சென்னை: ரஜினிகாந்த் நடித்து வரும் கூலி திரைப்படம் அடுத்த ஆண்டு மே 1ஆம் தேதி வெளியாகவுள்ளதாக தகவல் வெளியாகியுள்ளது. சன் பிக்சர்ஸ் தயாரிப்பில் லோகேஷ் கனகராஜ் இயக்கத்தில் ரஜினிகாந்த், நாகார்ஜுனா, உபேந்திரா, சத்யராஜ், சௌபின், ஸ்ருதிஹாசன் உள்ளிட்ட பலர் நடித்து வரும் திரைப்படம் ’கூலி’. இப்படத்திற்கு அனிருத் இசையமைத்து வருகிறார்.
இப்படத்தின் படப்பிடிப்பு கடந்த சில மாதங்களாக நடைபெற்று வரும் நிலையில், சமீபத்தில் ரஜினிகாந்திற்கு உடல்நலம் பாதிக்கப்பட்டது. அப்போது மற்ற நடிகர்கள் சம்பந்தப்பட்ட காட்சிகள் படமாக்கப்பட்ட நிலையில், ரஜினிகாந்த் உடல் நலம் பெற்று மீண்டும் கூலி படப்பிடிப்பில் இணைந்தார். தற்போது கூலி படத்தின் படப்பிடிப்பு சென்னையில் நடைபெற்று வருகிறது. கூலி படத்தின் ப்ரோமோ மூலம் இப்படம் தங்கம் கடத்தல் தொடர்பான கதை என தெரிகிறது.
மேலும் இப்படத்தில் அமீர் கான் கெஸ்ட் ரோலில் நடித்துள்ளதாகவும் கூறப்படுகிறது. கூலி திரைப்படம் அடுத்த ஆண்டு தொடக்கத்தில் வெளியாகும் என கூறப்பட்ட நிலையில், தற்போது அடுத்த ஆண்டு மே 1ஆம் தேதி வெளியாகும் என கோலிவுட் வட்டாரத்தில் பேசப்படுகிறது.
இதையும் படிங்க: ”தளபதி 69 படத்தில் நடிக்க வாய்ப்பு வந்தது”... கன்னட சூப்பர்ஸ்டார் கொடுத்த மாஸ் அப்டேட்!
ஏற்கனவே ஆதிக் ரவிச்சந்திரன் இயக்கத்தில் அஜித்குமார் நடித்து வரும் ’குட் பேட் அக்லி’ திரைப்படமும் மே 1ஆம் தேதி அஜித் பிறந்தநாளுக்கு வெளியாகும் என கூறப்படுகிறது. இந்நிலையில் ரஜினி, அஜித் படங்கள் ஒரே நாளில் வெளியாகவுள்ளதாக வரும் தகவலால் ரசிகர்கள் மிகுந்த எதிர்பார்ப்பில் உள்ளனர். முன்னதாக கடந்த 2019ஆம் ஆண்டு பொங்கல் பண்டிகைக்கு ஜனவரி 10ஆம் தேதி பேட்ட, விஸ்வாசம் ஆகிய படங்கள் ஒரே நாளில் வெளியானது குறிப்பிடத்தக்கது.
ஈடிவி பாரத் வாட்ஸ்அப் சேனலில் இணைய இங்கே கிளிக் செய்யவும்
