ਸ੍ਰੀ ਮੁਕਤਸਰ ਸਾਹਿਬ: ਸ੍ਰੀ ਮੁਕਤਸਰ ਸਾਹਿਬ (Sri Muktsar Sahib) ਪੁਲਿਸ ਵੱਲੋਂ 20 ਅਕਤੂਬਰ ਨੂੰ ਇੱਕ ਵਿਧਵਾ ਔਰਤ ਤੋਂ ਫਿਰੌਤੀ ਮੰਗਣ ਦੇ ਦਰਜ ਕੀਤੇ ਗਏ ਮਾਮਲੇ ਨੂੰ ਸੁਲਝਾਇਆ ਗਿਆ। ਇਸ ਮਾਮਲੇ ਵਿਚ ਪੁਲਿਸ ਨੇ 3 ਵਿਅਕਤੀਆਂ ਨੂੰ ਕਾਬੂ ਕੀਤਾ ਹੈ। ਤਕਨੀਕੀ ਸਹਾਇਤਾ ਨਾਲ ਪੁਲਿਸ ਵੱਲੋਂ ਸੁਲਝਾਏ ਇਸ ਕੇਸ ਵਿਚ ਸਾਹਮਣੇ ਆਇਆ ਕਿ ਇਹਨਾਂ 3 ਵਿਅਕਤੀਆਂ ਦਾ ਇੱਕ ਦੋਸਤ ਜ਼ੋ ਦੁਬਈ ਵਿਖੇ ਰਹਿ ਰਿਹਾ ਫਿਰੌਤੀ ਦੀ ਮੰਗਣ ਲਈ ਫੋਨ ਕਰਦਾ ਸੀ।
ਦੱਸ ਦੇਈਏ ਕਿ ਕਾਬੂ ਕੀਤੇ ਵਿਅਕਤੀ ਪੋਲੀਕਲੀਨਿਕ ਦੀ ਮਾਲਕ ਵਿਧਵਾ ਔਰਤ ਤੋਂ 50 ਲੱਖ ਰੁਪਏ ਦੀ ਫਿਰੌਤੀ ਮੰਗ ਰਹੇ ਸਨ।ਪੁਲਿਸ ਅਨੁਸਾਰ ਇਹ ਇੱਕ ਗੈਂਗ ਕੰਮ ਕਰ ਰਿਹਾ ਸੀ ਅਤੇ ਜੋ ਵਿਅਕਤੀ ਇਹਨਾਂ ਦੇ ਕਹਿਣ 'ਤੇ ਫਿਰੌਤੀ ਮੰਗਦਾ ਸੀ, ਉਹ ਦੁਬਈ ਵਿਖੇ ਰਹਿ ਰਿਹਾ ਹੈ।
ਪੁਲਿਸ ਨੂੰ ਇਸ ਮਾਮਲੇ ਵਿਚ ਹੋਰ ਵੀ ਲੋਕਾਂ ਦੇ ਸ਼ਾਮਿਲ ਹੋਣ ਦਾ ਸ਼ੱਕ ਹੈ ਅਤੇ ਡੂੰਘਾਈ ਨਾਲ ਅਗਲੇਰੀ ਪੜਤਾਲ ਕੀਤੀ ਜਾ ਰਹੀ ਹੈ। ਇਸ ਮਾਮਲੇ ਵਿਚ ਅੱਜ ਪ੍ਰੈਸ ਕਾਨਫਰੰਸ਼ ਦੌਰਾਨ ਐਸਐਸਪੀ ਸਰਬਜੀਤ ਸਿੰਘ ਨੇ ਦੱਸਿਆ ਕਿ ਇਸ ਸਾਰੇ ਮਾਮਲੇ ਦਾ ਮੁੱਖ ਕਥਿਤ ਮੁਲਜ਼ਮ ਪਿੰਡ ਸੋਥਾ ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦਾ ਵਾਸੀ ਬੂਟਾ ਸਿੰਘ ਹੈ ਅਤੇ ਉਸ ਨਾਲ ਦੋ ਹੋਰ ਕਥਿਤ ਮੁਲਜ਼ਮ ਫਿਰੋਜਪੁਰ ਜ਼ਿਲ੍ਹੇ ਦੇ ਪਿੰਡ ਗਿੱਲ ਦੇ ਵਾਸੀ ਹਨ।
ਉਨ੍ਹਾਂ ਦੱਸਿਆ ਕਿ ਇਹ ਤਿੰਨੋਂ ਆਪਸ ਵਿਚ ਮਿੱਤਰ ਹਨ। ਬੂਟਾ ਸਿੰਘ ਦੇ ਬੱਚਿਆਂ ਦਾ ਜਨਮ ਉਸੇ ਪੋਲੀਕਲੀਨਿਕ ਵਿਚ ਹੋਇਆ ਜਿਸਦੀ ਮਾਲਕਣ ਤੋਂ ਫਿਰੌਤੀ ਮੰਗੀ ਗਈ। ਬੂਟਾ ਸਿੰਘ ਨੇ ਇਸ ਮਾਮਲੇ ਵਿਚ ਰੈਕੀ ਕਰਕੇ ਪਿੰਡ ਗਿੱਲ ਵਾਸੀ ਦੋਵਾਂ ਨਾਲ ਸੰਪਰਕ ਕੀਤਾ ਅਤੇ ਇਹਨਾਂ ਦਾ ਇੱਕ ਮਿੱਤਰ ਕਾਲਾ ਜ਼ੋ ਕਿ ਦੁਬਈ ਰਹਿੰਦਾ ਹੈ, ਉਸ ਨਾਲ ਗੱਲਬਾਤ ਕੀਤੀ ਗਈ।
ਦੁਬਈ ਤੋਂ ਕਾਲੇ ਨੇ 50 ਲੱਖ ਦੀ ਫਿਰੌਤੀ ਦੀ ਮੰਗ ਲਈ ਉਸ ਔਰਤ ਪਰਮਜੀਤ ਕੌਰ ਨੂੰ ਫੋਨ ਕੀਤਾ। ਪੁਲਿਸ ਨੇ ਮਿਲੀ ਸਿਕਾਇਤ ਦੇ ਅਧਾਰ ਤੇ ਇਸ ਸਬੰਧੀ ਟਰੈਪ ਲਾ ਕੇ ਫਿਲਹਾਲ ਬੂਟਾ ਸਿੰਘ ਵਾਸੀ ਸੋਥਾ ਅਤੇ ਪਿੰਡ ਗਿੱਲ ਵਾਸੀ ਰਾਮਜੀਤ ਸਿੰਘ ਰਾਮਾ ਅਤੇ ਗੁਰਪ੍ਰੀਤ ਸਿੰਘ ਸੱਤੋਂ ਨੂੰ ਕਾਬੂ ਕਰ ਲਿਆ ਹੈ।
ਉਨ੍ਹਾਂ ਕਿਹਾ ਕਿ ਮੁੱਢਲੀ ਪੁੱਛਗਿੱਛ ਵਿਚ ਇਹਨਾਂ ਮੰਨਿਆ ਕਿ ਇਹ ਕੰਮ ਉਹ ਲਾਲਚ ਵਿਚ ਆ ਕੇ ਕਰਦੇ ਸਨ ਅਤੇ ਦੁਬਈ ਤੋਂ ਉਹਨਾਂ ਦਾ ਮਿੱਤਰ ਸਵਰਨਪ੍ਰੀਤ ਸਿੰਘ ਕਾਲਾ ਉਹਨਾਂ ਲਈ ਫਿਰੌਤੀ ਲਈ ਫੋਨ ਕਰਦਾ ਸੀ।
ਇਹ ਵੀ ਪੜ੍ਹੋ: ਨਵਾਂਸ਼ਹਿਰ ਪੁਲਿਸ ਨੇ ਲੁੱਟਾਂ ਖੋਹਾਂ ਕਰਨ ਵਾਲੇ ਵੱਡੇ ਗਿਰੋਹ ਨੂੰ ਕੀਤਾ ਕਾਬੂ
