ਫ਼ਿਰੋਜ਼ਪੁਰ: ਬੀਤੀ ਰਾਤ ਪੰਜਾਬ ਐਂਡ ਸਿੱਧ ਬੈਂਕ 'ਚ ਲੁੱਟ ਖੋਹ ਕਰਨ ਵਾਲੇ ਗਿਰੋਹ ਵੱਲੋਂ ਏਟੀਐਮ ਨਾਲ ਭੰਨ੍ਹਤੋੜ ਕਰਨ ਦੀ ਇੱਕ ਹੋਰ ਵਾਰਦਾਤ ਸਾਹਮਣੇ ਆਈ ਹੈ। ਇਹ ਘਟਨਾ ਏਟੀਐਮ ਦੇ ਸੀਸੀਟੀਵੀ ਕੈਮਰੇ 'ਚ ਕੈਦ ਹੋ ਗਈ ਹੈ। ਇਹ ਵਾਰਦਾਤ ਸਤੀਏ ਵਾਲਾ ਮੋੜ ਉੱਤੇ ਸਥਿਤ ਏਟੀਐਮ 'ਚ ਰਾਤ ਕਰੀਬ 2:44 ਵਜੇ ਵਾਪਰੀ ਸੀ।
ਇਹ ਵੀ ਪੜ੍ਹੋ: 2 ਕੁਇੰਟਲ 50 ਕਿੱਲੋ 730 ਗ੍ਰਾਮ ਭੁੱਕੀ ਚੂਰਾ ਪੋਸਤ ਬਰਾਮਦ, ਟਰੱਕ ਚਲਾਕ ਫਰਾਰ
ਕੁੱਝ ਦਿਨ ਪਹਿਲਾਂ ਵੀ ਕੋਆਪਰੇਟਿਵ ਬੈਂਕ ਦੇ ਏਟੀਐਮ 'ਚ ਲੁੱਟ ਖੋਹ ਕਰਨ ਵਾਲੇ ਗਿਰੋਹ ਵੱਲੋਂ ਗੈਸ ਕਟਰ ਨਾਲ ਏਟੀਐਮ ਦੀ ਭੰਨ੍ਹਤੋੜ ਕੀਤੀ ਗਈ ਸੀ ਜਿਨ੍ਹਾਂ ਨੂੰ ਥਾਣਾ ਸਦਰ ਦੀ ਪੁਲਿਸ ਨੇ ਪਿੰਡ ਖਾਈ ਫੇਮੇ ਦੇ ਕੋਲ ਕਾਬੂ ਕੀਤਾ ਸੀ।
ਬੈਂਕ ਮੈਨੇਜਰ ਹਰਜੀਤ ਸਿੰਘ ਨੇ ਕਿਹਾ ਕਿ ਉਨ੍ਹਾਂ ਨੂੰ ਸਵੇਰੇ 6:00 ਏਟੀਐਮ ਦੀ ਭੰਨ੍ਹਤੋੜ ਕਰਨ ਦੀ ਸੂਚਨਾ ਮਿਲੀ ਸੀ ਜਿਸ ਤੋਂ ਬਾਅਦ ਉਨ੍ਹਾਂ ਨੇ ਏਟੀਐਮ ਦੇ ਸੀਸੀਟੀਵੀ ਫੁਟੇਜ ਨੂੰ ਦੇਖਿਆ। ਸੀਸੀਟੀਵੀ ਕੈਮਰੇ ਤੋਂ ਸਾਫ਼ ਪਤਾ ਲੱਗ ਰਿਹਾ ਹੈ ਕਿ 3 ਨੌਜਵਾਨਾਂ ਨੇ ਏਟੀਐਮ ਦੀ ਤੋੜ ਭੰਨ੍ਹ ਕੀਤੀ। ਉਨ੍ਹਾਂ ਨੇ ਦੱਸਿਆ ਕਿ ਰਾਤ ਵੇਲੇ ਏਟੀਐਮ ਬੰਦ ਹੁੰਦਾ ਹੈ ਇਸ ਲਈ ਉਨ੍ਹਾਂ ਨੇ ਸਭ ਤੋਂ ਪਹਿਲਾਂ ਏਟੀਐਮ ਦੇ ਦਰਵਾਜ਼ੇ ਨੂੰ ਤੋੜਿਆ ਫਿਰ ਉਨ੍ਹਾਂ ਨੇ ਏਟੀਐਮ ਦੇ ਸੀਸੀਟੀਵੀ ਕੈਮਰੇ ਤੋੜੇ।
ਇਸ ਦੌਰਾਨ ਉਨ੍ਹਾਂ ਨੇ ਏਟੀਐਮ ਦੀ ਤੋੜ ਭੰਨ੍ਹ ਦੀ ਵਾਰਦਾਤ ਨੂੰ ਅੰਜਾਮ ਦਿੱਤਾ ਪਰ ਉਹ ਏਟੀਐਮ ਵਿੱਚੋਂ ਪੈਸੇ ਕੱਢਣ 'ਚ ਨਾਕਾਮ ਹੋ ਗਏ। ਬੈਂਕ ਮੈਨੇਜਰ ਨੇ ਕਿਹਾ ਕਿ ਏਟੀਐਮ 'ਚ ਕੁੱਲ 3 ਲੱਖ 70 ਹਜ਼ਾਰ ਦੀ ਰਕਮ ਸੀ। ਜੋ ਸਹੀ ਸਲਾਮਤ ਹੈ।
ਡੀਐਸਪੀਡੀ ਸਤਨਾਮ ਸਿੰਘ ਨੇ ਦੱਸਿਆ ਕਿ ਸਤੀਏ ਵਾਲਾ ਮੋੜ ਦੇ ਨੇੜੇ ਏਟੀਐਮ ਦੀ ਤੋੜ ਭੰਨ੍ਹ ਦੀ ਵਾਰਦਾਤ ਦੀ ਜਾਂਚ ਲਈ ਡਾਗ ਸਕੁਆਇਰ ਟੀਮ ਅਤੇ ਫੋਰਨਸਿਕ ਦੀ ਟੀਮ ਨੂੰ ਬੁਲਾਇਆ ਗਿਆ ਹੈ ਜੋ ਇਸ ਦੀ ਵਾਰਦਾਤ ਦੀ ਜਾਂਚ ਕਰ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਪੁਲਿਸ ਟੀਮ ਉਨ੍ਹਾਂ ਲੁੱਟ ਖੋਹ ਦੇ ਵਿਅਕਤੀਆਂ ਨੂੰ ਕਾਬੂ ਕਰਨ ਦੀ ਪੂਰੀ ਕੋਸ਼ਿਸ਼ ਕਰ ਰਹੀ ਹੈ। ਛੇਤੀ ਤੋਂ ਛੇਤੀ ਉਨ੍ਹਾਂ ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਜਾਵੇਗਾ।
