டெல்லி : மதுபான கொள்கை முறைகேடு வழக்கில் தனக்கு எதிரான கைது நடவடிக்கை மற்றும் அமலாக்கத்துறையின் காவலை எதிர்த்தும் இடைக்கால நிவாரணம் கோரியும் முதலமைச்சர் அரவிந்த் கெஜ்ரிவால் டெல்லி உயர்நீதிமன்றத்தில் வழக்கு தொடர்ந்து இருந்தார். இந்த வழக்கு இன்று (மார்ச்.27) உயர் நீதிமன்றத்தில் விசாரணைக்கு வந்தது.
அரவிந்த் கெஜ்ரிவால் தரப்பில் மூத்த வழக்கறிஞர் அபிஷேக் சிங்வி, கெஜ்ரிவாலின் கைது அரசியல் பழிவாங்கும் செயல் என்றும் அவர் மற்றும் ஆம் ஆத்மி கட்சியை மக்களவை தேர்தல் நேரத்தில் முடக்க செய்யப்படும் நடவடிக்கை என்றும் வாதிட்டார். அதேபோல் அமலாக்கத்துறை சார்பில் ஆஜரான கூடுதல் சொலிசிட்டர் ஜெனரல் எஸ்வி ராஜூ, அரவிந்த் கெஜ்ரிவால் தாக்கல் செய்த ரிட் மனுக்கள் குறித்து பதிலளிக்க கால அவகாசம் வழங்க வேண்டும் என வாதிட்டார்.
இரு தரப்பு வாதங்களையும் கேட்ட நீதிபதி சுவர்ண காந்த சர்மா, வழக்கில் இருந்து டெல்லி முதலமைச்சர் அரவிந்த் கெஜ்ரிவாலுக்கு இடைக்கால நிவாரணம் வழங்க மறுப்பு தெரிவித்தார். மேலும் அரவிந்த் கெஜ்ரிவால் தரப்பில் தாக்கல் செய்யப்பட்ட இரண்டு மனுக்களுக்கு அமலாக்கத்துறை பதிலளிக்க உத்தரவிட்டார்.
வரும் ஏப்ரல் 2ஆம் தேதிக்குள் அமலாக்கத்துறை அறிக்கை அளிக்க உத்தரவிட்ட நீதிபதி, ஏப்ரல் 3ஆம் தேதி வழக்கின் அடுத்த கட்ட விசாரணையை ஒத்திவைத்தார். தலைநகர் டெல்லியில் மதுபான கொள்கை வகுத்ததில் 100 கோடி ரூபாய் வரை முறைகேடு நடந்ததாக கூறி சிபிஐ மற்றும் அமலாக்கத்துறை வழக்குப் பதிவு செய்து விசாரணை நடத்தி வருகிறது.
இந்த வழக்கு தொடர்பாக முன்னாள் துணை முதலமைச்சர் மணீஷ் சிசோடியா, சந்யேந்திர ஜெயின் உள்ளிட்டோர் சிறையில் அடைக்கப்பட்டனர். மேலும், இந்த வழக்கு தொடர்பாக முதலமைச்சர் அரவிந்த் கெஜ்ரிவால் வீட்டில் சோதனை மேற்கொண்ட அமலாக்கத்துறை அதிகாரிகள் கடந்த மார்ச் 21ஆம் தேதி அவரை கைது செய்து காவலில் எடுத்து விசாரித்து வருகின்றனர்.
முன்னதாக, இதே மதுபான முறைகேடு வழக்கு தொடர்பாக தெலாங்கானா முன்னாள் முதலமைச்சர் கே சந்திரசேகர ராவின் மகள் மற்றும் எம்எல்சி கவிதாவை அமலாக்கத்துறை கைது செய்து காவலில் எடுத்து விசாரித்து வருவது குறிப்பிடத்தக்கது.
இதையும் படிங்க : இண்டிகோ- ஏர் இந்தியா எக்ஸ்பிரஸ் விமானங்கள் மோதல்! அதிர்ஷ்டவசமாக உயிர் தப்பிய பயணிகள்! என்ன நடந்தது? - Indigo Hits Air India Flight
