டெல்லி: இலங்கை கடற்படையால் கைது செய்யப்பட்ட தமிழக மீனவர்கள் மற்றும் அவர்களின் மீன்பிடிப் படகுகளை விடுவிக்க, இலங்கை அதிகாரிகளிடம் பேசி நடவடிக்கை எடுக்க வலியுறுத்தி, வெளியுறவுத் துறை அமைச்சர் எஸ்.ஜெய்சங்கருக்கு காங்கிரஸ் மூத்த தலைவரும், மக்களவை எதிர்கட்சித் தலைவருமான ராகுல் காந்தி கடிதம் எழுதியுள்ளார்.
மயிலாடுதுறை மீனவர்கள் 37 பேர் எல்லை தாண்டி மீன் பிடித்ததாக, கடந்த செப்டம்பர் 21ஆம் தேதி இலங்கை கடற்படையால் கைது செய்யப்பட்டனர். மேலும், அவர்களின் மீன்பிடிப் படகுகளும் பறிமுதல் செய்யப்பட்டன. இந்நிலையில், இலங்கை சிறையில் வாடும் அனைத்து இந்திய மீனவர்கள் மற்றும் அவர்களின் மீன்பிடிப் படகுகள், கருவிகள் ஆகியவற்றை விடுவிக்க வலியுறுத்தி, இலங்கையின் புதிய அதிபராக பதவியேற்றுள்ள அனுரா குமார திசநாயகேவுக்கு, மயிலாடுதுறை காங்கிரஸ் எம்பி ஆர்.சுதா சமீபத்தில் கடிதம் எழுதியிருந்தார்.
இந்நிலையில், எம்பி ஆர்.சுதா கடிதத்தின் அடிப்படையில், தமிழக மீனவர்களை உடனடியாக விடுதலை செய்யவும், அவர்களின் படகுகளையும் விடுவிக்கவும், இலங்கை அதிகாரிகளிடம் பேசி நடவடிக்கை எடுக்க வலியுறுத்தி இந்திய வெளியுறவுத் துறை அமைச்சர் எஸ்.ஜெய்சங்கருக்கு காங்கிரஸ் மூத்த தலைவரும், மக்களவை எதிர்கட்சித் தலைவருமான ராகுல் காந்தி கடிதம் அனுப்பியுள்ளார்.
அந்த கடிதத்தில் ராகுல் காந்தி கூறியுள்ளதாவது; "கடந்த செப்டம்பர் 21ஆம் தேதி அன்று தமிழக மீனவர்கள் 37 பேர் இலங்கை கடற்படையால் கைது செய்யப்பட்டதையும், அவர்களின் படகுகளை இலங்கை அதிகாரிகள் கைப்பற்றியது தொடர்பாகவும் உங்களுக்கு இந்த கடிதத்தை எழுதுகிறேன்.
இதையும் படிங்க: நான்கு மாற்றுத்திறனாளி மகள்களுடன் பீகார் நபர் தற்கொலை.. டெல்லியில் அதிர்ச்சி சம்பவம்!
கைது செய்யப்பட்ட மீனவர்கள் கடலோரப் பகுதியில் மீன்பிடிக்கும் சிறு மீனவர்கள் என்றும், சம்பவத்தன்று ஆபத்தில் சிக்கிய இலங்கைப் படகை மீட்க முயன்றவர்கள் என்றும் மயிலாடுதுறை தொகுதி நாடாளுமன்ற உறுப்பினர் ஆர்.சுதா என்னிடம் தெரிவித்துள்ளார். ஆபத்தில் சிக்கிய இலங்கை படகின் மீட்புப் பணிகளுக்கு உதவி அளிக்கக் கோரி இலங்கை அதிகாரிகளைத் தொடர்பு கொண்ட நிலையில், தமிழக மீனவர்கள் சர்வதேச கடல் எல்லைக் கோட்டைத் தாண்டியதாகக் கூறி கைது செய்யப்பட்டதாக தெரிவிக்கப்பட்டுள்ளது. இது தொடர்பாக எம்பி ஆர்.சுதா எழுதியுள்ள கடிதம் இதனுடன் இணைக்கப்பட்டுள்ளது.
எளிய நிலையில் உள்ள இந்திய மீனவர்கள் இலங்கை அதிகாரிகளால் கைது செய்யப்படுவது, அவர்களின் சொத்துகள் அநியாயமாக பறிமுதல் செய்யப்படுவது, பெரும் அபராதம் விதிக்கப்படுவது போன்ற சம்பவங்கள் தொடர்வது கடுமையான கண்டனத்திற்குரியது. இந்த விவகாரத்தை இலங்கை அதிகாரிகளின் கவனத்துக்கு எடுத்துச் சென்று, மீனவர்கள் மற்றும் அவர்களின் படகுகளை விரைவில் விடுவிக்க நடவடிக்கை எடுக்குமாறு நான் கேட்டுக் கொள்கிறேன்" இவ்வாறு அதில் குறிப்பிடப்பட்டுள்ளது.
ஈடிவி பாரத் தமிழ் வாட்ஸ்ஆப் சேனலில் இணைய இங்கே க்ளிக் செய்யவும்
