அமெரிக்கா: 20 அணிகள் பங்கேற்று நடைபெற்று வரும் ஐசிசி ஆடவர் 20 ஓவர் உலகக் கோப்பை கிரிக்கெட் தொடரானது, ஆரம்பமே பல்வேறு டிவிஸ்ட்களை கொடுத்து வருகிறது. காரணம், கிரிக்கெட் வரலாற்றில் ஜாம்பவான்களாக இருந்த அணிகளை கத்துக்குட்டி அணிகள் வீழ்த்தி சாதனை படைத்து வருகிறது.
முன்னதாக நடைபெற்ற போட்டிகளில் பாகிஸ்தானை வீழ்த்தியது அமெரிக்கா. அதேபோல், சர்வதேச போட்டிகளில் விளையாடிய அனுபவமிக்க அயர்லாந்து அணியை வீழ்த்தியது கத்துக்குட்டி அணியான கனடா. அதேபோல், இன்று நடைபெற்ற நியூசிலாந்து அணிக்கு எதிரான போட்டியில் 84 ரன்கள் வித்தியாசத்தில் வெற்றி பெற்றது ஆப்கானிஸ்தான் அணி.
அந்த வரிசையில், தற்போது இலங்கை அணியும் இணைந்துள்ளது. அமெரிக்காவின் டல்லாஸ் நகரில் நடைபெற்ற 15வது லீக் போட்டியில் இலங்கை - வங்கதேசம் அணிகள் மோதின. இதில் டாஸ் வென்ற வங்கதேசம் அணி பந்து வீச்சை தேர்வு செய்தது. அதன்படி முதலில் களமிறங்கிய இலங்கை அணி, வங்கதேசம் அணியின் பந்துவீச்சை எதிர் கொள்ள முடியாமல் திணறியது.
இருப்பினும், 20 ஓவர்கள் முடிவில் தட்டுத்தடுமாறி 9 விக்கெட்டுகள் இழப்பிற்கு 124 ரன்களைச் சேர்த்தது. அந்த அணியில் அதிகபட்சமாக நிசன்கா 47 ரன்களை எடுத்தார். சிறப்பாக பந்துவீசிய பங்களாதேஷ் அணியில் முஸ்தபிசூர், ரிஷாத் ஹூசைன் தலா 3 விக்கெட்களை வீழ்த்தினர்.
டஸ்கின் அஹமத் 2 விக்கெட்களை வீழ்த்தினார். இதனையடுத்து, 125 ரன்கள் எடுத்தால் வெற்றி என்ற இலக்குடன் களமிறங்கிய வங்கதேசம் அணி, அடுத்தடுத்து விக்கெட்டுகளை பறிகொடுத்து தடுமாறியது. இதனால் போட்டி இலங்கை பக்கமா அல்லது வங்கதேசம் பக்கமா என கடைசி வரை த்ரில்லாக சென்று கொண்டு இருந்தது.
இருப்பினும், வங்கதேச அணியில் லிட்டன் தாஸ் மற்றும் தௌஹித் குறிப்பிடத்தக்க ரன்களை சேர்த்து அணியை வெற்றிப் பாதைக்கு அழைத்துச் சென்றனர். லிட்டன் தாஸ் 36 ரன்களையும், தௌஹித் 40 ரன்களையும் எடுத்திருந்தனர். இதில் தௌஹித் 20 பந்துகளில் அதிரடியாக ஆடி 4 சிக்சர்களை அடித்து 40 ரன்களை எடுத்தார்.
இறுதியில், 19 ஓவர்களில் 8 விக்கெட்களை இழந்து 125 ரன்களை எடுத்து 2 விக்கெட்கள் வித்தியாசத்தில் வெற்றி பெற்றது வங்கதேசம். இலங்கை அணி சார்பில் நுவான் துஷாரா 4 விக்கெட்களை வீழ்த்தினார். ஆட்டநாயகனாக ரிஷாத் ஹூசைன் தேர்வு செய்யப்பட்டார்.
இதையும் படிங்க: ரஷித் கான் சுழலில் சுருண்ட நியூஸிலாந்து.. ஆஃப்கானிஸ்தான் இமாலய வெற்றி!
