தமிழ் சினிமாவில் இந்த வாரம் அல்லு அர்ஜுன் நடித்துள்ள புஷ்பா 2 திரைப்படம் திரையரங்குகளில் வெளியாகி உள்ள நிலையில், ஓடிடியில் வெளியாகியுள்ள திரைப்படங்கள் குறித்து தற்போது பார்க்கலாம்
அமரன்: ராஜ்கமல் ஃபிலிம்ஸ் இன்டர்நேஷனல் தயாரிப்பில் ராஜ்குமார் பெரியசாமி இயக்கத்தில் சிவகார்த்திகேயன், சாய் பல்லவி உள்ளிட்ட பலர் நடித்த படம் 'அமரன்'. இத்திரைப்படம் கடந்த தீபாவளி பண்டிகையன்று உலகம் முழுவதும் வெளியானது. மறைந்த முன்னாள ராணுவ வீரர் மேஜர் முகுந்த் வரதராஜனின் வாழ்க்கை வரலாற்றை தழுவி உருவாக்கப்பட்ட ’அமரன்’ திரைப்படத்திற்கு ஜி.வி.பிரகாஷ் இசையமைத்திருந்தார்.
அமரன் படத்தில் முகுந்த வரதராஜனின் காதல் வாழ்க்கை குறித்தும், ராணுவத்தில் அவர் சந்தித்த சவால்களை அடிப்படையாக கொண்டு உருவாக்கப்பட்டது. இப்படம் வெளியாகி மிகப் பெரிய வெற்றியை பெற்றது. சிவகார்த்திகேயன் மற்றும் சாய் பல்லவி இருவரின் நடிப்பும், ஜிவி பிரகாஷ் குமாரின் இசையும் படத்தை வேறு தளத்திற்கு கொண்டு சென்றுவிட்டதாக படம் பார்த்த நாள் முதல் ரசிகர்கள் தெரிவித்து வருகின்றனர்.
இதுவரை உலகம் முழுவதும் ரூ.320 கோடி வரை வசூலித்து சிவகார்த்திகேயன் திரை வாழ்வில் மிகப் பெரிய வெற்றிப் படமாக அமைந்துள்ளது. இந்நிலையில் இப்படம் நேற்று (டிச.05) நெட்பிளிக்ஸ் ஓடிடி தளத்தில் வெளியாகியுள்ளது. அமரன் திரைப்படம் பாராட்டுக்களை குவித்து வருகிறது. ஓடிடியிலும் மிகப் பெரிய சாதனை படைக்கும் என்று எதிர்பார்க்கப்படுகிறது.
சார்: பிரபல நடிகர் போஸ் வெங்கட் கன்னிமாடம் திரைப்படம் மூலம் இயக்குநராக உருவெடுத்தார். பின்பு விமல் நடிப்பில் ’சார்’ என்ற படத்தை இயக்கியுள்ளார். கல்வியின் முக்கியத்துவம் பற்றி பேசிய சார் திரைப்படம் கடந்த அக்டோபர் 18ஆம் தேதி திரையரங்குகளில் வெளியானது. இந்நிலையில் இன்று (டிச.06) அமேசான் பிரைம் மற்றும் ஆஹா ஓடிடி தளத்தில் வெளியாகியுள்ளது. இந்த படத்தை இயக்குநர் வெற்றிமாறன் தயாரித்துள்ளார்.
இதையும் படிங்க: 'கெத்து தினேஷ்' முதல் 'லக்கி பாஸ்கர்' ஆண்டனி வரை... 2024ஆம் ஆண்டின் சிறந்த கதாபாத்திரங்கள்!
ஜிக்ரா: வாசன் பாலா இயக்கத்தில் ஆலியா பட், வேதாங் ரெய்னா உள்ளிட்ட பலர் நடித்த திரைப்படம் ’ஜிக்ரா’. ஆக்ஷன் டிராமா கதையாக உருவான ஜிக்ரா திரைப்படம் திரையரங்குகளில் வெளியாகி கலவையான விமர்சனங்களை பெற்றது. இந்நிலையில் இன்று நெட்ஃபிளிக்ஸ் ஓடிடி தளத்தில் ஜிக்ரா திரைப்படம் வெளியாகியுள்ளது.
