மதுரை: சர்வதேச மருத்துவச்சிகள் தினம் இன்று (மே 5) கொண்டாடப்படும் நிலையில், மதுரை அரசு ராஜாஜி மருத்துவமனை மருத்துவர்கள் உள்ளிட்ட அனைவரது சார்பிலும் மருத்துவச்சிகளுக்கு வாழ்த்துக்கள் தெரிவிக்கப்பட்டது. உலகம் முழுவதும் குழந்தை பிறப்பில் முக்கிய பங்காற்றும் இந்த மருத்துவச்சிகள் யார்? இவர்கள் ஏன் முக்கியத்துவம் வாய்ந்தவர்கள்? இவர்கள் சந்திக்கும் பிரச்னை மற்றும் சவால்கள் என்ன என்பது உள்ளிட்டவைகளை தெரிந்துகொள்ள வேண்டியது அவசியம்.
யார் இந்த மருத்துவச்சிகள்? ஒரு கர்ப்பிணி பிரசவத்திற்காக மருத்துவமனைக்கு பரிசோதனை மேற்கொள்ளச் செல்லும் நேரத்தில் இருந்து, அந்த கர்ப்பிணி குழந்தை பெற்று, தாய் சேய் நலத்துடன் வீடு திரும்பும் வரை பாதுகாத்து, தொடர்ந்து அந்த குழந்தையின் தடுப்பூசிகள் உள்ளிட்ட ஆரம்பகட்ட மருத்துவத் தேவைகள் முடியும் வரை கண்காணித்து பாதுகாப்பவரே மருத்துவச்சி.
இந்த மருத்துவ சேவையாற்ற, அவர்கள் தனிப்பட்ட பயிற்சி பெற்று அங்கீகாரம் பெற வேண்டும். அது மட்டுமின்றி, ஒரு கர்ப்பிணிக்கு அவர்கள் சேவையாற்றும் நேரத்தில் கனிவுடனும், பொறுமையுடனும், அறிவாற்றலுடனும் செயல்பட வேண்டும் என்பதே இந்த துறையில் பணியாற்றும் மருத்துவச்சிகளுக்கான முதல் தகுதி என சர்வதேச மருத்துவச்சிகளுக்கான கூட்டமைப்பு (International Confederation of Midwives) கூறுகிறது.
மருத்துவத்துறைக்கு மருத்துவச்சிகளால் என்ன பயன்? உலக அளவில் ஒவ்வொரு மகப்பேறு நிகழ்வின்போதும் மருத்துவரின் பணியை விட இவர்களின் பணி அளவற்றது. மருத்துவருக்கும், நோயாளிக்கும் இடையே பாலமாக இருந்து அனைத்து பணிகளையும் மேற்கொள்கிறார்கள் இவர்கள்.
இந்த துறையில் பெண்கள் மட்டுமே பணியாற்றும் நிலையில், பெண் ஊழியர்களுக்கான பற்றாக்குறை என்பது உலக அளவில் 9 லட்சமாக இருக்கிறது. மேலும், இந்த மருத்துவச்சிகளின் அயராத உழைப்பால், உலக அளவில் பெரும்பாலும் தாய், சேய் இறப்பு விகிதம் கட்டுக்குள் கொண்டு வரப்பட்டுள்ளது என சர்வதேச மருத்துவச்சிகளுக்கான கூட்டமைப்பு தெரிவித்திருக்கிறது. குழந்தை பிறப்பு காலகட்டத்தை நிர்வகிப்பதற்காக மட்டுமே தயார்படுத்தப்படும் இவர்கள், மருத்துவத் துறையில் மிக முக்கியத்துவம் வாய்ந்தவர்கள்.
மருத்துவச்சிகளுக்கான அங்கீகாரம் வழங்கப்படுகிறதா? ஒரு குழந்தை முதல் முறையாக இந்த பூமியில் பிறக்கும்போது கையில் ஏந்தும் மருத்துவச்சிகள், சமூகத்தாலும், பல்வேறு தனியார் மருத்துவமனைகளிலும் முறையாக அங்கீகரிக்கப்படுகிறார்களா என கேட்டால் அது கேள்விக்குறிதான்.
ஏராளமான மருத்துவச்சிகள், போதிய உதியம் மற்றும் சலுகைகள் இல்லாமல் நேரம் காலமின்றி பணியாற்றுகிறார்கள். அரசுத் துறையில் வீடு தேடிச் சென்று தாய், சேய் இருவரையும் கவனிக்கிறார்கள். இவர்களுக்கு தற்போது கிடைக்கப்பெற்று வரும் அங்கீகாரத்தில் இருந்து மேலும் அது அதிகரிக்க வேண்டும் என்பது கோரிக்கை அல்ல. உலக நாடுகளின் தேவை. இல்லை என்றால், இந்த துறையில் ஆள் பற்றாக்குறை என்பது உயர வாய்ப்பு இருக்கிறது.
மருத்துவச்சிகளின் சேவை உலகிற்கு ஏன் தேவை?
- குடும்பக் கட்டுப்பாடு, மகப்பேறு இறப்பு, பிரசவம் மற்றும் புதிதாகப் பிறந்த குழந்தை இறப்புகளில் 83 சதவீதம் இவர்களால் தடுக்கப்படுகிறது.
- இவர்களின் வரம்பிற்குள் இருக்கும் சேவைப் பணிகளால், பிரசவம் மற்றும் ஆரம்பகால வாழ்க்கையின் இயல்பான செயல்முறைகளை 62 சதவீதம் வெற்றிகரமாக கடக்க முடியும்.
- மருத்துவச்சி சேவைக்கான சர்வதேச அங்கீகாரம் பெறுவதற்கு அவர்கள் கல்வி கற்கும்போதே 87 சதவீதம் சேவையாற்ற முடியும். இதன் மூலம் தேவைகளும் பூர்த்தி செய்யப்படும்.
- உலக அளவில் 82 சதவீதம் தாய் இறப்பு விகிதம் இவர்களால் கட்டுக்குள் கொண்டு வரப்பட்டுள்ளது.
இது குறித்து மதுரை அரசு ராஜாஜி மருத்துவமனையின் மகப்பேறு மருத்துவரும், மகப்பேறியல் துறைத் தலைவருமான டாக்டர் ஜோதிசுந்தரம் ஈடிவி பாரத்திற்கு பேட்டி அளித்தார். அப்போது அவர் கூறியதாவது, "பண்டைய காலங்களில் வீடுகளிலேயே பிரசவம் பார்த்த பெண்களே மருத்துவச்சிகள்.
வீடுகளில் பிரசவம் பார்க்கப்பட்டபோது, தாய் மற்றும் சேய் இறப்பு விகிதம் அதிகமாக இருந்தது. ஆனால், தற்போது அரசின் சீரிய முயற்சி காரணமாக அனைத்து பிரசவங்களும் அரசு அல்லது தனியார் மருத்துவமனைகளில் நடைபெறுகின்றன. மருத்துவமனைப் பிரசவங்கள் மூலமாக கர்ப்பிணிகளின் இறப்பு, மற்றும் சிசு மரண விகிதம் பெருமளவு குறைக்கப்பட்டுள்ளது. இந்த மரண விழுக்காட்டை பெருமளவு குறைத்த இந்தியாவின் 3வது பெரிய மாநிலமாக தமிழ்நாடு திகழ்கிறது" எனக் கூறினார்.
அவரைத் தொடர்ந்து, பேராசிரியர் டாக்டர் தங்கமணி கூறுகையில், “கர்ப்பிணிக்கு பிரசவம் பார்க்கின்ற நேரத்தில், அவர்களை ஆசுவாசப்படுத்தி, கனிவோடு அவர்களை அணுகி, உளவியல் ரீதியில் அவர்களை தயார்படுத்துவதற்கு பேறுகால உதவியாளர்களின் (மருத்துவச்சிகள்) பங்களிப்பு அளப்பரியது. மகப்பேறு மருத்துவர்களுக்கும், தாய்மார்களுக்கும் இடையில் இணைப்புப் பாலமாக இருப்பவர்கள் இவர்கள்தான். எங்களுக்கான மருத்துவப் பணியைச் சிறப்பாக மேற்கொள்ள எங்களுக்கு மிகப்பெரும் பலமாக அவர்கள் உள்ளனர்" எனக் கூறினார்.
இவரைத் தொடர்ந்து பேறுகால செவிலியர் உமா கூறுகையில், “கர்ப்பிணிகளின் வயிற்றிலிருக்கும் ஒவ்வொரு சிசுவும் நாளைய உலகத்தின் தலைமுறைகள். ஒரு பெண் தான் கருவுற்றவுடன், தன்னை அங்குள்ள கிராமப்புற பேறுகால செவிலியரிடம் ஆர்சிஹெச் (Reproductive and Child Health) பதிவு எண்ணை பெற்றுக் கொள்கிறார்.
அதனைத் தொடர்ந்து 28 வாரங்கள் மாதம் ஒரு முறையும், 28 முதல் 32 வாரம் வரை மாதம் இருமுறையும், 36 முதல் பிரசவ காலம் வரை வாரத்திற்கு ஒரு முறையும் தங்களை பரிசோதனை செய்து கொள்வதை உறுதி செய்யும் பொறுப்பு எங்களுடையது என்பதை உணர்ந்து செயல்படுகிறோம்” எனக் கூறினார்.
இதையும் படிங்க: குழந்தைப் பேற்றை தள்ளிப்போடும் பெண்கள்.. கருமுட்டை Freeze செய்யும் கலாச்சாரம் வரபிரசாதமா? - What Is Egg Freezing In Women
