சென்னை: அரங்கத்தை தன் வசப்படுத்தும் குத்து பாடல்கள் முதல் மெலடி பாடல்கள் வரை 2k கிட்ஸ் இசை நாயகனாக வலம் வருபவர் அனிருத். இவரது தந்தையும், லதா ரஜினிகாந்தின் சகோதரருமான ரவி ராகவேந்தர் பல்வேறு திரைப்படங்களில் நடித்துள்ளார்.
சினிமாத்துறை பின்னணி கொண்ட குடும்பத்தில் பிறந்த அனிருத், இளம் வயதிலேயே இசையில் ஆர்வம் கொண்டிருந்தார். சவுண்ட் இன்ஜினியரிங் மற்றும் கர்நாடக இசையை முறைப்படி கற்றுத் தேர்ந்தார். அவரது திறமையை முதலில் கண்டறிந்தவர் தனுஷ். இதனையடுத்து அனிருத்திற்கு '3' படம் மூலம் ஐஸ்வர்யா ரஜினிகாந்த் முதல் பட வாய்ப்பு வழங்கினார்.
முதலில் உறவினர் என்ற முறையில் வாய்ப்பு கிடைத்ததாக பார்க்கப்பட்டது. ஆனால் 'ஒய் திஸ் கொலவெறி' (why this kolaveri) பாடல் அந்த பார்வையை முற்றிலும் நீக்கியது. இந்த பாடல் படக்குழுவே எதிர்பார்க்காத அளவிற்கு உலக அளவில் ஹிட்டானது. 3 படத்தின் பின்னணி இசை ஒரு அனுபவம் வாய்ந்த இசைக்கலைஞரின் இசையமைத்தது போன்ற உணர்வு அளிக்கும். இதனைத்தொடர்ந்து அனிருத் டேவிட், எதிர்நீச்சல், வணக்கம் சென்னை என வரிசையாக பல்வேறு ஹிட் ஆல்பங்களை வழங்கி கவனம் பெற்றார்.
இதனைத்தொடர்ந்து வேலையில்லா பட்டதாரி(VIP), கத்தி ஆகிய படங்கள் அனிருத்தை அடுத்த கட்டத்திற்கு எடுத்து சென்றது என கூறலாம். VIP, கத்தி ஆகிய படங்களில் இவரது பின்னணி இசை மற்றும் பாடல்கள் இன்றளவும் இன்ஸ்டாகிராம் ரீல்ஸ்களில் பயன்படுத்தப்பட்டு வருகிறது.
ரஜினி, விஜய், கமல், அஜித் ஆகியோரது படங்களில் அவர்களது நட்சத்திர பிம்பத்திற்கு ஈடு கொடுக்கும் வகையில் பின்னணி இசையை அந்தந்த படங்களின் சூழலுக்கு ஏற்ப உருவாக்கி அசத்துவார். ஜெயிலர் வெற்றி விழாவில் ரஜினி, ’சுமாரான படத்தை அடுத்தக் கட்டத்திற்கு எடுத்துச் சென்றது அனிருத் இசை தான்’ என வெளிப்படையாக கூறி இருந்தார்.
குறிப்பாக தனுஷ் நட்சத்திர அந்தஸ்துடன் மாஸ் ஹீரோவாக உயர விஐபி, மாரி ஆகிய ஆல்பங்கள் முக்கிய காரணமாக அமைந்தது. அனிருத் இந்திய அளவில் மிகப்பெரிய இசையமைப்பாளராக வலம் வருவார் என தனுஷ் ஆரம்பத்திலேயே கணித்ததாக இயக்குநர் வெற்றிமாறன் கூறியுள்ளார்.
அதுமட்டுமின்றி சிவகார்த்திகேயன் திரை வாழ்வின் வளர்ச்சிக்கு அனிருத் இசை ஆரம்ப காலகட்டம் முதல் முக்கிய பங்காற்றியுள்ளது. எஸ்கே, அனிருத் காம்போவில் எதிர்நீச்சல், காக்கி சட்டை, ரொமோ, வேலைக்காரன், டாக்டர் என பல ஆல்பங்கள் மாபெரும் வெற்றி பெற்றது.
மேலும் ஆரம்ப காலக்கட்டத்தில் அனிருத் இசையமைத்த எனக்கென யாரும் இல்லையே, அவளுக்கென, சென்னை சான்ஸே இல்ல ஆகிய சுயாதின ஆல்பங்களும் ரசிகர்களை கவர்ந்தது. தமிழ் சினிமாவின் சீனியர் இயக்குநர்கள் செல்வராகவன், ஏ.ஆர். முருகதாஸ், ஷங்கர் ஆகியோரது படங்களில் பணியாற்றியது மட்டுமின்றி தற்போது உச்சத்தில் இருக்கும் லோகேஷ் கனகராஜ், நெல்சன் திலீப்குமார் ஆகியோருடன் ஆரம்பம் முதல் பயணித்து வருகிறார்.
விக்னேஷ் சிவன், துரை செந்தில்குமார் போன்ற இயக்குநர்களின் ஆரம்ப காலகட்டம் முதல் அவர்களது படங்கள் வெற்றி பெற அனிருத் இசை முக்கிய காரணமாக இருந்து வருகிறது. குறிப்பாக அனிருத் லோகேஷ் கனகராஜ், நெல்சன், விக்னேஷ் சிவன் ஆகியோருடனான கூட்டணி பந்தயம் அடிக்கும் என்ற சொல்லுக்கு ஏற்ப கண்டிப்பாக ஹிட்டாகும். தமிழ் தவிர்த்து அனிருத் ஜெர்ஸி (jersey) திரைப்படம் மூலம் தெலுங்கு சினிமா ரசிகர்களை கவர்ந்தார். அப்படத்தில் மகிழ்ச்சி, துன்பம், கோபம் என அனைத்து விதமான உணர்ச்சிகளையும் தன் இசை மூலம் கடத்தி இருப்பார்.
இதையும் படிங்க: Citadel: Honey Bunny ட்ரெய்லர் வெளியானது.. அதிரடி ஆக்சனில் கலக்கும் சமந்தா!
அதன் பிறகு கேங் லீடர், ஜவான், தேவரா என பல படங்களுக்கு இசையமைத்து இன்று தேசிய அளவில் தற்போது தவிர்க்க முடியாத இசையமைப்பாளராக வலம் வருகிறார். தற்போது LIK, ரஜினியின் கூலி, தளபதி 69, விடாமுயற்சி, ஷாருக்கானின் 'கிங்' என அடுத்த சில வருடங்களுக்கு 50 பாடல்களுக்கு மேல் இசையமைக்கவுள்ளார். குறுகிய காலத்தில் பெரும் சாதனைகளை படைத்து உச்சத்தில் இருக்கும் அனிருத்திற்கு பிறந்தநாள் வாழ்த்துக்கள்.
ஈடிவி பாரத் வாட்ஸ்அப் சேனலில் இணைய இங்கே கிளிக் செய்யவும்
