ਚੰਡੀਗੜ੍ਹ: ਕੇਂਦਰ ਸਰਕਾਰ ਵੱਲੋਂ ਦੇਸ਼ ਵਿੱਚ ਕੋਵਿਡ -19 ਫੈਲਣ ਦੇ ਵੱਡੇ ਪੱਧਰ ਉੱਤੇ ਫੈਲਣ ਤੋਂ ਰੋਕਣ ਲਈ ਵਿਸ਼ੇਸ਼ ਕਦਮ ਚੁੱਕ ਰਹੀ ਹੈ। 15 ਤੋਂ ਵੱਧ ਕੋਰੋਨਾ ਵਾਇਰਸ ਮਾਮਲਿਆਂ ਵਾਲੀ ਕੋਈ ਵੀ ਜਗ੍ਹਾ ਨੂੰ ਰੈਡ ਜ਼ੋਨ ਮੰਨਿਆ ਜਾਵੇਗਾ। ਕੋਰੋਨਾ ਵਾਇਰਸ ਫੈਲਣ ਦੀ ਗੰਭੀਰਤਾ ਦੇ ਅਧਾਰ 'ਤੇ ਸਰਕਾਰ ਪੂਰੇ ਜ਼ੋਨ ਵਿੱਚ ਰੱਖੇ ਜ਼ਿਲ੍ਹਿਆਂ ਉੱਤੇ ਖ਼ਾਸ ਧਿਆਨ ਕੇਂਦ੍ਰਿਤ ਕਰੇਗੀ।
ਇਹ 4 ਜ਼ਿਲ੍ਹੇ ਰੈਡ ਜ਼ੋਨ 'ਚ ਸ਼ਾਮਲ
ਇਸ ਪੈਰਾਮੀਟਰ ਦੇ ਅਨੁਸਾਰ ਸੂਬੇ ਦਾ ਐਸ.ਏ.ਐਸ.ਨਗਰ, ਜਲੰਧਰ, ਪਠਾਨਕੋਟ ਤੇ ਐਸ.ਬੀ.ਐਸ. ਨਗਰ ਜ਼ਿਲ੍ਹੇ ਰੈਡ ਜ਼ੋਨ ਵਿੱਚ ਆਉਂਦੇ ਹਨ, ਕਿਉਂਕਿ ਹਰੇਕ ਜ਼ਿਲ੍ਹੇ ਵਿੱਚ 15 ਤੋਂ ਵੱਧ ਮਾਮਲੇ ਕੋਵਿਡ -19 ਦੇ ਸਾਹਮਣੇ ਆ ਚੁੱਕੇ ਹਨ। ਸਿਹਤ ਵਿਭਾਗ ਦੇ ਬੁਲਾਰੇ ਰਾਜੇਸ਼ ਭਾਸਕਰ ਨੇ ਦੱਸਿਆ ਕਿ, ਕੁੱਲ ਮਿਲਾ ਕੇ, ਰਾਜ ਦੇ 16 ਜ਼ਿਲ੍ਹੇ ਔਰੇਂਜ ਜ਼ੋਨ ਵਿੱਚ ਆਉਂਦੇ ਹਨ, ਜਦਕਿ 4 ਗ੍ਰੀਨ ਜ਼ੋਨ ਵਿੱਚ ਹਨ।
ਐਸ.ਏ.ਐੱਸ.ਨਗਰ ਵਿੱਚ ਸਭ ਤੋਂ ਵੱਧ 56 ਮਾਮਲੇ ਸਾਹਮਣੇ ਆਏ ਹਨ, ਇਸ ਤੋਂ ਬਾਅਦ ਜਲੰਧਰ, ਪਠਾਨਕੋਟ ਅਤੇ ਐਸ.ਬੀ.ਐੱਸ. ਨਗਰ ਵਿੱਚ ਕੋਰੋਨਾ ਵਾਇਰਸ ਦੇ ਲੜੀਵਾਰ 25, 22 ਅਤੇ 19 ਮਾਮਲੇ ਹਨ। ਸਿਹਤ ਵਿਭਾਗ ਦੇ ਬੁਲਾਰੇ ਡੀ. ਰਾਜੇਸ਼ ਭਾਸਕਰ ਨੇ ਪੁਸ਼ਟੀ ਕੀਤੀ ਕਿ ਉਸ ਪੈਰਾਮੀਟਰ ਦੇ ਅਨੁਸਾਰ, ਸਿਰਫ਼ 4 ਜ਼ਿਲ੍ਹੇ ਰੈਡ ਜ਼ੋਨ ਵਿੱਚ ਆਉਂਦੇ ਹਨ।
ਹੋਰ ਚਾਰ ਜ਼ਿਲ੍ਹੇ- ਫਿਰੋਜ਼ਪੁਰ, ਫਾਜ਼ਿਲਕਾ, ਬਠਿੰਡਾ ਅਤੇ ਤਰਨ ਤਾਰਨ ਗ੍ਰੀਨ ਜ਼ੋਨ ਅਤੇ 16 ਔਂਰੇਜ ਜ਼ੋਨ ਵਿੱਚ ਰੱਖੇ ਗਏ ਹਨ। ਉਨ੍ਹਾਂ ਕਿਹਾ ਕਿ ਪੰਜਾਬ ਸਰਕਾਰ ਪਹਿਲਾਂ ਹੀ ਇਹ ਅਭਿਆਸ ਕਰ ਚੁੱਕੀ ਹੈ ਅਤੇ 17 ਜ਼ਿਲ੍ਹਿਆਂ ਦੀ ਪਛਾਣ ਹੌਟਸਪੌਟਸ ਖੇਤਰਾਂ ਵਜੋਂ ਕਰ ਲਈ ਹੈ।
17 ਹੌਟਸਪੌਟਸ 'ਚ ਕੁੱਲ 108 ਕੋਰੋਨਾ ਵਾਇਰਸ ਮਾਮਲੇ
ਇਸ ਤੋਂ ਪਹਿਲਾਂ, ਰਾਜ ਦੇ ਸਿਹਤ ਵਿਭਾਗ ਨੇ ਉਨ੍ਹਾਂ ਖੇਤਰਾਂ ਨੂੰ ਸ਼੍ਰੇਣੀਬੱਧ ਕੀਤਾ, ਜਿੱਥੇ 2 ਜਾਂ 2 ਤੋਂ ਵੱਧ ਕੋਰੋਨਾ ਵਾਇਰਸ ਦੇ ਪੁਸ਼ਟੀ ਕੀਤੇ ਮਾਮਲੇ ਸਾਹਮਣੇ ਆਏ ਹਨ। ਇਹ ਹੌਟਸਪੌਟ ਕਮਿਊਨਿਟੀ ਫੈਲਣ ਦੀ ਸੰਭਾਵਨਾ ਵਜੋਂ ਵੇਖੇ ਜਾ ਰਹੇ ਹਨ। ਰਾਜ ਵਿੱਚ ਇਸ ਤਰ੍ਹਾਂ ਦੇ 17 ਹੌਟਸਪੌਟਸ ਵਿਚੋਂ ਕੁੱਲ 108 ਮਾਮਲੇ ਸਾਹਮਣੇ ਆਏ ਹਨ।
ਸਿਹਤ ਵਿਭਾਗ ਵੱਲੋਂ ਤਿਆਰ ਕੀਤੀ ਸੂਚੀ ਅਨੁਸਾਰ ਮੁਹਾਲੀ ਜ਼ਿਲ੍ਹੇ ਵਿੱਚ 6 ਹੌਟਸਪੌਟ ਖੇਤਰ ਹਨ। ਇਸ ਤੋਂ ਬਾਅਦ ਐਸਬੀਐਸ ਨਗਰ, ਅੰਮ੍ਰਿਤਸਰ ਅਤੇ ਜਲੰਧਰ ਜ਼ਿਲ੍ਹਿਆਂ ਵਿੱਚ 2-2 ਅਤੇ ਹੁਸ਼ਿਆਰਪੁਰ, ਲੁਧਿਆਣਾ, ਮਾਨਸਾ, ਪਠਾਨਕੋਟ ਅਤੇ ਰੋਪੜ ਵਿਚ 1-1 ਹੌਟਸਪੌਟ ਖੇਤਰ ਆਉਂਦਾ ਹੈ।
ਇਸ ਦੌਰਾਨ ਪਿਛਲੇ 24 ਘੰਟਿਆਂ ਵਿੱਚ ਰਾਜ ਵਿੱਚ ਪਟਿਆਲਾ ਅਤੇ ਸੰਗਰੂਰ ਤੋਂ ਕੇਵਿਡ -19 ਦੇ 2 ਤਾਜ਼ਾ ਮਾਮਲੇ ਸਾਹਮਣੇ ਆਏ ਹਨ। ਇਸ ਤੋਂ ਇਲਾਵਾ, ਵਿਭਾਗ ਦੇ ਅਨੁਸਾਰ, ਹੁਣ ਤੱਕ 5,193 ਸ਼ੱਕੀ ਮਾਮਲਿਆਂ ਦੇ ਨਮੂਨੇ ਜਾਂਚ ਲਈ ਭੇਜੇ ਗਏ ਹਨ। ਉਨ੍ਹਾਂ ਵਿਚੋਂ, 4,404 ਨਮੂਨੇ ਨੈਗੇਟਿਵ ਪਾਏ ਗਏ ਅਤੇ 603 ਰਿਪੋਰਟਾਂ ਦੇ ਨਤੀਜੇ ਦੀ ਉਡੀਕ ਹੈ।
ਜ਼ਿਕਰਯੋਗ ਹੈ ਕਿ ਕੇਂਦਰ ਸਰਕਾਰ ਵਲੋਂ ਜਾਰੀ ਕੀਤੀ ਗਈ ਸੂਚੀ ਦੇ ਅਨੁਸਾਰ, ਦੇਸ਼ ਦੇ ਕੁੱਲ 170 ਜ਼ਿਲ੍ਹੇ ਰੈਡ ਜ਼ੋਨ ਵਿੱਚ ਆਉਂਦੇ ਹਨ, ਔਂਰੇਜ ਜ਼ੋਨ ਵਿੱਚ 207 ਜ਼ਿਲ੍ਹੇ ਅਤੇ ਗ੍ਰੀਨ ਜ਼ੋਨ ਵਿੱਚ 353 ਜ਼ਿਲ੍ਹੇ ਪੈਂਦੇ ਹਨ।
ਇਹ ਵੀ ਪੜ੍ਹੋ: ਸੈਨੇਟਾਈਜ਼ੇਸ਼ਨ ਟਨਲ 'ਚੋਂ ਲੰਘਣਾ ਹੁਣ ਸਿਹਤਯਾਬ ਨਹੀਂ
