ਸੰਗਰੂਰ: ਅੱਜ ਕੱਲ੍ਹ ਦੀ ਪੀੜ੍ਹੀ ਪੁਰਾਣੇ ਸਭਿਆਚਾਰ ਨੂੰ ਭੁਲਦੀ ਜਾ ਰਹੀ ਹੈ ਤੇ ਇਨ੍ਹਾਂ ਨੂੰ ਪੁਰਾਣੇ ਸਭਿਆਚਾਰ ਬਾਰੇ ਘੱਟ ਹੀ ਪਤਾ ਹੈ। ਜੇ ਆਪਾਂ ਚਾਲੀ ਪੰਜਾਹ ਸਾਲ ਪਿੱਛੇ ਜਾਈਏ ਤਾਂ ਉਦੋਂ ਖੂਹ, ਟਿੰਡਾਂ, ਚਰਖਾ, ਰੂੰ ਤੂੰਬਾ, ਤੰਦੂਰ, ਰੜਕਣਾ, ਆਮ ਪ੍ਰਚੱਲਤ ਚੀਜ਼ਾਂ ਸਨ ਇਨ੍ਹਾਂ ਚੀਜ਼ਾਂ 'ਚੋਂ ਇਕ ਹੁੰਦਾ ਸੀ ਪੁਰਾਤਨ ਸਭਿਆਚਾਰ ਦਾ ਸ਼ਿੰਗਾਰ ਗੱਡਾ, ਗੱਡਾ ਪੁਰਾਣੇ ਸਮਿਆਂ 'ਚ ਸਰਦੇ ਪੁਜਦੇ ਘਰਾਂ ਵਿਚ ਹੁੰਦਾ ਸੀ।
ਇਸੇ ਤਰ੍ਹਾਂ ਲਗਭਗ ਸੌ ਸਾਲ ਪੁਰਾਣੇ ਸਮੇਂ ਦਾ ਗੱਡਾ ਸਾਭੀ ਬੈਠੇ ਹਨ, ਪਿੰਡ ਬੱਲਰਾ ਦੇ ਕਿਸਾਨ ਮਿਸਰਾ ਸਿੰਘ, ਜਿਨ੍ਹਾਂ ਨੇ ਇਸ ਗੱਡੇ ਨਾਲ ਅਪਣੇ ਪ੍ਰਵਾਰ ਦਾ ਪਾਲਣ ਪੋਸ਼ਣ ਵਧੀਆ ਤਰੀਕੇ ਨਾਲ ਕੀਤਾ। ਹੁਣ ਭਾਵੇਂ ਮਿਸਰਾ ਸਿੰਘ 102 ਸਾਲ ਦੀ ਸਵੱਸਥ ਉਮਰ ਭੋਗ ਕੇ ਅਜੇ ਪੰਦਰਾਂ ਕੁ ਦਿਨ ਪਹਿਲਾਂ ਹੀ ਇਸ ਫਾਨੀ ਸੰਸਾਰ ਤੋਂ ਕੂਚ ਕਰ ਗਏ, ਪਰ ਇਨ੍ਹਾਂ ਦਾ ਪ੍ਰਵਾਰ ਗੱਡੇ ਦੀ ਸੰਭਾਲ ਵਧੀਆ ਤਰੀਕੇ ਨਾਲ ਕਰ ਰਿਹਾ ਹੈ।
ਇਹ ਗੱਡਾ ਦੇਸ਼ ਦੀ ਆਜ਼ਾਦੀ ਤੋਂ ਲਗਭਗ ਵੀਹ ਸਾਲ ਪਹਿਲਾਂ ਭਾਵ 1927 ਦੇ ਨੇੜੇ-ਤੇੜੇ ਦਾ ਬਣਿਆ ਹੋਇਆ ਹੈ। ਇਸ ਗੱਡੇ ਤੇ ਪੁਰਾਤਨ ਕਲਾਕਾਰੀ ਅਜੇ ਵੀ ਕਾਇਮ ਹੈ। ਇਸ 'ਤੇ ਲਗਪਗ ਸੌ ਕਿਲੋ ਪਿੱਤਲ ਤੋਂ ਇਲਾਵਾ ਤਾਂਬਾ ਵੀ ਲੱਗਿਆ ਹੋਇਆ ਹੈ। ਮਿਸਰਾ ਸਿੰਘ ਦੇ ਪ੍ਰਵਾਰ ਨੇ ਗੱਡੇ ਸਬੰਧੀ ਜਾਣਕਾਰੀ ਦਿੰਦਿਆਂ ਦਸਿਆ ਕਿ ਅਸੀਂ ਅਨਾਜ ਦੀ ਸਾਰੀ ਢੋਆ-ਢੋਆਈ ਇਸ ਗੱਡੇ ਰਾਹੀਂ ਕਰਦੇ ਸੀ।
ਇਹ ਵੀ ਪੜੋ: ਗੁਰਦਾਸਪੁਰ ਤੋਂ ਸਾਂਸਦ ਸਨੀ ਦਿਓਲ ਦੇ ਸ਼ਹਿਰ ਵਿੱਚ ਲਗੇ ਗੁੰਮਸ਼ੂਦਾ ਦੇ ਪੋਸਟਰ
ਅਪਣੀ ਢੋਆ-ਢੋਆਈ ਤੋਂ ਇਲਾਵਾ ਕਿਰਾਏ ਦਾ ਕੰਮ ਵੀ ਇਸ ਗੱਡੇ ਰਾਹੀਂ ਹੀ ਕਰਿਆ ਕਰਦੇ ਸੀ। ਇਸ ਦੀ ਭਾਰ ਚੁੱਕਣ ਦੀ ਸਮਰਥਾ ਚਾਲੀ-ਪੰਤਾਲੀ ਮਣ ਦੇ ਕਰੀਬ ਸੀ। ਉਸ ਸਮੇਂ ਲੱਗਭਗ ਸਾਰੇ ਰਸਤੇ ਕੱਚੇ ਹੁੰਦੇ ਸੀ ਤੇ ਇਹ ਗੱਡਾ ਉਨ੍ਹਾਂ ਕੱਚੇ ਰਸਤਿਆਂ ਦਾ ਸ਼ਿੰਗਾਰ ਹੁੰਦਾ ਸੀ। ਇਹ ਗੱਡਾ ਪੁਰਾਤਨ ਸਮੇਂ 'ਚ ਉਨ੍ਹਾਂ ਦੇ ਪਿੰਡ ਤੋਂ ਲਗਭਗ 100 ਕਿਲੋਮੀਟਰ ਦੇ ਦਾਇਰੇ ਨਰਵਾਣਾ, ਜੀਂਦ, ਰੋਹਤਕ, ਸਮਾਣਾ, ਪਟਿਆਲਾ ਤਕ ਨੁਮਾਇਸ਼ ਵਜੋਂ ਜਾ ਚੁੱਕਾ ਹੈ ਅਤੇ ਕਈ ਥਾਵਾਂ ਤੇ ਵਧੀਆ ਮਾਣ ਸਨਮਾਨ ਵੀ ਹਾਸਲ ਕਰ ਚੁੱਕਾ ਹੈ। ਇਸ ਗੱਡੇ ਦੀ ਕੀਮਤ ਕਈ ਲੱਖ ਰੁਪਏ ਤਕ ਲਾਈ ਜਾ ਚੁੱਕੀ ਹੈ ਪਰ ਕਿਸਾਨ ਮਿਸਰਾ ਸਿੰਘ ਦੇ ਪੁੱਤਰ ਗੁਲਾਬ ਸਿੰਘ, ਗਮਦੂਰ ਸਿੰਘ, ਪੋਤਰੇ ਲਾਡੀ ਸਿੰਘ, ਭੋਲਾ ਸਿੰਘ, ਬਿੱਟੂ ਸਿੰਘ, ਮੱਖਣ ਸਿੰਘ, ਚੇਤਪਾਲ ਸਿੰਘ ਅਤੇ ਪੜਪੋਤੇ ਗੁਰਵਿੰਦਰ ਸਿੰਘ ਅਤੇ ਗੁਰਜਿੰਦਰ ਸਿੰਘ ਨੇ ਦਸਿਆ ਕਿ ਅਸੀਂ ਇਸ ਗੱਡੇ ਨੂੰ ਕਿਸੇ ਵੀ ਕੀਮਤ 'ਤੇ ਨਹੀਂ ਵੇਚਾਂਗੇ।
