70 நாட்கள் பிராஸ்தடிக் மேக்கப்.. 4 நாட்கள் ரோப்பில் தொங்கிய கமல்.. 'இந்தியன் 2' உருவானது குறித்து ஷங்கர் பெருமிதம்! - Indian 2 Trailer Release

Shankar talk about Kamal acting in Indian 2: இந்தியன் 2 திரைப்படத்தில் கமல் செய்ததை யாராலும் செய்ய இயலாது எனவும், முதல் முதலாக இந்தியன் தாத்தா தோற்றத்தில் கமலை பார்க்கும் போது இருந்த அதே சிலிர்ப்பு இப்போதும் இருந்தது எனவும் இயக்குநர் ஷங்கர் தெரிவித்தார்.

சென்னை: இயக்குநர் ஷங்கரின் பிரமாண்ட இயக்கத்தில், கமல்ஹாசன் நடிப்பில் உருவாகியுள்ள திரைப்படம் 'இந்தியன் 2' (Indian 2). இப்படத்திற்கான, ட்ரெய்லர் வெளியீட்டு விழா இன்று சென்னையில் நடைபெற்றது. இந்த விழாவில், நடிகர் கமல்ஹாசன், இயக்குநர் ஷங்கர், இசையமைப்பாளர் அனிருத், பாபி சிம்ஹா, சித்தார்த் உள்ளிட்ட பலர் கலந்து கொண்டனர்.

அப்போது மேடையில் நடிகர் சித்தார்த், "20 வருடங்களுக்கு முன்னர் சினிமாவில் நடிக்க எனக்கு ஒரு வாய்ப்பு கொடுத்த இயக்குநர் ஷங்கருக்கு மிகப்பெரிய நன்றி. மீண்டும், 21 வருடம் கழித்து இன்று கமலுடன் நடிக்க வாய்ப்புக் கொடுத்திருக்கிறார். அதற்கும் நன்றியைத் தெரிவித்துக் கொள்கிறேன். கடந்த 7 வருடங்களில் நான் நடித்த படங்களில், கதாபாத்திரம் தேடுவதை எஞ்சாய் செய்து தேடினேன்.

சிறு வயதிலிருந்தே கமலின் தீவிர ரசிகன். கமல் இல்லை என்றால் நான் ஒரு நடிகனாக இல்லை. ஏனென்றால் கமல் எனக்கு அவ்வளவு பிடிக்கும். அதேபோல, ஷங்கருக்கும் கமலை பிடிக்கும். இந்த காலகட்டத்தில் ஒருவன் திரும்ப வந்த எப்படி இருக்குமோ? அப்படிதான் இந்தியன் 2. தாத்தா திரும்ப வராரு குறிச்சு வச்சுக்கோ.. நான் மிகவும் காதலித்து நடித்த படம் இது" என்றார்.

இசையமைப்பாளர் அனிருத் பேசிய போது, "இந்த ட்ரெய்லரைப் பார்க்கும் போது ஸ்பெஷலாக இருந்தது. படக்குழுவினர் அனைவரும் அவ்வளவு கடின உழைப்பைக் கொடுத்துள்ளனர். இப்படி நான் பார்த்ததே இல்லை. ஸ்டூடியோவில் பார்த்த ட்ரெய்லரை பெரிய திரையில் பார்க்கும் போது இன்னும் நன்றாக இருக்கிறது" எனத் தெரிவித்தார்.

இயக்குநர் ஷங்கர் கூறியதாவது,"இந்தியன் தாத்தா தமிழ்நாட்டில் நடப்பது போன்று இருந்தது. ஆனால், இந்தியம் 2 மற்ற மாநிலங்களுக்கும் விரிந்து இருக்கிறது. படம் முடியும் பொழுது ஒவ்வொருவரையும் யோசிக்க வைக்கும் என்று நம்புகிறேன்.

கமல் சூட்டிங் ஆரம்பிக்கிறதுக்கு முன்பே வந்துவிடுவார், மீண்டும் படப்பிடிப்பு முடிந்து அனைவரும் சென்ற பிறகு கடைசியாகத் தான் செல்வார். ஏனென்றால் அந்த அளவிற்கு அவரது உழைப்பு உள்ளது. மேலும், அவரது மேக்கப்பை கலைக்கவும் 1 மணி நேரம் ஆகும். அட்வான்ஸ்டு மேக்கப் போடப்பட்டுள்ளதால், இந்தியன் படத்தைவிட, இந்தியன் 2 படத்தில் கமலை அதிகம் தெளிவாகப் பார்க்க முடியும்.

மொத்தம் கமல் 70 நாட்கள் நடித்தார். முதல் பாகத்தில், 40 நாட்கள் பிராஸ்தடிக் மேக்கப் உடன் நடித்தார். அதுமட்டுமின்றி, 4 நாட்கள் ரோப்பில் தொங்கிக் கொண்டே நடித்தார். இதை யாராலும் செய்ய இயலாது. கமலை முதல் முதலாக இந்தியன் தாத்தா தோற்றத்தில் பார்க்கும் போது இருந்த அதே சிலிர்ப்பு இப்போதும் இருந்தது" எனத் தெரிவித்தார்.

அதனைத் தொடர்ந்து பேசிய கமல்ஹாசன், "உயிரே உலகே தமிழே எனத் துவங்கிய கமல், விவேக், மனோபாலா போன்றவர்கள் இன்று நம்மோடு இல்லை. அவர்கள் எல்லாம் தற்போது உடனிருந்திருக்க வேண்டும். நான் என்ன எதிர் பார்த்தேனோ அதை விடச் சிறப்பாக இசை அமைக்கப்பட்டுள்ளது. அதற்காக அனிருத்துக்கு நன்றியை தெரிவித்துக் கொள்கிறேன்.

விவேக்கைப் பார்த்து எவ்வளவு வருடங்கள் ஆகிவிட்டது. இதில் அவர் சிறப்பாக நடித்துள்ளார். அனைவருக்கும் பிடிக்கும். இந்தியன் படத்திற்கு அனைவரும் ஒத்துழைப்பு கொடுத்தீர்கள், அதே போன்று இந்தியன் 2-க்கும் ஒத்துழைப்பு கொடுத்து வெற்றி பெற வைக்க வேண்டும்" என்றார்.

அதைத் தொடர்ந்து, இந்தியன் 3 இந்தியன் 4 எப்போது? என்ற கேள்விக்குப் பதிலளித்த கமல், நீங்கள் சொல்லும் போதே பதறுகிறது. இத்தனை வருடங்கள் கழித்து வருவதற்கு நாங்கள் காரணம் இல்லை. இயற்கை தான் காரணம் என்றார்.

மேலும், இத்தனை வருடங்கள் கடந்தும் ஊழல் ஒழியவில்லை இதற்கு அரசியல்வாதிகள் தான் காரணமா? என்ற கேள்விக்கு, நம்மை மறந்துவிட்டீர்கள் நாமும் தான் காரணம்" எனத் தெரிவித்தார்.