ਲੁਧਿਆਣਾ: ਅਕਸਰ ਹੀ ਕੁਦਰਤ ਦੀ ਮਾਰ ਦਾ ਸ਼ਿਕਾਰ ਹੋਣ ਵਾਲੇ ਲੋਕ ਆਪਣੀ ਜ਼ਿੰਦਗੀ ਤੋਂ ਹਾਰ ਮੰਨ ਲੈਂਦੇ ਹਨ, ਇੱਥੇ ਤੱਕ ਕਿ ਜਿਨ੍ਹਾਂ ਦੇ ਹੱਥ ਪੈਰ ਸਲਾਮਤ ਹਨ, ਉਨ੍ਹਾਂ ਨੂੰ ਵੀ ਅਕਸਰ ਹੀ ਰੱਬ ਤੋਂ ਮਲਾਲ ਰਹਿੰਦਾ ਹੈ। ਪਰ ਕੁੱਝ ਲੋਕ ਅਜਿਹੇ ਵੀ ਹਨ, ਜੋ ਕਿ ਆਪਣੀ ਕਮਜ਼ੋਰੀ ਨੂੰ ਹੀ ਆਪਣੀ ਤਾਕਤ ਬਣਾਉਂਦੇ ਹਨ ਤੇ ਕਾਮਯਾਬੀ ਹਾਸਿਲ ਕਰਦੇ ਹਨ। ਜਿਸ ਦੀ ਜਿਉਂਦੀ ਜਾਗਦੀ ਮਿਸਾਲ ਅਜੇ ਹੈ, ਜੋ ਕਿ ਨੇਤਰਹੀਣ ਹੋਣ ਦੇ ਬਾਵਜੂਦ ਸਰਕਾਰੀ ਸਮਾਰਟ ਸਕੂਲ ਮਲਟੀਪਰਪਜ਼ ਲੁਧਿਆਣਾ ਵਿੱਚ ਦਰਜਾ 4 ਮੁਲਾਜ਼ਮ ਦੀ ਨੌਕਰੀ ਕਰਦਾ ਹੈ। ਸਕੂਲ ਵਿੱਚ 18 ਦਰਜਾ 4 ਮੁਲਾਜ਼ਮਾਂ ਦਾ ਕੰਮ ਅਜੇ ਇੱਕਲਾ ਹੀ ਕਰਦਾ ਹੈ। ਉਸ ਨੇ 2016 ਵਿੱਚ ਨੌਕਰੀ ਕਰਨੀ ਸ਼ੁਰੂ ਕੀਤੀ ਸੀ। ਉਹ ਬਚਪਨ ਤੋਂ ਹੀ ਨੇਤਰਹੀਣ ਹੈ, ਉਸ ਦੇ ਘਰ ਉਸ ਦੀ ਮਾਤਾ ਅਤੇ ਭਰਾ ਹੈ, ਅਜੇ ਲੁਧਿਆਣਾ ਦੇ ਜਨਤਾ ਨਗਰ ਦਾ ਵਸਨੀਕ ਹੈ।
ਸਕੂਲ ਦੇ ਸਾਰੇ ਕੰਮ ਅਜੇ ਕਰਦਾ: ਅਜੇ ਸਕੂਲ ਦੇ ਸਾਰੇ ਕੰਮ ਕਰਦਾ ਹੈ, ਘੰਟੀ ਬਣਾਉਣ ਤੋਂ ਲੈ ਕੇ ਹਸਤਾਖਰ ਕਰਵਾਉਣ ਤੱਕ, ਸਕੂਲ ਦਾ ਚੱਪਾ ਚੱਪਾ ਉਸ ਨੂੰ ਪਤਾ ਹੈ। ਤੁਸੀ ਉਸ ਨੂੰ ਕੋਈ ਕੰਮ ਦੱਸੋ, ਇਹ ਬਿਨ੍ਹਾਂ ਕਿਸੇ ਸਹਾਰੇ ਦੇ ਖੁਦ ਉਹ ਕੰਮ ਪੂਰਾ ਕਰਕੇ ਆਵੇਗਾ। ਸਕੂਲ ਦੀ ਕਿਹੜੀ ਕਲਾਸ ਕਿੱਥੇ ਲੱਗਦੀ, ਸਕੂਲ ਦੀ ਪ੍ਰਿੰਸੀਪਲ ਦਾ ਕਮਰਾ, ਸਾਇੰਸ ਵਿਭਾਗ, ਲਾਇਬਰੇਰੀ, ਪਖਾਨੇ, ਸਕੂਲ ਦਾ ਹਰ ਕੋਨਾ ਉਸ ਨੂੰ ਪਤਾ ਹੈ। ਇੱਥੋਂ ਤੱਕ ਕਿ ਪੌੜੀਆਂ ਚੜ੍ਹਨ ਲਈ ਵੀ ਉਸ ਨੂੰ ਕਿਸੇ ਸਹਾਰੇ ਦੀ ਲੋੜ ਨਹੀਂ। ਤੁਹਾਨੂੰ ਸਕੂਲ ਦੇ ਗੇਟ ਤੋਂ ਸਕੂਲ ਦੀ ਹਰ ਇੱਕ ਜਮਾਤ, ਸਕੂਲ ਦੇ ਹਰ ਕੋਨੇ ਤੱਕ ਅਜੇ ਅਸਾਨੀ ਨਾਲ ਲਿਜਾ ਸਕਦਾ ਹੈ।
ਆਵਾਜ਼ ਤੋਂ ਪਛਾਣ: ਅਜੇ ਦੀ ਛੇਵੀਂ ਸੈਂਸ ਦਾ ਇਹ ਕਮਾਲ ਹੈ ਕਿ ਉਹ ਸਕੂਲ ਦੇ ਕਿਸੇ ਅਧਿਆਪਕ ਦੀ ਆਵਾਜ਼ ਸੁਣ ਕੇ ਉਸ ਦੀ ਪਛਾਣ ਕਰ ਲੈਂਦਾ ਹੈ ਜਿਸ ਦਾ ਲਾਈਵ ਟੈਸਟ ਵੀ ਸਾਡੀ ਟੀਮ ਨੇ ਕੀਤਾ, ਇੱਕ ਨਹੀਂ ਸਗੋਂ ਕਈ ਅਧਿਆਪਕਾਂ ਦੀ ਇੱਕ ਅਵਾਜ਼ ਤੇ ਅਜੇ ਨੂੰ ਪਤਾ ਲੱਗ ਜਾਂਦਾ ਕੇ ਇਹ ਕਿਹੜੇ ਅਧਿਆਪਕ ਨੇ ਅਤੇ ਕਿੱਥੇ ਕਿਹੜੀ ਜਮਾਤ ਨੂੰ ਪੜਾਉਂਦੇ ਹਨ, ਇਨ੍ਹਾਂ ਦੀ ਕਲਾਸ ਕਿਹੜੇ ਕਮਰੇ ਵਿੱਚ ਹੁੰਦੀ ਹੈ ਸਭ ਅਜੇ ਨੂੰ ਪਤਾ ਹੈ। ਉਹ ਸਕੂਲ ਦੇ ਹਰ ਪਿਰਡ ਦੇ ਦੌਰਾਨ ਘੰਟੀ ਵਜਾਉਂਦਾ ਹੈ ਅਤੇ ਕਿਉਂਕਿ ਉਸ ਨੂੰ ਸਮਾਂ ਵੀ ਪਤਾ ਹੁੰਦਾ ਹੈ। ਤਕਨੀਕ ਦੀ ਵਰਤੋਂ ਕਰਕੇ ਉਹ ਮੋਬਾਇਲ ਤੋਂ ਸਮਾਂ ਪਤਾ ਲਗਾ ਲੈਂਦਾ ਹੈ ਅੱਜ ਤੱਕ ਇਸ ਨੇ ਕਦੀ 2 ਮਿੰਟ ਵੀ ਪੀਰਡ ਦੀ ਘੰਟੀ ਲੇਟ ਜਾਂ ਪਹਿਲਾਂ ਨਹੀਂ ਮਾਰੀ।
ਮੋਬਾਇਲ ਦੀ ਵਰਤੋਂ: ਅਜੇ ਨੂੰ ਸਕੂਲ ਦੇ ਕੋਨੇ-ਕੋਨੇ ਤੋਂ ਇਲਾਵਾ ਮੋਬਾਇਲ ਚਲਾਉਣਾ ਵੀ ਆਉਂਦਾ ਹੈ, ਇੱਥੋਂ ਤੱਕ ਕਿ ਉਹ ਵ੍ਹਟਸਐਪ ਚਲਾ ਲੈਂਦਾ ਹੈ, ਉਸ ਨੂੰ ਸਭ ਤੋਂ ਉੱਪਰ ਕਿਹੜਾ ਸੁਨੇਹਾ ਆਇਆ ਹੈ, ਇਸ ਦਾ ਵੀ ਪਤਾ ਲੱਗ ਜਾਂਦਾ ਹੈ। ਮੋਬਾਇਲ ਵਿੱਚੋਂ ਕੈਮਰਾ ਕੱਢ ਕੇ ਆਨ ਕਰਨਾ, ਉਸ ਦੇ ਖੱਬੇ ਹੱਥ ਦਾ ਕੰਮ ਹੈ। ਮੋਬਾਇਲ ਨੂੰ ਪੂਰੀ ਤਰ੍ਹਾਂ ਚਲਾਉਣ ਦੇ ਨਾਲ ਉਸ ਨੂੰ ਜ਼ਿਆਦਾਤਰ ਨੋਟਾਂ ਦੀ ਵੀ ਪਛਾਣ ਹੈ, ਹੱਥ ਲਗਾਕੇ ਉਹ ਨੋਟ ਦੱਸ ਦਿੰਦਾ ਹੈ।
ਅਜੇ ਆਪਣੀ ਨੌਕਰੀ ਤਨਦੇਹੀ ਨਾਲ ਨਿਭਾਉਂਦਾ ਹੈ ਅਤੇ ਉਸ ਦੀ ਇਸ ਲਗਨ ਦੇ ਸਭ ਮੁਰੀਦ ਹਨ। ਅਜੇ ਦੀ ਯਾਦਾਸ਼ ਵੀ ਬਹੁਤ ਚੰਗੀ ਹੈ, ਉਹ ਜਿਸ ਨੂੰ ਇੱਕ ਵਾਰ ਮਿਲ ਲੈਂਦਾ ਹੈ, ਉਸ ਦੀ ਪਹਿਚਾਣ ਆਵਾਜ਼ ਯਾਦ ਰੱਖਦਾ ਹੈ। ਉਸ ਦੇ ਸਕੂਲ ਦੇ ਅਧਿਆਪਕ ਦੱਸਦੇ ਹਨ ਕਿ ਆਵਾਜ਼ ਤਾਂ ਦੂਰ ਦੀ ਗੱਲ ਹੈ, ਗੱਡੀ ਦੀ ਆਵਾਜ਼ ਸੁਣ ਕੇ ਉਸ ਨੂੰ ਪਤਾ ਲੱਗ ਜਾਂਦਾ ਹੈ ਨੇ ਕਿਹੜਾ ਅਧਿਆਪਕ ਆਇਆ ਹੈ।
"ਅਜੇ ਦੀ ਸਲਾਘਾ ਕਰਦਿਆਂ ਕਿਹਾ ਕਿ ਕੰਮ ਪ੍ਰਤੀ ਇਮਾਨਦਾਰੀ ਅਤੇ ਲਗਨ ਦੀ ਵੱਡੀ ਉਦਾਹਰਨ ਅਜੇ ਹੈ। ਸਕੂਲ ਦੇ ਵਿਦਿਆਰਥੀ ਵੀ ਉਸ ਦੀ ਮਿਹਨਤ ਨੂੰ ਵੇਖ ਕੇ ਕਾਫੀ ਪ੍ਰਭਾਵਿਤ ਹੁੰਦੇ ਹਨ। ਉਨ੍ਹਾਂ ਕਿਹਾ ਕਿ ਸਕੂਲ ਦੇ ਬੱਚਿਆਂ ਲਈ ਅਜੇ ਉਮੀਦ ਦੀ ਕਿਰਨ ਹੈ ਕਿ ਇਸ ਮੁਕਾਬਲੇ ਭਰੇ ਯੁੱਗ ਵਿੱਚ ਵੀ ਤੁਹਾਡੀ ਕੰਮ ਪ੍ਰਤੀ ਸੱਚੀ ਲੱਗਣ ਅਤੇ ਮਿਹਨਤ ਤੁਹਾਨੂੰ ਇੱਕ ਦਿਨ ਕਾਮਯਾਬੀ ਜ਼ਰੂਰ ਦਵਾਉਂਦੀ ਹੈ":- ਵਾਈਸ ਪ੍ਰਿੰਸੀਪਲ ਵਰਿੰਦਰ ਪਾਠਕ
18 ਮੁਲਾਜ਼ਮਾਂ ਦਾ ਕੰਮ: ਸਕੂਲ ਦੇ ਵਾਈਸ ਪ੍ਰਿੰਸੀਪਲ ਵਰਿੰਦਰ ਪਾਠਕ ਨੇ ਦੱਸਿਆ ਕਿ ਸਕੂਲ ਬਾਰ੍ਹਵੀਂ ਜਮਾਤ ਤੱਕ ਹੈ, ਇਹ ਸਕੂਲ 2 ਸ਼ਿਫਟਾਂ ਵਿੱਚ ਚੱਲਦਾ ਹੈ, ਕਿਉਂਕਿ ਸਕੂਲ ਵਿੱਚ ਬੱਚੇ ਬਹੁਤ ਵੱਡੀ ਗਿਣਤੀ ਵਿੱਚ ਹਨ। ਉਨ੍ਹਾਂ ਕਿਹਾ ਕਿ ਅਜੋਕੇ ਸਮੇਂ ਵਿੱਚ ਸਕੂਲ ਦੇ ਅੰਦਰ 18 ਦਰਜਾ 4 ਕਰਮਚਾਰੀਆਂ ਦੀ ਲੋੜ ਹੈ, ਜਦੋਂ ਕਿ ਹੁਣ ਤੱਕੇ ਇਕੋ ਹੀ ਪੋਸਟ ਭਰੀ ਹੈ, ਉਹ ਅਜੇ ਦੀ ਹੈ। ਉਨ੍ਹਾਂ ਕਿਹਾ ਕਿ ਅੱਖਾਂ ਵਾਲਿਆਂ ਤੋਂ ਜ਼ਿਆਦਾ ਕੰਮ ਅਜੇ ਕਰਦਾ ਹੈ। ਉਨ੍ਹਾਂ ਅਪੀਲ ਵੀ ਕੀਤੀ ਹੈ ਕਿ ਸਿੱਖਿਆ ਵਿਭਾਗ ਸਕੂਲ ਵਿੱਚ ਬਾਕੀ ਖਾਲੀ ਪਈਆਂ ਪੋਸਟਾਂ ਵੀ ਜਲਦ ਭਰੇ।
