சென்னை: 'மதகஜராஜா' திரைப்பட புரமோஷன் நிகழ்ச்சியில் நடிகர் விஷால் காய்ச்சலுடன் பங்கேற்றுள்ளார். ஜெமினி ஃபிலிம் சர்க்கியூட் தயாரிப்பில் சுந்தர்.சி இயக்கத்தில் விஷால், சந்தானம், வரலட்சுமி, அஞ்சலி உள்ளிட்ட பலர் நடித்து கடந்த 2012இல் உருவான திரைப்படம் ‘மதகஜராஜா’. 2013ஆம் ஆண்டு பொங்கலுக்கு வெளியாகும் என அறிவிக்கப்பட்ட மதகஜராஜா திரைப்படம் பல்வேறு காரணங்களால் தள்ளிப்போனது.
12 வருடங்களாக கிடப்பில் போடப்பட்ட மதகஜராஜா ஒரு வழியாக வரும் பொங்கல் பண்டிகைக்கு வெளியாகிறது. இந்நிலையில் மதகஜராஜா படத்தின் செய்தியாளர் சந்திப்பு நேற்று சென்னையில் நடைபெற்றது. இந்த விழாவில் சுந்தர்.சி, குஷ்பு, விஷால், இசையமைப்பாளர் விஜய் ஆண்டனி உள்ளிட்ட பலர் பங்கேற்றனர். மேலும் இந்த நிகழ்வில் நடிகர் விஷால் கடும் காய்ச்சலுடன் பங்கேற்றுள்ளார். அவர் மேடையில் காய்ச்சலுடன், மைக்கை பிடிக்க முடியாமல் கை நடுக்கத்துடன் பேசுவதை பார்த்து ரசிகர்கள் அதிர்ச்சி அடைந்தனர்.
இப்படத்தில் விஷால் my dear lover என்ற பாடலை பாடியுள்ளார். இப்பாடல் மேக்கிங் வீடியோ 12 வருடங்களுக்கு முன்பே சமூக வலைதளத்தில் ட்ரெண்டானது. இந்நிலையில் நேற்று மேடையில் விஷால், இயக்குநர் சுந்தர்.சி, விஜய் ஆண்டனி ஆகியோரை பாராட்டினார். இதனைத்தொடர்ந்து மேடையில் பேசிய இயக்குநர் சுந்தர்.சி, “நாங்கள் பொங்கல் வெளியீடு என அறிவித்தவுடன் எங்களுக்கு கிடைத்த வரவேற்பு ஆச்சர்யப்பட வைத்தது. இது பொங்கல் பண்டிகையை மனதில் வைத்து எடுக்கப்பட்ட திரைப்படம். இப்படம் 80களில் வெளியான முரட்டுக்காளை, போக்கிரி ராஜா போன்ற ஜனரங்சக படங்கள் போன்று இருக்கும்” என்றார்.
இந்நிலையில் விஷால் காய்ச்சலுடன் பங்கேற்ற வீடியோ இணையத்தில் ட்ரெண்டாகி வருகிறது. விஷால் விரைவில் குணமாக வேண்டும் என பலர் பதிவிட்டு வருகின்றனர். அதேபோல் இந்த காலத்தில் திரைப்பட ப்ரமோஷன்களுக்கு பல நடிகர்கள் வராத நிலையில், கடும் காய்ச்சலுடன் ப்ரமோஷனுக்கு நடிகர் விஷால் வந்துள்ளதாக பலர் சமூக வலைதளங்களில் பாராட்டி வருகின்றனர்.
இதையும் படிங்க: ”பிளாக் டிக்கெட்டில் ஷங்கர் படம் பார்த்தேன்” - ஆந்திர துணை முதல்வர் பவன் கல்யாண் பேச்சு - PAWAN KALYAN ABOUT GAME CHANGER
மேலும் மதகஜராஜா திரைப்படத்தில் மறைந்த நடிகர்கள் மணிவண்ணன், மனோ பாலா, மயில்சாமி, சிட்டி பாபு, சீனு மோகன் ஆகியோர் நடித்துள்ளனர். அஜித்குமார் நடித்த ’விடாமுயற்சி’ திரைப்படம் ரிலீஸ் தள்ளிப் போன நிலையில், தற்போது பொங்கல் பண்டிகைக்கு மதகஜராஜா உள்ளிட்ட 10 திரைப்படங்கள் ரிலீசுக்கு தயாராக உள்ளது.
