சென்னை: சத்யஜோதி பிலிம்ஸ் டி.ஜி.தியாகராஜன் தயாரிப்பில், இயக்குநர் ரவி அரசு இயக்கத்தில் கன்னட திரையுலகின் சூப்பர் ஸ்டாராக திகழும் சிவராஜ்குமார் தமிழில் முதன்முறையாக கதாநாயகனாக அறிமுகமாகும் படம் 'ஜாவா'.
மாநில எல்லைகளைக் கடந்து அனைத்து ரசிகர்களை கவரும் நடிகர்களுள் சிவராஜ்குமாரும் ஒருவர். பல ஆண்டுகளாக, தமிழ் ரசிகர்களிடமிருந்து மிகுந்த அன்பையும் வரவேற்பையும் பெற்று வருகிறார். மேலும், அவரது கன்னட திரைப்படங்கள் தமிழ் ரசிகர்கள் மத்தியில் நல்ல வரவேற்பைப் பெற்று வருகிறது. கடந்த ஆண்டு வெளியான சூப்பர் ஸ்டார் ரஜினிகாந்த் நடித்திருந்த 'ஜெயிலர்' படத்தில் ஒருசில காட்சிகள் மட்டுமே வந்திருந்தார்.
இருப்பினும், அவரது மாஸான நடிப்பு மற்றும் ஸ்டைலால் ரசிகர்களால் கொண்டாடப்பட்டார். அதேபோல், தனுஷ் நடிப்பில் வெளியான 'கேப்டன் மில்லர்' படத்திலும் நடித்திருந்தார். இவரது நடிப்பில் 2017ஆம் ஆண்டு வெளியான முஃப்தி (Mufti) படம் தான் தமிழில் சிலம்பரசன் நடிப்பில் 'பத்து தல' படமாக மறு உருவாக்கம் செய்யப்பட்டது குறிப்பிடத்தக்கது.
'ஜாவா' படத்தின் மூலம் தமிழில் நேரடியாக கதாநாயகனாக அறிமுகமாக உள்ளார். இப்படம் தமிழ் மற்றும் கன்னடம் என இரு மொழிகளிலும் உருவாக உள்ளது. சத்யஜோதி பிலிம்ஸ் டி.ஜி.தியாகராஜன் வழங்கும் இப்படத்தை செந்தில் தியாகராஜன் மற்றும் அர்ஜுன் தியாகராஜன் ஆகியோர் தயாரிக்கின்றனர்.
Here it is ! #Shivanna130 is #JAWA 🧨🔥@NimmaShivanna @dir_raviarasu @charanrajmr2701 pic.twitter.com/eyuQINSCgj
— Sathya Jyothi Films (@SathyaJyothi) July 12, 2024
முன்னதாக, நடிகர் அதர்வா கதாநா யகனாக நடித்த 'ஈட்டி' மற்றும் ஜிவி பிரகாஷ் நடிப்பில் வெளியான 'ஐங்கரன்'ஆகிய படங்களை இயக்கிய ரவி அரசுவின் மூன்றாவது இப்படத்தை இயக்குகிறார். இதுகுறித்து அவர் கூறுகையில், "உலகம் முழுவதும் கோடிக்கணக்கான ரசிகர்களை கொண்ட சிவராஜ்குமார் போன்ற ஒரு நட்சத்திரத்தை இயக்குவது எனக்கு கிடைத்த பெருமை.
இப்படத்தை ஒரு ஆக்ஷன் என்டர்டெய்னர் படமாக உருவாக்குகிறோம். அவரது ரசிகர்களை 100 சதவீதம் திருப்திப்படுத்தும். அதே நேரத்தில், தமிழ் பார்வையாளர்களை ஆரம்பம் முதல் இறுதி வரை ஈர்க்கும். செப்டம்பரில் படத்தின் படப்பிடிப்பை தொடங்க திட்டமிட்டுள்ளோம். இந்த படத்தில் ஜாவா பைக்கிற்கு ஒரு முக்கிய பங்கு உண்டு. அடுத்த வாரம் படத்தின் கிளிம்ப்ஸ் காட்சிகளை படமாக்க உள்ளோம்" என தெரிவித்தார்.
கன்னட சூப்பர் ஸ்டார் சிவராஜ் குமார் இந்த படத்தில் போலீஸ் கதாபாத்திரத்தில் நடிப்பதாகவும், நடிகர் சமுத்திரக்கனி முக்கிய கதாபாத்திரத்தில் நடிக்க உள்ளதாகவும் படக்குழுவினர் தெரிவித்துள்ளனர். முன்னதாக, அவரது பிறந்தநாளை முன்னிட்டு (ஜூலை 12) படக்குழுவினர் படத்தில் டைட்டில் லுக்கை வெளியிட்டனர்.
இதையும் படிங்க: 'இந்தியன் 2' படத்தில் 15 நிமிட காட்சிகள் நீக்கம்.. பின்னணி என்ன?
