சென்னை: இயக்குநர் கார்த்திக் சுப்புராஜ் இயக்கத்தில் நடிகர் விஜய் சேதுபதி, ரம்யா நம்பீசன் நடித்து கடந்த 2012ஆம் ஆண்டு வெளியான திகில் படம் பீட்சா. குறும்பட இயக்குநராக இருந்த கார்த்திக் சுப்புராஜ் இயக்கிய இப்படம் மிகப் பெரிய வெற்றியை பெற்றது. வித்தியாசமான இந்தப் படம் த்ரில்லர் பட வரிசையில் பேசப்படும் படமாக மாறியது. அதனைத் தொடர்ந்து, பீட்சா 2 மற்றும் 3 வெளியாகி, ரசிகர்கள் மத்தியில் சுமாரான வரவேற்பை பெற்றது.
இதனைத் தொடர்ந்து, இப்படத்தின் நான்காம் பாகமான ‘பீட்சா 4’ படம் எடுக்கப்பட உள்ளதாக அறிவிப்பு வெளியாகி உள்ளது. இப்படத்தை K.A ஆண்ட்ரூஸ் இயக்குகிறார். எஸ். தங்கராஜின் தங்கம் சினிமாஸ் மற்றும் சி.வி. குமாரின் திருக்குமரன் எண்டர்டெயின்மென்ட் இணைந்து தயாரிக்கும் இத்திரைப்படத்தில் பிரபல நடிகர் நாசரின் மகனும், கடாரம் கொண்டான் மற்றும் சில நேரங்களில் சில மனிதர்கள் உள்ளிட்ட படங்களில் நடித்தவருமான அபி ஹாசன் முதன்மை வேடத்தில் நடிக்கிறார்.
தெலுங்கு பிக் பாஸ் புகழ் ரத்திகா நாயகியாக நடிக்கிறார். எல் கே ஜி, மூக்குத்தி அம்மன், கொரில்லா, களத்தில் சந்திப்போம், அயலி, சூது கவ்வும் 2, 'யங் மங் சங், ஃபிளாஷ்பேக், ரஜினிகாந்த் தற்போது நடித்து வரும் வேட்டையன் உள்ளிட்ட படங்களில் இணை மற்றும் துணை இயக்குநராக பணியாற்றியுள்ள K.A ஆண்ட்ரூஸ், பீட்சா 4 திரைப்படத்தை இயக்குவது குறித்து மகிழ்ச்சி தெரிவித்துள்ளார்.
மேலும் பேசிய அவர், “எத்தனையோ திறமையான இயக்குநர்களையும் இதர கலைஞர்களையும் உலகுக்கு அடையாளம் காட்டியுள்ள தயாரிப்பாளர் சி.வி. குமாரின் திருக்குமரன் என்டெர்டெயின்மென்ட் நிறுவனம் மற்றும் தங்கம் சினிமாஸ் தயாரிப்பில், பீட்சா வெற்றி வரிசையின் நான்காம் பாகத்தை இயக்குவது மிகவும் பெருமையாக உள்ளது. முதல் பாகத்திற்கும், நான்காம் பாகத்திற்கும் நேரடி தொடர்பு இருக்கும். அது என்ன என்பது சஸ்பென்ஸ்.
ராட்சசன், மார்க் ஆண்டனி உள்ளிட்ட படங்களின் திரைக்கதையில் பணியாற்றிய எஸ்.ஜே. அர்ஜுன் இப்படத்தின் கதை மற்றும் திரைக்கதையை எழுதியுள்ளார். வலுவான குழு இப்படத்திற்காக இணைந்துள்ளது. திரில் மற்றும் திகில் கலந்து ரசிகர்களை பரபரப்பின் உச்சிக்கே கொண்டு செல்லும் வகையில் ‘பீட்சா 4’ அமையும்” என்று தெரிவித்தார். இப்படத்தின் ஒளிப்பதிவாளர் பணியை ஸ்ரீராம் மேற்கொண்டுள்ளார். இப்படமும் வெற்றி பெறும் என்று எதிர்பார்க்கப்படுகிறது.
இதையும் படிங்க: கங்குவா பர்ஸ்ட் சிங்கிள் எப்போது ரிலீஸ்? - தயாரிப்பாளர் தனஞ்செயன் விளக்கம்! - Kanguva First Single Release Date
