சென்னை: 18 வயதில் "World Chess Championship" பட்டத்தை வென்ற தமிழகத்தைச் சேர்ந்த குகேஷுக்கு, தமிழ்நாடு விளையாட்டு மேம்பாட்டு ஆணையத்தின் (SDAT) சார்பில், முதலமைச்சர் மு.க.ஸ்டாலின் தலைமையில் இன்று பாராட்டு விழா நடைபெற்றது. சென்னை, கலைவாணர் அரங்கில் நடைபெற்ற இந்த விழாவில் முதல்வர் மு.க.ஸ்டாலின், துணை முதல்வர் உதயநிதி ஸ்டாலின், கிராண்ட்மாஸ்டர் விஸ்வநாதன் ஆனந்த் உள்ளிட்டோர் பங்கேற்று குகேஷை பாராட்டி பேசினர்.
விழாவில் உதயநிதி ஸ்டாலின் பேசும்போது, " தமிழ்நாட்டில் இருந்து புறப்பட்டு சென்று இந்தியாவை உலக நாடுகள் திரும்பி பார்க்க வைத்துள்ள குகேஷ்க்கு பாராட்டுக்களை தெரிவித்துக் கொள்கிறேன். 18 வது வயதில் பதினெட்டாவது உலக சாம்பியன் பட்டத்தை வென்றுள்ள குகேஷை பார்த்து ஒட்டுமொத்த இந்தியாவும் பெருமை கொள்கிறது.
உலக அரங்கில் செஸ் போட்டி என்றாலே சென்னை தான். அதேபோல் சென்னை என்றாலே செஸ் போட்டி என மீண்டும் உறுதிப்படுத்துகின்ற வகையில் குகேஷின் சாதனை அமைந்துள்ளது.
சிறு வயதிலேயே செஸ் விளையாட்டில் அவருக்கு இருந்த ஆர்வம் மற்றும் திறமையை கண்டுபிடித்து ஊக்குவித்த அவரது பெற்றோருக்கு நன்றியை தெரிவித்துக் கொள்கிறேன்.
குகேஷின் சாதனையை அவரது பெற்றோர் எப்படி மகிழ்ச்சியுடன் பார்க்கிறார்களோ அதே உணர்வுடன் தான் தமிழக முதலமைச்சரும் பார்க்கிறார்.குகேஷ் வெற்றி பெற்று நாடு திரும்பியபோது, அவரது வெற்றியை தன்னுடைய வெற்றியாக தமிழக மக்கள் கொண்டாடி வருகின்றனர்.
கடந்தாண்டு சென்னையில் நடைபெற்ற செஸ் போட்டியில் வெற்றி பெற்ற குகேஷ்க்கு தமிழக முதலமைச்சர் ஊக்கத்தொகை வழங்கினார்.எவ்வளவு பணம் கொடுத்தாலும் ஈடாகாத வெற்றியை தற்போது குகேஷ் பெற்று வந்துள்ளார்.
தன்னுடைய 11 வயதில் ஜூனியர் சாம்பியன் பட்டம் வென்று தன்னுடைய வெற்றி கணக்கை தொடங்கிய குகேஷ் தனது 18வது வயதில் சீனியர் சாம்பியன் பட்டத்தையும் பெற்றுள்ளார்.
கிரிக்கெட் போட்டி எப்படி தமிழகத்தின் மூலைமுடுக்கெல்லாம் சென்றிருக்கிறதோ அதேபோல் குகேஷின் வெற்றி மூலம் செஸ் போட்டியும் தமிழகத்தின் மூலைமுடுக்கெங்கும் செல்லும்.
தமிழகத்திலிருந்து இன்னும் பல நூறு கிராண்ட் மாஸ்டர்கள் உருவாகட்டும். தமிழ்நாடு ஒருநாள் செஸ் போட்டியின் தலைநகரமாக உருவாக்கட்டும்" என்று உதயநிதி ஸ்டாலின் பேசினார்.
முன்னதாக, பாராட்டு விழா நடைபெறும் அரங்கிற்கு திறந்தநிலை காரில் நின்றபடி வந்த குகேஷுக்கு வழிநெடுகிலும் பொதுமக்கள் கரகோஷத்துடன் வாழ்த்துகளை கூறினர்.
சிங்கப்பூரில் அண்மையில் நடைபெற்ற உலக செஸ் சாம்பியன்ஷிப் போட்டியில் சீனாவின் டிங் லாரனை வீழ்த்தி, 18 வயதில் உலக செஸ் சாம்பியன் பட்டம் வென்ற இளம் வீரர் என்ற சாதனையை குகேஷ் படைத்துள்ளார்.
உலக செஸ் சாம்பியன் பட்டம் வென்ற குகேஷ்-க்கு ரூ.5 கோடி ரொக்கப் பரிசு வழங்கப்படும் என்று தமிழ்நாடு முதலமைச்சர் மு.க.ஸ்டாலின் அறிவித்திருந்தார். இந்த நிலையில், தற்போது சிங்கப்பூரிலிருந்து சென்னை திரும்பியுள்ள குகேஷ்க்கு சிறப்பான வரவேற்பும் பாராட்டுக்களும் வழங்கப்பட்டு வருகின்றன.
