சென்னை: இயக்குநர் சிவா இயக்கத்தில் சூர்யா இரட்டை கதாபாத்திரத்தில் பிரமாண்டமான முறையில் உருவாகியுள்ள கங்குவா திரைப்படம் வரும் நவம்பர் 14ஆம் தேதி வெளியாகவுள்ளது. கங்குவா திரைப்படகுழு இந்தியா முழுவதும் தீவிர புரமோஷனில் ஈடுபட்டு வருகிறது. இந்நிலையில் கங்குவா திரைப்பட ஒளிப்பதிவாளர் வெற்றி நமது ஈடிவி பாரத் செய்தியாளருக்கு அளித்த நேர்காணலில் கங்குவா திரைப்படத்தில் பணியாற்றிய அனுபவங்களை நம்மிடம் பகிர்ந்து கொண்டார்.
ஒளிப்பதிவாளர் வெற்றி பேசுகையில், “நானும் இயக்குநர் சிவாவும் ஃபிலிம் இன்ஸ்டியூட் படிக்கும் போதிலிருந்து நண்பர்கள். அவர் இயக்கத்தின் மீது ஆர்வம் கொண்டு படங்கள் இயக்கினார். நான் பல படங்களுக்கு ஒளிப்பதிவு செய்து வந்தேன். ஆரம்பத்தில் சிவாவுடன் தெலுங்கில் சில படங்களுக்கு ஒளிப்பதிவு செய்தேன். பிறகு தமிழில் காஞ்சனா, சிவா இயக்கத்தில் அஜித் நடித்த வீரம், வேதாளம், விவேகம், விஸ்வாசம் ஆகிய படங்களில் பணியாற்றினேன். அது தற்போது கங்குவா வரை தொடர்கிறது” என்றார்
கங்குவா திரைப்படத்தின் கதை எப்படி உருவானது என்ற கேள்விக்கு, ”கங்குவா கதை உருவாக அஜித் ஒரு முக்கிய காரணம். அவருக்கு சிவா மீது நல்ல மரியாதையும், அவரது சினிமா அறிவு மீது மிகுந்த நம்பிக்கையும் உள்ளது. சிவா பண்ண வேண்டிய படங்கள் இன்னும் பெரிதாக இருக்க வேண்டும் எனவும், உங்களை சுருக்கிக் கொள்ளாதீர்கள், புதிய ஜானர்களை முயற்சி செய்யுங்கள் எனவும் அஜித் கூறிக் கொண்டே இருப்பார். அங்கிருந்து தொடங்கியது தான் கங்குவா. சிவா நிறைய கமர்ஷியல் வெற்றிப் படங்களை கொடுத்துள்ளார். ஆனால் சிவா கங்குவா கதையை சொல்லும் போது எனக்கு வியப்பாக இருந்தது. ஆனால் இது அஜித்துக்கு எழுதப்பட்ட கதை இல்லை” என கூறினார்.
இதனைத்தொடர்ந்து கங்குவா திரைப்படத்தின் மேக்கிங் குறித்து பேசிய ஒளிப்பதிவாளர் வெற்றி, “இதுவரை வந்த படங்களை போல் இல்லாமல் புதிதாக எடுக்க வேண்டும் என்று முடிவு செய்தோம். இப்படத்தில் கிராஃபிக்ஸ் காட்சிகள் முக்கிய பங்காற்றியது. கிராஃபிக்ஸ் காட்சிகளுக்காக வெளிநாடுகளுக்கு செல்லாமல் தமிழில் ஏற்கனவே எங்களுடன் வேலை செய்த நிறுவனத்தையே பயன்படுத்தினோம். இப்படத்தில் எது கிராஃபிக்ஸ் காட்சிகள் என்றே தெரியாத அளவிற்கு நன்றாக செய்துள்ளனர்” என்றார்
கங்குவா கதை குறித்து பேசுகையில், “கங்குவா முழுவதும் கற்பனை கதை. இது நூற்றாண்டுகளுக்கு முன் நடக்கும் பழங்குடி மக்களின் கதை என்றாலும் அரண்மனைகள், கோட்டைகள் எதுவும் வராது. காடுகளில் நடக்கும் கதை என்பதால் இயற்கை ஒளியை பயன்படுத்தி இப்படத்தை உருவாக்க முடிவு செய்தோம். இயற்கை ஒளியில் படம் எடுக்கும் போது நிறைய சவால்கள் இருந்தது. அதற்காக நிறைய பயிற்சி எடுத்தோம். அதற்காக இயற்கையின் ஒத்துழைப்பும் இருந்ததால் நல்லபடியாக எடுக்க முடிந்தது. நெருப்பு பாடல் முழுக்க முழுக்க இரவில் எடுக்கப்பட்டுள்ளது. அப்பாடலை தீப்பந்தம் வைத்து எடுத்தோம்” என கூறினார்.
நடிகர் சூர்யாவின் நடிப்பு பற்றி கேட்ட போது, “சூர்யா நடிப்பு அசுரன் என்று சொல்லலாம். கங்குவா, ஃபிரான்சிஸ் என்று இரண்டு வேடங்களில் நடித்துள்ளார். இரண்டுக்கும் தொடர்பில்லாத நடிப்பை கொடுத்துள்ளார். ஃபிரான்சிஸ் ஜாலியான கதாபாத்திரம், கங்குவா ஒரு பழங்குடி இனத் தலைவன். அதற்கும் தன்னை கடுமையாக தயார் செய்தார். மேக்கப் போடவே மூன்று மணி நேரம் ஆகும். தினமும் ஒரு மணி நேரம் உடற்பயிற்சி செய்து உடலை வருத்தி நடித்தார். அந்த கதாபாத்திரத்திற்கு ஆயிரம் மடங்கு நியாயம் சேர்த்துள்ளார். இந்த படத்தை மிகப் பெரிய இடத்திற்கு சூர்யா கொண்டு சென்றுள்ளார் எனக் கூறியுள்ளார்.
மேலும் பேசுகையில், “இப்படத்தில் ஒரு சர்ப்ரைஸ் இருக்கு, அது என்ன என்பது இன்னும் சில தினங்களில் தெரிந்துவிடும். இப்போதே சொல்ல முடியாது. 3டியில் எடுக்க வேண்டும் என்பது ஆரம்பத்திலேயே முடிவு செய்த ஒன்று தான். நம் எல்லோரும் பெருமைப்படும் அளவிற்கு கங்குவா இருக்கும். பாகுபலி, கேஜிஃஎப் படங்களை கொண்டாடினோம். அதேபோல் தமிழில் முயற்சி செய்துள்ளோம். ஒரு தொழில்நுட்ப கலைஞராக எனக்கு முழு திருப்தியான படம் கங்குவா” என்றார்
கங்குவா படத்தில் நடித்த மற்ற நடிகர்கள் பற்றி பேசுகையில், “இப்படத்தில் கருணாஸ், நட்டி உள்ளிட்டோர் கதாபாத்திரம் மிகவும் நன்றாக வந்துள்ளது. போஸ் வெங்கட் கதாபாத்திரம் ரொம்ப தனித்துவமாக இருக்கும். யோகி பாபு, ரெடின் கிங்ஸ்லி இந்த காலத்தில் நடக்கும் கதையில் வருவார்கள். ஒவ்வொரு கதாபாத்திரங்களுக்கும் மெனக்கெடல் இருந்தது. அதுவும் படத்தில் உண்டு. கங்குவா காலகட்டம் இரண்டு மணி நேரம் இருக்கும். முதல் பாகம் முழுமையாக இருக்கும். இரண்டாம் பாகத்திற்கான லீட் இருக்கும்” என கூறியுள்ளார்.
இதையும் படிங்க: ஹொம்பாலே நிறுவனம் தயாரிப்பில் மூன்று பிரமாண்ட படங்களில் நடிக்கும் பிரபாஸ்!
கங்குவா படத்தின் பிரமாண்டம் குறித்து பேசிய ஒளிப்பதிவாளர் வெற்றி, “தயாரிப்பாளர் ஞானவேல் ராஜாவால் தான் கங்குவா சாத்தியமானது. அவர் ராஜமௌலியின் மிகப் பெரிய ரசிகர். பாகுபலி போல உலகளாவிய படத்தை தமிழில் எடுக்க வேண்டும் என்பதே அவரது ஆசை. ரசிகர்களை கொண்டு சேர்க்க மிகப் பெரிய உழைப்பை கொடுத்து வருகிறார். அவரில்லாமல் கங்குவா இல்லை. மேலும் இப்படத்தின் மிகப்பெரிய தூண் தேவி ஸ்ரீபிரசாத் தான். ஒவ்வொரு பாடலும் வித்தியாசமாக இருக்கும். தனது பின்னணி இசை மூலம் படத்தை வேறு தளத்திற்கு கொண்டு சென்றுவிட்டார்” என கூறியுள்ளார்.
ஈடிவி பாரத் வாட்ஸ்அப் சேனலில் இணைய இங்கே கிளிக் செய்யவும்
