ਰੋਪੜ: ਪੁਲਿਸ ਨੇ ਸ਼ੁਰੂਆਤੀ ਤਫਤੀਸ਼ ਤੋਂ ਗ਼ੈਰ ਕਾਨੂੰਨੀ ਢੰਗ ਨਾਲ ਚੱਲ ਰਹੀਆਂ 93 ਲੱਗਜ਼ਰੀ ਕਾਰਾਂ ਨੂੰ ਬਰਾਮਦ ਕੀਤਾ ਹੈ। ਇਨ੍ਹਾਂ ਦਾ ਮੁੱਲ ਕਰੀਬ 4 ਕਰੋੜ ਰੁਪਏ ਹੈ। ਇਸ ਘੁਟਾਲੇ ਵਿੱਚ ਦਿੱਲੀ, ਹੁਸ਼ਿਆਰਪੁਰ, ਸੰਗਰੂਰ, ਲੁਧਿਆਣਾ ਅਤੇ ਪਟਿਆਲਾ ਦੇ ਕਾਰ ਡੀਲਰ ਸ਼ਾਮਲ ਹਨ।
ਦੱਸ ਦਈਏ ਕਿ ਫ਼ਤਿਹਗੜ੍ਹ ਸਾਹਿਬ, ਤਰਨਤਾਰਨ, ਸੰਗਰੂਰ ਅਤੇ ਮੋਗਾ ਦੇ ਟਰਾਂਸਪੋਰਟ ਮਹਿਕਮੇ ਇਸ ਘੁਟਾਲੇ ਵਿੱਚ ਸਿੱਧੇ ਤੌਰ 'ਤੇ ਜੁੜੇ ਹਨ । ਰੋਪੜ ਐੱਸ.ਐੱਸ.ਪੀ. ਸਵਪਨ ਸ਼ਰਮਾ ਨੇ ਪ੍ਰੈਸ ਕਾਨਫ਼ਰੰਸ ਦੌਰਾਨ ਦੱਸਿਆ ਕਿ ਇਹ ਗਿਰੋਹ ਇੱਕ ਸੂਬੇ ਤੋਂ ਸੈਕੰਡ ਹੈਂਡ ਵਾਹਨ ਖ਼ਰੀਦ ਕੇ ਚਾਸੀ ਅਤੇ ਇੰਜਣ ਨੰਬਰ ਨੂੰ ਬਦਲ ਕੇ ਦੂਜੇ ਸੂਬਿਆਂ ਦੇ ਕਾਰ ਡੀਲਰਾਂ ਨੂੰ ਵੇਚ ਦਿੰਦਾ ਸੀ। ਉਨ੍ਹਾਂ ਦੱਸਿਆ ਕਿ 1500 ਗੱਡੀਆਂ ਪੰਜਾਬ ਵਿੱਚ ਖ਼ਰੀਦੀਆਂ ਗਈਆਂ ਸਨ।
ਰੋਪੜ ਪੁਲਿਸ ਵਲੋਂ ਰਸ਼ਪਿੰਦਰ ਉਰਫ਼ ਸੋਨੂੰ ਧੂਰੀ ਨੂੰ ਗ੍ਰਿਫ਼ਤਾਰ ਕਰ ਕੇ ਜੇਲ ਭੇਜ ਦਿੱਤਾ ਗਿਆ ਅਤੇ ਉਨ੍ਹਾਂ ਕਿਹਾ ਕਿ ਬਾਕੀ ਸੰਗਠਨ ਦੇ ਮੈਂਬਰ ਵੀ ਜਲਦ ਗ੍ਰਿਫ਼ਤਾਰ ਕੀਤੇ ਜਾਣਗੇ। ਰੋਪੜ ਪੁਲਿਸ ਨੇ ਮੁਖਬਰੀ 'ਤੇ ਇਹ ਪਰਚਾ ਦਰਜ ਕਰ ਕੇ ਇਸ ਮਾਮਲੇ ਦਾ ਪਰਦਾਫਾਸ਼ ਕੀਤਾ ਹੈ।
ਇਹ ਵੀ ਪੜ੍ਹੋ: ਬਜਟ 2019: ਤੇਲ ਦੀਆਂ ਕੀਮਤਾਂ 'ਚ ਵਾਧੇ ਤੋਂ ਲੋਕ ਨਾਖ਼ੁਸ਼
ਬਰਾਮਦ ਗੱਡੀਆਂ ਵਿੱਚ 85 ਇਟਿਓਸ, 2 ਇਨੋਵਾ, 2 ਰਿਟਜ਼, 3 ਸਵਿੱਫਟ ਡੀਜ਼ਾਇਰ, 1 ਮਰਸਡੀਜ਼ ਸ਼ਾਮਲ ਹਨ। ਪੁਲਿਸ ਨੇ ਇਹ ਮਾਮਲਾ ਰੋਪੜ ਦੇ ਚਮਕੌਰ ਸਾਹਿਬ ਥਾਣੇ ਵਿੱਚ ਵੱਖੋ-ਵੱਖ ਧਾਰਾ ਅਧੀਨ ਦਰਜ ਕਰ ਲਿਆ ਹੈ।
