சென்னை: ராஜ்கமல் பிலிம்ஸ் இன்டர்நேஷனல் தயாரிப்பில், மறைந்த மேஜர் முகுந்த் வரதராஜனின் வாழ்க்கையைத் தழுவி உருவான அமரன் திரைப்படம், நேற்று முன்தினம் தீபாவளி அன்று திரையரங்குகளில் வெளியானது. இந்தப் படம் ரங்கூன் திரைப்படத்தை இயக்கிய ராஜ்குமார் பெரியசாமி இயக்கத்தில், நடிகர் சிவகார்த்திகேயன் மற்றும் நடிகை சாய்பல்லவி இணைந்து நடித்துள்ளார்.
அமரன் திரைப்படம்: இது வாழ்க்கை வரலாறு படம் என்பதால், முகுந்த் வரதராஜனாக சிவகார்த்திகேயனும், முகுந்த் வரதராஜன் மனைவி இந்து ரபெக்கா வர்கீஸாக சாய்பல்லவியும் நடித்துள்ளனர். ஜிவி பிரகாஷ் இந்த படத்திற்கு இசையமைத்துள்ளார். தமிழ், தெலுங்கு, மலையாளம், கன்னடம், இந்தி ஆகிய மொழிகளில் இப்படம் உலகம் முழுவதும் தீபாவளி பண்டிகையை ஒட்டி நேற்று வெளியானது. உலகம் முழுவதும் கிட்டத்தட்ட 800க்கும் மேற்பட்ட திரைப்படங்களில் அமரன் திரைப்படம் ரிலீஸ் செய்யப்பட்டதாக கூறப்படுகிறது.
#Superstar @rajinikanth தனது நண்பர் கமல்ஹாசன் தயாரிப்பில் சிவகார்த்திகேயன் நடிப்பில் ராஜ்குமார் பெரியசாமி இயக்கத்தில் வெளியான ‘அமரன்’ படத்தைப் பார்த்து மகிழ்ந்தார்.
— Raaj Kamal Films International (@RKFI) November 2, 2024
நேற்று தனது நண்பர் கமல்ஹாசன் அவர்களை தொலைபேசியில் அழைத்த சூப்பர் ஸ்டார் இந்தப் படத்தைத் தயாரித்ததற்காக மனமார்ந்த… pic.twitter.com/bPurzyxDxj
இதையும் படிங்க: சிவகார்த்திகேயனின் பாக்ஸ் ஆபிஸ் வேட்டை.. ஒரே நாளில் ரூ.50 கோடியை நெருங்கிய வசூல்!
ரசிகர்களை ஈர்க்கும் அமரன்: இந்தப் படம் வெளியாகி ரசிகர்கள் மத்தியில் மிகுந்த வரவேற்பைப் பெற்று வருகிறது. சிவகார்த்திகேயன் மற்றும் சாய் பல்லவி இருவரின் அபரிமிதமான நடிப்பு அனைவராலும் பாராட்டப்பட்டு வருகிறது. ஜிவி பிரகாஷ் குமாரின் பாடல்களும், பின்னணி இசையும் கதையை ரசிகர்களுடன் இணைப்பதாக படம் பார்த்தவர்கள் கூறுகின்றனர். இந்த படத்தில், சிவகார்த்திகேயன் ஆக்ஷன் ஹீரோவாக மக்கள் மனதில் இடம் பிடிக்கும் வகையில் நடிப்பை வெளிப்படுத்தி இருப்பதாக ரசிகர்கள் கூறுகின்றனர்.
ரஜினி வாழ்த்து: இந்நிலையில், தமிழ் சினிமாவின் சூப்பர் ஸ்டாராக வலம் வரும் ரஜினிகாந்த், நேற்று அமரன் திரைப்படத்தை பார்த்துள்ளார். பின், இந்த படத்தின் தயாரிப்பாளாரான கமல்ஹாசனை அலைபேசியில் தொடர்பு கொண்டு, படக்குழுவுக்கு வாழ்த்துகள் தெரிவித்துள்ளார். அதோடு, இன்று அமரன் படத்தின் கதாநாயகன் சிவகார்த்திகேயன், இயக்குநர் ராஜ்குமார் பெரியசாமி, தயாரிப்பாளர் ஆர்.மகேந்திரன், ஒளிப்பதிவாளர் சாய் உள்ளிட்ட அமரன் படக்குழுவினரை ரஜனிகாந்த் நேரில் சந்தித்து தனது பாராட்டுகளையும், வாழ்த்துகளையும் தெரிவித்துள்ளார்.
ஈடிவி பாரத் தமிழ்நாடு வாட்ஸ்ஆப் சேனலில் இணைய இங்கே க்ளிக் செய்யவும்
