டெல்லி: வங்கதேசம் அணி இந்தியாவில் சுற்றுப்பயணம் மேற்கொண்டு இரண்டு போட்டிகள் கொண்ட டெஸ்ட் மற்றும் மூன்று போட்டிகள் கொண்ட டி20 கிரிக்கெட் தொடரில் விளையாடி வருகிறது. இதில் முதலில் நடைபெற்ற டெஸ்ட் தொடரை இந்திய அணி 2-க்கு 0 என்ற கணக்கில் கைப்பற்றியது.
தொடர்ந்து குவாலியரில் நடைபெற்ற டி20 கிரிக்கெட் தொடரின் முதலாவது ஆட்டத்தில் இந்தியா 7 விக்கெட் வித்தியாசத்தில் வெற்றி பெற்றது. இந்நிலையில், இந்தியா - வங்கதேசம் அணிகள் இடையிலான 2வது டி20 கிரிக்கெட் போட்டி இன்று டெல்லியில் உள்ள அருண் ஜெட்லி மைதானத்தில் நடைபெறுகிறது.
சூர்யகுமார் யாதவ் தலைமையிலான இந்திய இளம் படை இலங்கை தொடர் முதல் அடுத்தடுத்து வெற்றிகளை குவித்து வருகிறது. இன்றைய ஆட்டத்திலும் இந்திய அணி வெற்றி பெற்று தொடரை கைப்பற்றும் என எதிர்பார்க்கப்படுகிறது. முதலாவது ஆட்டத்தில் மயங்க் யாதவ், மற்றும் நிதிஷ் ரெட்டி ஆகியோர் இந்திய அணியில் முதல் முறையாக அறிமுகமாகினர்.
இன்றைய ஆட்டத்திலும் இருவருக்கும் மீண்டும் வாய்ப்பு வழங்கப்படும் என எதிர்பார்க்கப்படுகிறது. மற்றபடி இந்திய அணியில் பெரிய அளவில் மாற்றம் இருக்காது எனக் கருதப்படுகிறது. அதேநேரம் நஜ்முல் ஹூசைன் சான்டோ தலைமையிலான வங்கதேச அணி இந்த டி20 தொடரை இழக்கக் கூடாது என்றால் இன்றைய ஆட்டத்தில் வெற்றி பெற்றாக வேண்டிய கட்டாயத்தில் உள்ளது.
இந்திய தொடருடன் 20 ஓவர் கிரிக்கெட் போட்டியில் இருந்து ஓய்வு பெற வங்கதேச வீரர் மஹ்முதுல்லா திட்டமிட்டு இருப்பதாக கூறப்படும் நிலையில், வெற்றியுடன் அவரை வழியனுப்பி வைக்க அந்த அணி போராடும் என எதிர்பார்க்கப்படுகிறது. வெற்றிக்காக இரு அணிகளும் கடுமையாக போராடும் என்பதால் இன்றைய ஆட்டத்தில் நிச்சயம் விறுவிறுப்புக்கு பஞ்சம் இருக்காது.
போட்டிக்கான இரு அணி வீரர்களின் உத்தேச பட்டியல்:
வங்கதேசம்: லிட்டன் தாஸ் (விக்கெட் கீப்பர்), நஜ்முல் ஹூசைன் சான்டோ (கேப்டன்), பர்வேஸ் ஹொசைன் எமன், தவ்ஹித் ஹிரிடோய், மஹ்முதுல்லா, ஜாக்கர் அலி, மெஹிதி ஹசன் மிராஸ், ரிஷாத் ஹொசைன், தஸ்கின் அகமது, ஷோரிபுல் இஸ்லாம், முஸ்தாபிசுர் ரஹ்மான், மஹேதி ஹசன், டன்சித் ஹசன், தன்சிம் ஹசன் சாகிப்.
இந்தியா: சஞ்சு சாம்சன் (விக்கெட் கீப்பர்), சூர்யகுமார் யாதவ் (கேப்டன்), அபிஷேக் சர்மா, நிதிஷ் ரெட்டி, ஹர்திக் பாண்டியா, ரியான் பராக், ரின்கு சிங், வாஷிங்டன் சுந்தர், வருண் சக்கரவர்த்தி, அர்ஷ்தீப் சிங், மயங்க் யாதவ், ஜிதேஷ் சர்மா, திலக் வர்மா, ரவி பிஷ்னோய், ஹர்ஷித் ராணா.
இதையும் படிங்க: கடும் நெருக்கடியில் இங்கிலாந்து.. சொந்த ஊரில் கெத்து காட்டிய பாகிஸ்தான்!
