பெங்களூரு: கர்நாடகாவைச் சேர்ந்த ஆர்டிஐ ஆர்வலர் டி.நரசிம்ம மூர்த்தி என்பவர், பெங்களூரு நகர சிவில் மற்றும் அமர்வு நீதிமன்றத்தில் மனுத் தாக்கல் செய்திருந்தார். இம்மனுவை விசாரித்த நீதிமன்றம், கர்நாடக உள்துறை செயலாளர் மற்றும் காவல்துறை ஆகியோர், ஜெயலலிதாவிற்குச் சொந்தமான பொருட்களை தமிழ்நாடு அரசிடம் ஒப்படைக்க வேண்டும் என உத்தரவிட்டது. மேலும், ஜெயலலிதா மீதான சொத்துக் குவிப்பு வழக்கு விசாரணைக்கான ரூ.5 கோடியை கர்நாடக அரசுக்கு தமிழ்நாடு அரசு வரைவோலையாக (DD - Demand Draft) வழங்க வேண்டும் எனவும் உத்தரவிட்டுள்ளது.
முன்னதாக, கிரன் எஸ்.ஜவலி என்பவர் சிறப்பு நீதிமன்றத்தில் முன்னாள் முதலமைச்சர் ஜெ.ஜெயலலிதா சொத்துக் குவிப்பு வழக்கு தொடர்பான ஆதாரங்களை சமர்ப்பித்தார். இதனையடுத்து 2014, செப்டம்பர் 17 அன்று பெங்களூரு சிறப்பு நீதிமன்றம் ஜெயலலிதாவிற்கு நான்கு ஆண்டுகள் சிறை தண்டனையுடன் ரூ.100 கோடி அபராதமும் விதித்து தீர்ப்பளித்தது. அதோடு கைப்பற்றப்பட்ட ஜெயலலிதாவின் விலைமதிப்புமிக்க சொத்து பொருட்களை ரிசர்வ் வங்கி, எஸ்பிஐ அல்லது பொது ஏலம் மூலம் விற்கவும், அபராதத் தொகையை மாற்றி அமைக்கவும் வேண்டும் என உத்தரவிடப்பட்டது.
இதனிடையே, ஜெயலலிதாவின் சொத்துக் குவிப்பு வழக்கில் அவரது உடமைகளை முறையாக அப்புறப்படுத்த மேற்கொண்ட நடவடிக்கைகள் என்னென்ன என்பது குறித்து, ஆர்டிஐ அலுவலர் நரசிம்ம மூர்த்தி நீதிமன்றத்தில் முறையீடு செய்தார். இம்மனுவை விசாரித்த நீதிமன்றம், இந்த உத்தரவை பிறப்பித்துள்ளது என்பது குறிப்பிடத்தக்கது.
ஜெயலலிதாவின் உடமைகள்: 468 வகையான 7,040 கிராம் எடையுள்ள தங்கம் மற்றும் வைர நகைகள், 700 கிலோ எடையுள்ள வெள்ளி நகைகள், 740 விலையுயர்ந்த காலணிகள், 11,344 பட்டுப் புடவைகள், 250 சால்வைகள், 12 குளிர்சாதனப் பெட்டிகள், 10 டிவிகள், 8 விசிஆர் எனப்படும் நீராவி சுருக்க குளிர்பதனக் கருவிகள், 1 வீடியோ கேமரா, 4 சிடி பிளேயர்கள், 2 ஆடியோ டிஸ்க்குகள், 24 டூ இன் ஒன் டேப் ரெக்கார்டர்கள், 1,040 வீடியோ கேசட்டுகள், 3 இரும்பு லாக்கர்கள், ரூ.193,202 ரொக்கம் உள்ளிட்ட பல பொருட்கள் பறிமுதல் செய்யப்பட்டிருந்தன என்பது குறிப்பிடத்தக்கது.
இதையும் படிங்க: ராமர் கோயில் கும்பாபிஷேகம்: சச்சின், அனில் கும்ப்ளே உள்ளிட்ட நட்சத்திர விளையாட்டு வீரர்கள் பங்கேற்பு..!
