ஶ்ரீநகர்: ஶ்ரீநகரின் கான்யார் பகுதியில் பாதுகாப்பு படையினருக்கும் தீவிரவாதிகளுக்கும் இடையே துப்பாக்கி சண்டையில் பாகிஸ்தான் தீவிரவாதி சுட்டுக்கொல்லப்பட்டுள்ளார். மேலும் தெற்கு காஷ்மீர் பகுதியில் பாதுகாப்பு படையினரின் என்கவுண்டரில் இரண்டு தீவிரவாதிகள் கொல்லப்பட்டுள்ளனர்.
இது குறித்து பேட்டியளித்துள்ள காஷ்மீர் போலீஸ் ஐஜி,"கான்யார் பகுதியில் பாகிஸ்தான் தீவிரவாதி ஒருவர் சுட்டுக்கொல்லப்பட்டுள்ளார். அவரது பெயர் சோட்டா வலீத் என்கிற உஸ்மான் என தெரியவந்துள்ளது. கடந்த 2023ஆம் ஆண்டு நவம்பர் மாதம் மஸ்ரூர் அகமது வானி என்ற போலீஸ் இன்ஸ்பெக்டர் கொல்லப்பட்ட வழக்கில் இவர் தேடப்பட்டு வந்தார். இவரது தீவிரவாத நடவடிக்கைகள் குறித்து விசாரணை மேற்கொள்ளப்பட்டு வருகிறது. விசாரணைக்குப் பின்னரே முழு விவரம் தெரியவரும். தீவிரவாதியுடன் நடைபெற்ற மோதலில் இரண்டு சிஆர்பிஎஃப் வீரர்கள், ஜம்மு-காஷ்மீரை சேர்ந்த 2 போலீசார் ஆகியோருக்கு சிறு காயங்கள் ஏற்பட்டுள்ளது,"என்றார்.
தீவிரவாத இயக்கத்துடன் தொடர்புடையவர்: "சுட்டுக்கொல்லப்பட்ட தீவிரவாதி சோட்டா வலீத் என்கிற உஸ்மான், லக்ஷர் இ தொய்பா இயக்கத்துடன் தொடர்பில் இருந்தவர். இந்த இயக்கத்தை சேர்ந்தவர்கள்தான் காஷ்மீரில் வெளிமாநில தொழிலாளர்கள் மீது தாக்குதல் நடத்தி வருகின்றனர்,"என போலீஸ் அதிகாரி ஒருவர் தெரிவித்தார்.
கான்யார் பகுதியில் பாகிஸ்தான் தீவிரவாதி பதுங்கி இருந்த வீடு, ஜெய்ஷ் இ முமகமது என்ற தீவிரவாத இயக்கத்தை சேர்ந்த தற்கொலைப்படை தீவிரவாதி ஒருவரின் சகோதரருக்கு சொந்தமானது என்றும் அதிகாரிகள் கூறினர். 12 ஆம் வகுப்பு மட்டுமே படித்திருந்த அஃபாக் ஷா கடந்த 2000ஆம் ஆண்டு ஶ்ரீநகரில் பாதாமி பாக் கண்டோன்மென்ட் பகுதியில் கார் குண்டை வெடிக்கச் செய்து தற்கொலை செய்து கொண்டார்.
இருவர் சுட்டுக்கொலை: காஷ்மீரின் வடக்கு பகுதியில் உள்ள பாந்திபோரா பகுதியிலும் பாதுகாப்புப்படையினர், தீவிரவாதிகளுக்கு இடையே துப்பாக்கி சூடு நடைபெற்றது. இது குறித்து இந்திய ராணுவம் வெளியிட்ட எக்ஸ் பதிவில், "நவம்பர் ஒன்றாம் தேதி மாலை சந்தேகத்துக்கு இடமான நபர்கள் நடமாடுவதாக தகவல் கிடைத்தது.பாந்திபோராவின் பானார் பகுதியில் பாதுகாப்புப்படையினர் தேடுதல் வேட்டை நடத்தியபோது தீவிரவாதிகள் பாதுகாப்பு படையினரை நோக்கி சுட்டனர். பின்னர் அவர்கள் காட்டு பகுதியில் தப்பி சென்று விட்டனர். காட்டு பகுதியில் தப்பி சென்ற தீவிரவாதிகளை தேடும் பணி தொடர்ந்து நடைபெற்று வருகிறது,"எனக் கூறப்பட்டுள்ளது.
இதனிடையே தெற்கு காஷ்மீரின் ஆனந்த்நாக் மாவட்டத்தில் உள்ள ஷாங்குஸ் லார்னூ கச்வான் வனப்பகுதியில் பாதுகாப்பு படையினருக்கும், தீவிரவாதிகளுக்கும் இடையே நடந்த துப்பாக்கி சண்டையில் தீவிரவாதிகள் இருவர் சுட்டுக் கொல்லப்பட்டனர்.
காஷ்மீரின் மையப்பகுதியில் உள்ள புத்காம் மாவட்டத்தில் தீவிரவாதிகள் வெளிமாநில தொழிலாளர்கள் இருவர் மீது தாக்குதல் நடத்தியை அடுத்து தீவிரவாதிகளை தேடும் பணி நடைபெற்று வருகிறது. மேலும் ஜம்மு-காஷ்மீர் துணை நிலை ஆளுநர் மனோஜ் சின்ஹா மேற்கொண்ட ஆய்வு கூட்டத்தில்,"வெளிமாநில தொழிலாளர்கள் தாக்கப்படுவதை தடுக்க கடும் நடவடிக்கை எடுக்க வேண்டும்,"என்று உத்தரவிட்டிருந்தார்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே கிளிக் செய்யவும்
