத்திய பட்ஜெட்டில் 1000 ருபாய் மட்டுமே நிதி ஒதுக்கப்பட்டுள்ளது.
4. ஈரோடு - பழனி (91.05 கி.மீ.) ரயில் பாதை திட்டம் 2008 ஆம் ஆண்டு தொடங்கப்பட்டது. இது காங்கேயம் - தாராபுரம் வழியாக செல்லும். இந்த திட்டத்தின் தற்போதைய மதிப்பு ரூ.1140 கோடி. இந்த திட்டத்தில் குறிப்பிடத்தக்க எந்த பணிகளும் இதுநாள்வரை நடைபெறவில்லை. இந்த திட்டத்திற்கு நடப்பு பட்ஜெட்டில் ரூ.1000 ஒதுக்கப்பட்டது.
5. சென்னை-கடலூர் (மகாபலிபுரம் வழியாக) (179.28 கிமீ) திட்டம். இதன் மொத்த மதிப்பு ரூ. 2670 கோடி. தற்போது புதுச்சேரி அரசின் வேண்டுகோளை ஏற்று மீண்டும் சர்வே நடத்தப்பட்டு வருகிறது. இந்த திட்டத்தில் புதுச்சேரி - கடலூர் இடையே இரட்டை வழிப்பாதை, விழுப்புரத்தில் இருந்து புதுச்சேரி செல்லும் பாதையில் வடக்கு மற்றும் தெற்கே சில மாற்றங்களை கொண்டு வர திட்டமிடப்பட்டுள்ளது. இதற்கான சர்வே முடிந்த பின்புதான் இந்த திட்டப் பணிகள் தொடங்கப்படும். இந்த திட்டத்திற்கும் நடப்பு பட்ஜெட்டில் ரூ.1000 மட்டுமே ஒதுக்கப்பட்டது.
6. மதுரை-தூத்துக்குடி (அருப்புக்கோட்டை வழியாக) (143.5 கி.மீ.) திட்டம் 2012 ஆம் ஆண்டு தொடங்கப்பட்டது. இந்த திட்டத்தின் தற்போதைய மதிப்பு ரூ.2053 கோடி. இதற்கு 771 ஹெக்டர் நிலம் தேவைபடுகிறது. 90 ஹெக்டர் நிலம் மட்டுமே கையகப்படுத்தப்பட்டுள்ளது. இதில் மீளவிட்டான் - மேல்மருதூர் இடையே 18 கிலோ மீட்டருக்கு பணிகள் முடிந்து தற்போது அந்த பாதையில் ரயில்கள் இயக்கப்பட்டு வருகின்றன. இந்த திட்டத்தின் பணிகள் தற்போது வரை நடைபெற்று வருகிறது. நடப்பு பட்ஜெட்டில் ரூ.18.72 கோடி ஒதுக்கப்பட்டது.
7. ஸ்ரீபெரும்புதூர்-கூடுவாஞ்சேரி (60 கி.மீ.) ரயில் பாதை திட்டமானது, இருங்காட்டுகோட்டை - ஆவடிக்கான ஸ்டெர்லைன் போடுவதற்காக 2013 -14 ஆம் ஆண்டு கொண்டு வரப்பட்ட திட்டமாகும். இந்த திட்டத்தின் மொத்த மதிப்பு ரூ.1500 கோடி. இதற்கான இடம் சரிபார்த்தல் என்பது நடைபெற்று வருகிறது. இது முடிந்த பிறகுதான் எவ்வளவு நிலம் தேவைப்படும் என்பதை ரயில்வே நிர்வாகம் அறிவிக்கும். இதனால் இந்த திட்டமும் நிலுவையில் உள்ளது. இதற்காக கடந்த பட்ஜெட்டில் ஒதுக்கப்பட்ட நிதி ரூ.1000 மட்டுமே.
8. மொரப்பூர் - தருமபுரி ரயில் பாதை திட்டம் (36 கி.மீ). இதன் தற்போதைய மதிப்பு ரூ.358.95 கோடி. ஆனால் இதற்கு வெறும் ரூ.49.69 கோடி மட்டுமே ஒதுக்கப்பட்டுள்ளது. இந்த திட்டத்துக்காக அரசு கையகப்படுத்தியுள்ள நிலங்கள், சில காரணங்களால் ரயில்வே வசம் ஒப்படைக்கப்படாமல் உள்ளது. இதனால் இந்த திட்டமும் நிலுவையில் உள்ளன. இத்திட்டத்துக்கு நடப்பு பட்ஜெட்டில் ரூ.49.7 கோடி ஒதுக்கப்பட்டுள்ளது.
9. ராமேஸ்வரம் - தனுஷ்கோடி திட்டம் (17.2 கிமீ ) 2019 இல் தொடங்கப்பட்டது. தற்போது இதற்கான மதிப்பு ரூ.208.29 கோடி. இந்த திட்டம் ecology sensitive என்று 21.04.2023 அன்று குறிப்பிட்டு, இத்திட்டத்தை கைவிட வேண்டுமென தமிழக அரசு மத்திய அரசுக்கு கடிதம் அனுப்பியது. இதனால் இந்த திட்டமும் நிலுவையில் உள்ளது. நடப்பு பட்ஜெட்டில் இந்த திட்டத்திற்கு 56.88 கோடி நிதி ஒதுக்கப்பட்டுள்ளது.
10. காரைக்கால் துறைமுகம் - பேரளம் திட்டம். இது 24 கிலோமீட்டர் தொலைவில் அமையவுள்ளது. இது அகலப் பாதை திட்டத்தின் கீழும் வருகிறது. இதற்கு புதுச்சேரி அரசு நிலம் தர வேண்டி இருக்கிறது, எனவே இத்திட்டமும் நிலுவையில் உள்ளது. இதற்கு, முந்தைய பட்ஜெட்டில் 104 கோடி ரூபாய் நிதி ஒதுக்கீடு செய்யப்பட்டுள்ளது.
நிலுவையில் உள்ள அகலப்பாதை திட்டங்கள்:
1. நாகப்பட்டினம்- திருத்துறைப்பூண்டி- வேளாங்கண்ணி திட்டம். இந்த திட்டத்திற்கு 100 சதவீதம் நிலம் கையகப்படுத்தப்பட்டது. இந்த திட்டத்தில் 11 பாலங்கள் 172 சிறிய பாலங்கள் கட்டி முடிக்கப்பட்டுவிட்டன. இது காரைக்கால் துறைமுகம் - பேரளம் திட்டத்தோடு இணைகிறது. இதனால் இந்த திட்டமும் நிலுவையில் உள்ளது.
2. மன்னார்குடி - பட்டுக்கோட்டை திட்டம் 2011 -12 நிதியாண்டில் துவங்கப்பட்டது. இந்த திட்டத்தின் தற்போதைய மதிப்பு ரூ.713.44 கோடி. 152 ஹெக்டர் நிலம் தேவைப்படும் நிலையில் இன்னும் கையகப்படுத்தாமல் இருப்பதால் இத்திட்டம் நிலுவையில் உள்ளது.
13. தஞ்சாவூர் - பட்டுக்கோட்டை அகலப்பாதை திட்டம் 2012 - 2013 ஆம் ஆண்டில் தொடங்கப்பட்டது. இந்த திட்டத்தின் மதிப்பு ரூ.957.87 கோடி. இதை செயல்படுத்துவதற்கு 196 ஹெக்டர் நிலம் தேவை. மத்திய அரசின் உள்கட்டமைப்பு மற்றும் திட்ட கண்காணிப்பு துறை மாதாந்திர திட்ட முன்னேற்றம் தொடர்பான அறிக்கையில் இவ்விரு திட்டங்களுக்கும் விரிவான திட்ட மதிப்பிற்கு இதுவரை தொகை அளிக்கவில்லை. மேற்கண்ட இரண்டு திட்டங்களுக்கும் 37.16 கோடி ருபாய் ஒதுக்கப்பட்டுள்ளது.
இரட்டை ரயில் பாதை திட்டம்
1.விழுப்புரம் - காட்பாடி (160 கிலோ மீட்டர்)
2. சேலம் - கரூர்- திண்டுக்கல் ( 160 கிலோ மீட்டர்)
3. ஈரோடு - கரூர் ( 65 கிலோ மீட்டர்)
4. விழுப்புரம் - திண்டுக்கல் ( 273 கிலோமீட்டர்)
இந்த நான்கு திட்டங்களுக்கும் கடந்த பட்ஜெட்டில் 1000 ருபாய் மட்டுமே நிதி ஒதுக்கப்பட்டுள்ளது. இதில் சேலம் - கரூர்- திண்டுக்கல், ஈரோடு - கரூர் ஆகிய திட்டங்களுக்கு இறுதிக்கட்ட சர்வே பணிகள் நடைபெற்று வருகின்றன. இதனால் இந்த திட்டங்களும் நிலுவையில் உள்ளன.
5. திருவள்ளூர் - அரக்கோணம் ( 26.83 கிலோமீட்டர்) இரட்டை ரயில் பாதை திட்டத்திற்கு 1.27 கோடி ருபாய் ஒதுக்கீடு செய்யப்பட்டுள்ளது. இதனுடைய பணிகள் தற்போது நடைபெற்று வருகிறது.
6. ஓமலூர் - மேட்டூர் அணை ( 29.03 கிலோ மீட்டர் ) இரட்டை பாதை திட்டத்திற்கு 2.05 கோடி ருபாய் ஒதுக்கீடு செய்யப்பட்டுள்ளது. இதன் பணிகளும் தற்போது நடைபெற்று வருகின்றன.
7. மதுரை- மணியாச்சி - தூத்துக்குடி ( 160 கிலோமீட்டர் ) இரட்டை பாதை திட்டத்திற்கு 200 கோடி ருபாய் ஒதுக்கப்பட்டுள்ளது. இதன் பணிகளும் தற்போது நடைபெற்று வருகின்றன.
8. சேலம் - மேக்னசைட் (11 கிலோமீட்டர்) திட்டத்திற்கு 8.70 கோடி ருபாய் ஒதுக்கப்பட்டுள்ளது. இதன் பணிகளும் தற்போது நடைபெற்றுவருகிறது.
9. மணியாச்சி - நாகர்கோவில் ( 102 கிலோமீட்டர் ) திட்டத்திற்கு 165.88 கோடி ருபாய் ஒதுக்கப்பட்டுள்ளது. இதன் பணிகளும் தற்போது நடைபெற்றுவருகிறது.
தக்ஷின் ரயில்வே தொழிலாளர்கள் சங்கத்தின்(DREU) முன்னாள் துணை செயலாளர் மனோகரன் கூறுகையில், "மற்ற மாநிலங்களை காட்டிலும் தமிழகத்திற்கு நிதி ஒதுக்கீடு என்பது குறைவாகவே இருக்கிறது. தமிழ்நாட்டை மாற்றான் தாய் மனப்பான்மையோடு நடத்தக்கூடாது. ரயில்வே அமைச்சகம் மற்றும் மத்திய அரசு தமிழகத்தை இவ்வாறு அணுகுவது சரியானது அல்ல.
தமிழகத்தில் நிலுவையில் உள்ள ரயில் திட்டங்களில் பெரும்பாலானவை கிராமப்புறங்களின் வழியாக வருகிறது. இதனால் அப்பகுதியில் உள்ள மக்கள் அதிகமாக பயன்பெறுவார்கள். போக்குவரத்து என்பது கிராமப்புறங்களில் இருந்தால்தான் அந்தப் பகுதி வளர்ச்சி அடையும். இது தமிழக வளர்ச்சிக்கு மட்டுமல்ல;இந்தியாவின் வளர்ச்சிக்கும் உறுதுணையாக இருக்கும். எனவே, நாடாளுமன்றத்தில் விரைவில் தாக்கல் செய்யப்பட உள்ள மத்திய பட்ஜெட்டில் தமிழக ரயில்வே திட்டங்களுக்கு அதிகப்படியாக நிதியை ஒதுக்கி தர வேண்டும்." என்று மனோகரன் கூறினார்.
