புதுடெல்லி: அமெரிக்க அதிபர் தேர்தலில் வெற்றியை எதிர்நோக்கி உள்ள குடியரசுக் கட்சியின் வேட்பாளர் டொனால்ட் டிரம்புக்கு இந்திய பிரதமர் நரேந்திர மோடி வாழ்த்து தெரிவித்துள்ளார். இந்தியா -அமெரிக்கா இடையேயான கூட்டாண்மையை மேலும் வலுப்படுத்த இரு நாடுகளின் ஒத்துழைப்பு புதுப்பிக்கப்படும் என எதிர்பார்க்கிறேன் என்று மோடி தமது வாழ்த்து செய்தியில் குறிப்பிட்டுள்ளார்.
ஒட்டுமொத்த உலகமே ஆவலுடன் எதிர்பார்த்திருந்த அமெரிக்க அதிபர் தேர்தல் நேற்று நடைபெற்றது. இத்தேர்தலில் அமெரிக்க முன்னாள் அதிபரும், குடியரசுக் கட்சியின் அதிபர் வேட்பாளருமான டொனால்ட் டிரம்ப் வெற்றி பெற்றுள்ளார். அவருக்கு உலகின் பல்வேறு நாடுகளின் தலைவர்கள் வாழ்த்து தெரிவித்து வருகின்றனர். பிரதமர் நரேந்திர மோடியும் டிரம்புக்கு வாழ்த்து தெரிவித்துள்ளார். இதுதொடர்பாக அவர் தமது எக்ஸ் வலைதள பக்கத்தில் இன்று பதிவு ஒன்றை வெளியிட்டுள்ளார்.
அதில், 'அமெரிக்க அதிபர் தேர்தலில் வரலாற்று வெற்றியை பெற்றுள்ள எனதருமை நண்பர் டொனால்ட் டிரம்புக்கு எனது இதயம் கனிந்த நல்வாழ்த்துகள். உங்களுடையை முந்தைய ஆட்சியின் வெற்றிகளை தொடரும்போது, இந்தியா - அமெரிக்கா இடையேயான உலகளாவிய கூட்டாண்மையை மேலும் வலுப்படுத்த இரு நாடுகளுக்கு இடையேயான ஒத்துழைப்பு புதுப்பிக்கப்படும் என்று எதிர்பார்க்கிறேன்.
Heartiest congratulations my friend @realDonaldTrump on your historic election victory. As you build on the successes of your previous term, I look forward to renewing our collaboration to further strengthen the India-US Comprehensive Global and Strategic Partnership. Together,… pic.twitter.com/u5hKPeJ3SY
— Narendra Modi (@narendramodi) November 6, 2024
நாட்டு மக்களின் முன்னேற்றம், உலகளாவிய அமைதி, ஸ்திரத்தன்மை மற்றும் செழிப்பிற்காக நாம் இருவரும் இணைந்து செயல்படுவோம்' என்று பிரதமர் மோடி தமது வாழ்த்து செய்தியில் தெரிவித்துள்ளார்.
இதையும் படிங்க: கமலா ஹாரீஸ் வெற்றி பெற குலதெய்வம் கோயிலில் பூஜை செய்த கிராமத்தினர்!
முன்னதாக, 'கடந்த ஐந்து முறை அமெரிக்க அதிபர்களாக பதவி வகித்தவர்களின் ஆட்சி காலங்களில் இந்தியா- அமெரிக்கா உறவு நிலையான முன்னேற்றத்தை கண்டுள்ளது. அமெரிக்க தேர்தல் முடிவு எதுவாக இருந்தாலும், அந்நாட்டுடான இந்தியாவின் உறவு வளரும்' என்று டெல்லியில் இன்று செய்தியாளர்களை சந்தித்தபோது, வெளியுறவுத் துறை அமைச்சர் எஸ்.ஜெய்சங்கர் கூறியிருந்தார் என்பது குறிப்பிடத்தக்கது.
அமெரிக்க அதிபர் தேர்தலில் வெற்றி பெற 270 தேர்தல் வாக்குகள் தேவைப்படும் நிலையில், அசோசியேட்டட் பிரஸ்ஸின் சமீபத்திய புள்ளிவிவரப்படி, டொனால்ட் ட்ரம்ப் 267 வாக்குகளை பெற்றுள்ளார். அலாஸ்கோ அல்லது மிக்சிகன், விஸ்கான்சின், அரிசோனா, நெவாடா போன்ற கடும் போட்டி நிலவும் மாகாணங்களில் வெற்றி பெற்றால், குடியரசுக் கட்சியைச் சேர்ந்த டிரம்ப் மீண்டும் அமெரிக்க அதிபராக வெள்ளை மாளிகைக்கு செல்ல அதிக வாய்ப்புள்ளதாக கருதப்படுகிறது.
