ஐதராபாத் : தொழிலதிபர் முகேஷ் அம்பானியின் மகன் ஆனந்த் அம்பானி - ராதிகா மெர்ச்சன்ட் இணையின் திருமணத்திற்கு முந்தைய ப்ரீ வெட்டிங் நிகழ்ச்சி குஜராத் மாநிலம் ஜாம்நகரில் மூன்று நாட்களாக கோலாகலமாக நடைபெற்று வருகிறது. பிரபல தொழிலதிபர்கள், தொழில்முனைவோர், சினிமா நட்சத்திரங்கள், பல்துறை கலைஞர்கள் என மிகப் பிரம்மாண்டமாக ப்ரீ வெட்டிங் நிகழ்ச்சி நடைபெற்று வருகிறது.
மைக்ரோசாப்ட் இணை நிறுவனர் பில் கேட்ஸ், பேஸ்புக், இன்ஸ்டாகிராம் சமூக வலைதளங்களின் தாய் நிறுவனமான மெட்டாவின் தலைமை செயல் அதிகாரி மார்க் ஷூக்கர்பர்க், அவரது மனைவி, நடிகர் ரஜினிகாந்த், பாலிவுட் நட்சத்திரங்கள் அமிதாப் பச்சன், ஷாருக்கான், சல்மான் கான், அமீர் கான், ரன்வீர் கபூர், ஆலியா பட் என ஏறத்தாழ 2 ஆயிரம் பேர் ப்ரீ வெட்டிங் நிகழ்ச்சியில் கலந்து கொண்டு உள்ளனர்.
ஆனந்த் அம்பானி - ராதிகா மெர்ச்சன்ட் இணைக்கு ஜூலை 12ஆம் தேதி திருமணம் நடத்த திட்டமிடப்பட்டு உள்ளது. அதற்கு முன்னதாக இந்த பிரம்மாண்ட விழா ஏற்பாடு செய்யப்பட்டு உள்ளது. மூன்றாவது நாளான இன்று பாரம்பரிய உடையில் ஹஸ்ட்க்ஷர் நிகழ்ச்சி நடைபெற்றது. பிரபலங்கள் தங்களது பாரம்பரிய உடையில் நிகழ்ச்சியில் கலந்து கொண்டு நடனமாடினர்.
கிரிக்கெட் வீரர் எம்.எஸ் தோனி தனது மனைவி சாக்ஷி மற்றும் வெஸ்ட் இண்டீஸ் வீரர் பிராவோ ஆகியோருடன் தாண்டியா நடனம் ஆடி மகிழ்ந்தார். முன்னதாக, இரண்டாவது நாள் நிகழ்வில் கலை நிகழ்வுகளை பாலிவுட் நடிகர் ஷாருக்கான் தொகுத்து வழங்கினார். விழாவிற்கு வந்திருந்த அம்பானி உறவினர்களை ஜெய் ஸ்ரீராம் எனக் கூறி ஷாருக்கான் அழைத்தது அனைவரிடையே கரவொலியை ஏற்படுத்தியது.
மேலும், பாலிவுட் நடிகர்கள் சல்மான் கான், ஆமீர் கான் ஆகியோர் ஷாருக்கானுடன் இணைந்து விழா மேடையில் ஆர்ஆர்ஆர் படத்தின் நாட்டு நாட்டு பாடலுக்கு விதவிதமாக நடனமாடி குழுமியிருந்தவர்களை குஷிப்படுத்தினர். முன்னதாக பாப் பாடகி ரிஹானாவின் கான்சர்ட் நடைபெற்றது.
நட்சத்திர நாயகியின் குரல் விழா நடைபெறும் இடம் எங்கும் ஒலிக்க பாலிவுட் நட்சத்திரங்கள் தொடங்கி அனைவரும் இணைந்து பாடியும் நடனமாடியும் மகிழ்ந்தனர்.
இதையும் படிங்க : ஆனந்த் அம்பானி - ராதிகா மெர்ச்சன்ட் ப்ரீ வெட்டிங்: பாப் பாடகி ரிஹானா கான்சர்ட் முதல் சினிமா பிரபலங்களின் குத்தாட்டம் வரை!
