பெங்களூரு: கர்நாடக மாநிலத் தலைநகர் பெங்களூருவின் புதிய அடையாளங்களில் ஒன்றாக திகழ்கிறது மகடி சாலையில் பிரமாண்டமாக அமைந்துள்ள ஜி.டி.வேர்ல்டு மால் வணிக வளாகம். இந்த வணிக வளாகத்துக்கு தினந்தோறும் ஆயிரக்கணக்கானோர் வந்து செல்கின்றனர். அவர்களில் ஒருவராக, கர்நாடகாவின் ஹாவேரி நகரைச் சேர்ந்த விவசாயியான ஃபக்கீரப்பா என்பவர், தமது மனைவி மற்றும் மகனுடன் திரைப்படம் பார்ப்பதற்காக செவ்வாய்க்கிழமை மாலை சுமார் 6 மணியளவில மாலுக்கு சென்றுள்ளார்.
அப்போது வணிக வளாக நுழைவாயிலில் நின்றிருந்த பாதுகாவலர், விவசாயி ஃபக்கீரப்பாவின் மகன் நாகராஜ் மற்றும் அவரது மனைவியை மட்டும் உள்ளே செல்ல அனுமதித்துள்ளார். அதேசமயம், முறையான உடை அணியவில்லை எனக் கூறி, ஃபக்கீரப்பாவுக்கு வளாகத்துக்குள் செல்ல அனுமதி அளிக்கவில்லை. இதை கண்டு ஆத்திரமடைந்த அவரது மகன் நாகராஜ், பாதுகாவலருடன் சுமார் அரை மணி நேரம் வாக்குவாதம் செய்தார். ஆனால் அதன் பிறகும் ஃபக்கீரப்பா மாலுக்குள் செல்ல அனுமதிக்கப்படவில்லை.
இதனால் கோபமடைந்த நாகராஜ், வணிக வளாகத்தில் தனது தந்தைக்கு நேர்ந்த அவமானகரமான சம்பவம் குறித்த வீடியோவை சமூக வலைதளங்களில் பகிர்ந்தார். அதில், பாதுகாவலர் விவசாயிக்கு அனுமதி மறுக்கும் காட்சியும், தமது தந்தையிடம் பாதுகாவலர் மரியாதை குறைவாக நடந்து கொண்டார் என்று நாகராஜ் குற்றம்சாட்டுவது உள்ளிட்ட காட்சிகள் இடம்பெற்றிருந்தன.
இந்த வீடியோ சமூக வலைதளங்களில் வைரலாகவே, விவசாயிகளும், பல்வேறு கன்னட அமைப்புகளும் இந்த சம்பவத்துக்கு கண்டனம் தெரிவித்தும், வணிக வளாக நிர்வாகத்தின் மீது உடனே உரிய நடவடிக்கை எடுக்க வேண்டும் என்றும் வலியுறுத்தி வணிக வளாகத்தின் முன்பு போராட்டம் நடத்தினர். இதையடுத்து நடந்த சம்பவத்துக்காக, வணிக வளாக பணியாளர்கள் விவசாயி ஃபக்கீரப்பாவிடம் மன்னிப்பு கோரினர்.
அதில் சமாதானம் அடையாத அவர், தமக்கு நேர்ந்த கசப்பான அனுபவம் குறித்து, கே.பி. அக்ரஹாரா காவல் நிலையத்தில் புகார் அளித்தார். அப்புகாரின் அடிப்படையில், மாலின் உரிமையாளர் மற்றும் பாதுகாவலர் மீது போலீசார் இன்று (வியாழக்கிழமை) வழக்குப்பதிவு செய்துள்ளனர்.
மூடப்படும் மால்: நாடு முழுவதும் கடும் அதிர்ச்சியை ஏற்படுத்திய இச்சம்பவம் குறித்து, மாநில நகர்புற வளர்ச்சித் துறை அமைச்சர் பைரதி சுரேஷ் ஆலோசனை மேற்கொண்டார். அதன் தொடர்ச்சியாக, விவசாயியை அவமரியாதையாக நடத்தியதற்காக, ஜி.டி.மால் ஒரு வாரத்துக்கு மூடப்படும் என்று அமைச்சர் பைரதி சுரேஷ் மாநில சட்டமன்றத்தில் இன்று (ஜுலை 18) அதிரடியாக அறிவித்தார்.
முன்னதாக, வணிக வளாக நிர்வாக விதிமுறைகளின்படியே, விவசாயியை வேட்டிக்கு பதிலாக பேண்ட், சட்டை அணிந்து வருமாறு பாதுகாவலர் அறிவுறுத்தியதாக தகவல் வெளியாகி இருந்தது.
இதையும் படிங்க: நீட் தேர்வு விவகாரம்: தேசிய தேர்வு முகமைக்கு உச்ச நீதிமன்றம் அதிரடி உத்தரவு!
