லண்டன்: கடந்த 2021ஆம் ஆண்டு மே மாதம் இங்கிலாந்தில் இருந்து, ஆஸ்திரேலியாவிற்கு சரக்கு விமானம் வழியாக, 57 மில்லியன் பவுண்டுகள் மதிப்புள்ள, 512 கிலோ எடையுள்ள கோகோயின் (Cocaine) போதைப் பொருள் ஏற்றுமதி செய்ததாக, இங்கிலாந்தில் உள்ள இந்திய வம்சாவளி தம்பதிக்கு 33 ஆண்டுகள் சிறை தண்டனை விதிக்கப்பட்டுள்ளது.
மே மாதம் 2021இல் ஆஸ்திரேலியாவின் சிட்னி வந்த, 57 மில்லியன் பவுண்டுகள் மதிப்புள்ள கோகோயினை ஆஸ்திரேலிய எல்லைப்படை தடுத்து நிறுத்தினர். இந்த சம்பவம் குறித்து தேசிய குற்றவியல் நிறுவனத்தின் (NCA - National Crime Agency) புலனாய்வு அதிகாரிகள், தீவிர விசாரணை நடத்தினர்.
ஈலிங்கில் உள்ள ஹன்வெல்லில் இருந்து ஆர்த்தி தீர் (வயது 59), கவல்ஜித்சிங் ரைஜாடா (35) ஆகியோர் இந்த சம்பத்திற்கு தொடர்புடையவர்களாக புலனாய்வாளர்கள் கண்டறிந்தனர். இவர்கள் இந்திய வம்சாவளியினர் என்பது குறிப்பிடத்தக்கது. இவர்கள் இந்த குற்றத்தை தாம் செய்யவில்லை என்று மறுத்த நிலையில், கைப்பற்றப்பட்ட போதைப்பொருட்கள் அடங்கிய உலோக கருவி பெட்டியின் (Tool Box) பிளாஸ்டிக் உறைகளில் கவல்ஜித்சிங் ரைஜாடாவின் கைரேகைகள் இருப்பது கண்டறியப்பட்டது.
இது மட்டுமில்லாமல், 2 ஆயிரத்து 855 பவுண்டுகள் மதிப்புள்ள கருவிப்பெட்டிகளின் ஆர்டர்களுக்கான ரசீதுகளும் கவல்ஜித்சிங் ரைஜாடாவின் வீட்டிலிருந்து கண்டுபிடிக்கப்பட்டதாக தெரிவிக்கப்பட்டு உள்ளது. தீர் மற்றும் ரைஜாடா போதைப்பொருள் கடத்தலை மட்டும் நோக்கமாக கொண்டு Viefly Freight Services என்ற நிறுவனத்தை நடத்தி வந்ததாக தேசிய புலனாய்வு அதிகாரிகள் தெரிவித்து உள்ளனர்.
இங்கிலாந்து நாட்டின் லண்டன் நகரில் உள்ள சவுத்வார்க் க்ரவுன் நீதிமன்றத்தில், இந்த வழக்கு மீதான விசாரணை நடைபெற்ற நிலையில், ஆர்த்தி தீர் மற்றும் கவல்ஜித்சிங் ரைஜாடா மீதான குற்றம் நிரூபிக்கப்பட்டது. இந்த நிலையில் நேற்று (ஜன.30) இவர்களுக்கு 33 ஆண்டுகள் சிறை தண்டனை விதித்து, சவுத்வார்க் க்ரவுன் நீதிமன்றம் உத்தரவு பிறப்பித்துள்ளது.
தீர், மார்ச் 2003 முதல் அக்டோபர் 2016 வரையிலும், ரைஜாடா மார்ச் 2014 முதல் டிசம்பர் 2016 வரையிலும் ஹீத்ரோவில் உள்ள விமான சேவை நிறுவனத்தில் பணிபுரிந்துள்ளனர். இதன் மூலம் அவர்கள் விமான நிலைய சரக்கு பற்றி அறிந்திருப்பர் என்று கூறப்படுகிறது.
இந்த தம்பதி மீது உள்ள குற்றச்சாட்டுகள்:
2021 ஆம் ஆண்டு ஜூன் மாதம் ஆர்த்தி தீர் வீட்டிலிருந்து 5 ஆயிரம் பவுண்டுகள் மதிப்புள்ள தங்க முலாம் பூசப்பட்ட வெள்ளிக்கட்டிகள், 13 ஆயிரம் பவுண்டுகள் ஆகியவற்றை அதிகாரிகள் கைப்பற்றி, தம்பதியை கைது செய்தனர்.
2023 ஆம் ஆண்டு பிப்ரவரி மாதம் ரைஜாடா தனது தாயின் பெயரில் வாடகைக்கு எடுத்திருந்த சேமிப்பு கிடங்கில் இருந்து, 3 மில்லியன் பவுண்டுகள் பணத்தை தேசிய புலனாய்வு அதிகாரிகள் கைப்பற்றி, தம்பதியை கைது செய்தனர்.
2019 ஆம் ஆண்டு முதல் 2022 வரை வெவ்வேறு வங்கி கணக்குகளில் 7,40,000 பவுண்டுகள் பணத்தை டெபாசிட் செய்து, பண மோசடியில் ஈடுபட்டதாக குற்றம் சாட்டப்பட்டனர்.
கடந்த 2017 ஆம் ஆண்டில் காப்பீட்டுத் தொகைக்காக தனது 11 வயது வளர்ப்பு மகன் கோபால் செஜானியை கொலை செய்ய ஏற்பாடுகள் செய்ததாக குற்றம் சாட்டப்பட்டனர். 2015 ஆம் ஆண்டு குஜராத்தில் இருந்து கோபால் செஜானியை தத்தெடுத்துள்ளனர் என்பது குறிப்பிடத்தக்கது.
இதையும் படிங்க: 10 இந்திய மீனவர்களின் சிறைத்தண்டனையை நிறுத்தி வைத்த இலங்கை நீதிமன்றம்!
