பெங்களூரு: தென் ஆப்பிரிக்கா மகளிர் அணி இந்தியாவில் சுற்றுப்பயணம் செய்து ஒரு டெஸ்ட், தலா 3 ஒருநாள் மற்றும் டி20 போட்டிகள் கொண்ட தொடரில் விளையாடி வருகிறது. அதில் இரு அணிகளுக்கு இடையே முதலில் ஒருநாள் தொடர் நடைபெறுகிறது. அதன்படி இரு அணிகளுக்கு இடையிலான முதலாவது ஒருநாள் போட்டி பெங்களூரு சின்னசாமி மைதானத்தில் இன்று (ஜூன்.16) நடைபெற்றது.
இதில் டாஸ் வென்ற இந்திய அணியின் கேப்டன் ஹர்மன்பிரீத் கவுர் பேட்டிங்கை தேர்வு செய்தார். அதன்படி முதலில் பேட்டிங் செய்த இந்திய அணி 50 ஓவர்கள் முடிவில் 8 விக்கெட்டுகள் இழப்பிற்கு 265 ரன்கள் குவித்தது. இந்திய அணியில் அதிகபட்சமாக அபாரமாக விளையாடிய மந்தனா 117 ரன்கள் குவித்தார்.
இறுதி கட்டத்தில் தீப்தி சர்மா 37 ரன்களும், பூஜா 31 ரன்களும் குவித்து அணி 250 ரன்களை கடக்க உதவினர். இதனையடுத்து 266 ரன்கள் அடித்தால் வெற்றி என்ற இலக்கை நோக்கி களமிறங்கிய தென் ஆப்பிரிக்கா, இந்திய வீராங்கனைகளின் பந்துவீச்சை சமாளிக்க முடியாமல் அடுத்தடுத்து விக்கெட்டுகளை இழந்து தடுமாறியது.
ஆஷா ஷோபனா, தீப்தி சர்மாவின் வேகத்திற்கு ஈடுகொடுக்க முடியாமல் டெஹ்ன் ஆப்பிரிக்க வீராங்கனைகள் விக்கெட் அணிவகுப்பு நடத்தினர். இறுதியில் 37 புள்ளி 4 ஓவர்கள் மட்டுமே தாக்குப்பிடித்த தென் ஆப்பிரிக்கா மகளிர் அணி 122 ரன்களில் ஆல் அவுட் ஆனது. இதன் மூலம் 143 ரன்கள் வித்தியாசத்தில் இந்தியா மகளிர் அணி அபார வெற்றி பெற்று தொடரை வெற்றியுடன் தொடங்கியது.
தென் ஆப்பிரிக்கா தரப்பில் அதிகபட்சமாக சுனே லூஸ் 33 ரன்கள் அடித்தார். இந்தியா தரப்பில் அதிகபட்சமாக அறிமுக வீராங்கனையான ஆஷா சோபனா 4 விக்கெட்டுகளும், தீப்தி சர்மா 2 விக்கெட்டுகளும் வீழ்த்தினர்.
இதையும் படிங்க: ஆஸ்திரேலியாவிடம் வீழ்ந்த ஸ்காட்லாந்து... இங்கிலாந்துக்கு அடித்தது அதிர்ஷ்டம்! - T20 World cup 2024
