சென்னை: இயக்குநர் ஹரி, தமிழ் சினிமாவில் வேகமான திரைக்கதை கொண்ட திரைப்படம் எடுப்பதில் பெயர் பெற்றவர். இவரது படங்கள் எல்லாமே பரபரப்புக்கு பஞ்சமில்லாமல் இருக்கும். ஆறு, வேல், சிங்கம் என இவரது படங்கள் ரசிகர்கள் மத்தியில் பெரும் வரவேற்பைப் பெற்றது.
ஹரி இயக்கத்தில் தாமிரபரணி மற்றும் பூஜை ஆகிய ஹிட் படங்களில் நடித்த விஷால், மீண்டும் அவருடன் இணைந்து நடித்து வரும் படம் ரத்னம். இப்படத்தை ஸ்டோன்பெஞ்ச் ஃபிலிம்ஸ் கார்த்திகேயன் சந்தானம் மற்றும் ஜீ ஸ்டுடியோஸ் சவுத் இணைந்து தயாரித்துள்ளனர். இன்வீனியோ ஆரிஜனின் அலங்கார் பாண்டியன் மற்றும் கல்யாண் சுப்பிரமணியம் இப்படத்தின் இணைந்து தயாரித்துள்ளனர்.
விஷால் படத்திற்கு முதல் முறையாக தேவி ஸ்ரீ பிரசாத் இசையமைத்துள்ளார். தாமிரபரணி மற்றும் பூஜை படங்களைப் போன்று இப்படமும் ஆக்ஷன் கலந்த குடும்ப சென்டிமென்ட் படமாக இருக்கும் என்று எதிர்பார்க்கப்படுகிறது. தேவி ஸ்ரீ பிரசாத் இசையில் வெளியான புஷ்பா படத்தில் இடம்பெற்ற அனைத்து பாடல்களும் மிகப்பெரிய வெற்றியைப் பெற்றது.
அதேபோல், இந்த படத்தில் உள்ள பாடல்களும் வெற்றி பெறும் என ரசிகர்கள் எதிர்பார்ப்பில் உள்ளனர். ரத்னம் படத்திற்கு சுகுமார் ஒளிப்பதிவு செய்கிறார். இந்த படத்தில் நடிகை பிரியா பவானி சங்கர், சமுத்திரக்கனி, கௌதம் வாசுதேவ் மேனன் ஆகியோர் முக்கிய கதாபாத்திரத்தில் நடித்துள்ளனர்.
ஏற்கனவே ஹரி மற்றும் விஷாலின் கூட்டணி ஹிட்டானதால், இந்த படத்திற்கும் ரசிகர்கள் மத்தியில் எதிர்பார்ப்பு அதிகரித்துள்ளது. இப்படத்தின் முதல் சிங்கிள் 'டோண்ட் ஒரி' என்ற பாடல் கடந்த சில நாட்களுக்கு முன் வெளியான நிலையில், ரத்னம் படத்தின் இரண்டாவது பாடலான 'எதனால' என்ற பாட்டு நாளை வெளியாக உள்ளதாக படக்குழு அறிவித்துள்ளது.
இதையும் படிங்க: சித்தார்த் - அதிதி ராவ் ரகசிய திருமணம்? தெலங்கானாவில் வைத்து திருமணம் எனத் தகவல்! - Siddharth Aditi Rao Marriage
