ਬਰਨਾਲਾ: ਕੇਂਦਰ ਸਰਕਾਰ (Central Government) ਵੱਲੋਂ ਬਣਾਏ ਗਏ ਤਿੰਨ ਖੇਤੀ ਕਾਨੂੰਨਾਂ ਨੂੰ ਲੈ ਕੇ ਕਿਸਾਨ ਅੰਦੋਲਨ (kissan struggle ) ਦਿੱਲੀ ਦੀਆਂ ਹੱਦਾਂ ‘ਤੇ 9 ਮਹੀਨਿਆਂ ਤੋਂ ਜਾਰੀ ਹੈ। ਪੰਜਾਬ ਭਰ ਵਿੱਚੋਂ ਕਿਸਾਨ ਖੇਤੀ ਕਾਨੂੰਨ ਰੱਦ ਕਰਵਾਉਣ ਲਈ ਦਿੱਲੀ ਕਿਸਾਨੀ ਸੰਘਰਸ਼ ਵਿੱਚ ਆਪਣੀ ਸ਼ਮੂਲੀਅਤ ਕਰ ਰਹੇ ਹਨ। ਜਿਸਦੇ ਚੱਲਦਿਆਂ ਤਪਾ ਮੰਡੀ ਦੇ ਨੇੜਲੇ ਪਿੰਡ ਤਾਜੋਕੇ ਦਾ 30 ਸਾਲ ਦਾ ਨੌਜਵਾਨ ਕਿਸਾਨ ਜਗਤਾਰ ਸਿੰਘ ਵੀ 8 ਦਸੰਬਰ 2020 ਤੋਂ ਦਿੱਲੀ ਦੇ ਟਿਕਰੀ ਬਾਰਡਰ ‘ਤੇ ਕਿਸਾਨੀ ਸੰਘਰਸ਼ ਵਿੱਚ ਆਪਣਾ ਸਹਿਯੋਗ ਦੇਣ ਲਈ ਗਿਆ ਹੋਇਆ ਸੀ।
ਕਿਸਾਨ ਜਗਤਾਰ ਸਿੰਘ ਭਾਰਤੀ ਕਿਸਾਨ ਯੂਨੀਅਨ ਡਕੌਂਦਾ ਰਾਹੀਂ ਦਿੱਲੀ ਗਿਆ ਪਰ 9 ਮਹੀਨੇ ਬਾਅਦ ਘਰ ਵਾਪਸੀ ਦੌਰਾਨ ਰਸਤੇ ਵਿੱਚ ਹਾਦਸੇ ਦਾ ਸ਼ਿਕਾਰ ਹੋ ਗਿਆ। ਰਸਤੇ ਵਿੱਚ ਪਿੰਡ ਆਉਣ ਸਮੇਂ ਟਰੇਨ ਵਿੱਚ ਉਸਦੀ ਅਣਪਛਾਤਿਆਂ ਵਲੋਂ ਕੁੱਟਮਾਰ ਕਰ ਦਿੱਤੀ ਗਈ। ਉਸਤੋਂ ਮੋਬਾਇਲ ਅਤੇ ਨਕਦੀ ਖੋਹ ਲਈ ਗਈ। ਚਾਰ ਦਿਨ ਬੇਹੋਸ਼ੀ ਦੇ ਚੱਲਦਿਆਂ ਜ਼ਖ਼ਮੀ ਹਾਲਤ ਵਿੱਚ ਜਗਤਾਰ ਰਾਜਸਥਾਨ ਦੇ ਬੀਕਾਨੇਰ ਚਲਿਆ ਗਿਆ। ਜਿੱਥੇ ਖਾਲਸਾ ਏਡ ਦੇ ਵਾਲੰਟੀਅਰਾਂ ਨੇ ਉਸਦੀ ਜਾਨ ਬਚਾ ਕੇ ਘਰ ਪਹੁੰਚਾਇਆ ਹੈ।
ਕਿਸਾਨ ਜਗਤਾਰ ਸਿੰਘ ਨੇ ਦੱਸਿਆ ਕਿ ਖੇਤੀ ਕਾਨੂੰਨਾਂ ਦੇ ਵਿਰੋਧ ਵਜੋਂ ਕਿਸਾਨੀ ਸੰਘਰਸ਼ ਵਿੱਚ ਉਹ ਪਿਛਲੇ 9 ਮਹੀਨਿਆਂ ਤੋਂ ਦਿੱਲੀ ਗਿਆ ਹੋਇਆ ਸੀ। ਜਿੱਥੇ ਟਿਕਰੀ ਬਾਰਡਰ ‘ਤੇ ਬਾਬਾ ਕਸ਼ਮੀਰ ਸਿੰਘ ਭੂਰੀ ਵਾਲੇ ਅੰਮ੍ਰਿਤਸਰ ਸਾਹਿਬ ਵੱਲੋਂ ਕਿਸਾਨਾਂ ਲਈ ਚਲਾਏ ਗਏ ਲੰਗਰ ਵਿਚ ਸੇਵਾ ਕਰਦਾ ਸੀ। ਜਦੋਂ ਉਹ ਦਿੱਲੀ ਤੋਂ ਆਪਣੇ ਪਰਿਵਾਰ ਨੂੰ ਮਿਲਣ ਲਈ ਬਹਾਦਰਗੜ੍ਹ ਤੋਂ ਟ੍ਰੇਨ ਰਾਹੀਂ ਪਿੰਡ ਆ ਰਿਹਾ ਸੀ ਤਾਂ ਜਦ ਟ੍ਰੇਨ ਜੀਂਦ ਅਤੇ ਰੋਹਤਕ ਪੁੱਜੀ ਤਾਂ ਚੱਲਦੀ ਟਰੇਨ ਦੇ ਡੱਬੇ ਵਿੱਚ ਘੱਟ ਸਵਾਰੀਆਂ ਨਾ ਹੋਣ ਕਾਰਨ 4 ਅਣਪਛਾਤੇ ਨੌਜਵਾਨਾਂ ਨੇ ਉਸ ‘ਤੇ ਜਾਨਲੇਵਾ ਹਮਲਾ ਕਰ ਦਿੱਤਾ ਅਤੇ ਉਸ ਨੂੰ ਕੋਈ ਬੇਹੋਸ਼ੀ ਵਾਲਾ ਪਦਾਰਥ ਵੀ ਸੁੰਘਾ ਦਿੱਤਾ।
ਕਿਸਾਨ ਨੇ ਦੱਸਿਆ ਕਿ ਉਸ ਦੀ ਬੇਰਹਿਮੀ ਨਾਲ ਕੁੱਟਮਾਰ ਕਰਨੀ ਸ਼ੁਰੂ ਕਰ ਦਿੱਤੀ। ਉਸਨੇ ਦੱਸਿਆ ਕਿ ਅਣਪਛਾਤੇ ਨੌਜਵਾਨਾਂ ਨੇ ਉਸਦੀ ਜੇਬ ਵਿੱਚੋਂ 7 ਹਜ਼ਾਰ ਨਕਦੀ 13 ਹਜ਼ਾਰ ਰੁਪਏ ਦੀ ਕੀਮਤ ਵਾਲਾ ਮੋਬਾਇਲ ਫੋਨ ਅਤੇ ਕੱਪੜੇ ਵੀ ਲੈ ਕੇ ਫ਼ਰਾਰ ਹੋ ਗਏ।
ਕਿਸਾਨ ਜਗਤਾਰ ਸਿੰਘ 2 ਦਿਨ ਟ੍ਰੇਨ ਵਿਚ ਹੀ ਬੇਹੋਸ਼ ਪਿਆ ਰਿਹਾ। ਜਦੋਂ ਟ੍ਰੇਨ ਰਾਜਸਥਾਨ ਦੇ ਬੀਕਾਨੇਰ ਪੁੱਜੀ ਤਾਂ ਲੋਕਾਂ ਨੇ ਉਸ ਨੂੰ ਬੀਕਾਨੇਰ ਦੇ ਸਰਕਾਰੀ ਹਸਪਤਾਲ ਵਿੱਚ ਜ਼ੇਰੇ ਇਲਾਜ ਦਾਖਲ ਕਰਵਾ ਦਿੱਤਾ। ਜਿੱਥੇ ਖ਼ਾਲਸਾ ਏਡ ਦੇ ਨੌਜਵਾਨਾਂ ਨੇ ਉਸਦੀ ਮਦਦ ਕੀਤੀ। ਹਸਪਤਾਲ ਵਿਚ 4 ਦਿਨ ਉਸਦਾ ਇਲਾਜ ਚੱਲਿਆ।
ਜ਼ਖ਼ਮੀ ਕਿਸਾਨ ਜਗਤਾਰ ਸਿੰਘ ਨੂੰ ਖ਼ਾਲਸਾ ਏਡ (Khalsa Aid) ਅਤੇ ਸਮਾਜ ਸੇਵੀ ਸੰਸਥਾਵਾਂ ਵੱਲੋਂ ਉਹਦੇ ਪਿੰਡ ਤਾਜੋਕੇ ਵਿਖੇ ਸਵੇਰੇ ਲਿਆਂਦਾ ਗਿਆ। ਜ਼ਖ਼ਮੀ ਜਗਤਾਰ ਸਿੰਘ ਦੇ ਹੌਸਲੇ ਅਜੇ ਵੀ ਬੁਲੰਦ ਹਨ। ਉਨ੍ਹਾਂ ਕਿਹਾ ਕਿ ਜਦੋਂ ਸਿਹਤਮੰਦ ਹੋ ਜਾਂਦੇ ਹਨ ਤਾਂ ਦੁਬਾਰਾ ਫੇਰ ਕਿਸਾਨੀ ਸੰਘਰਸ਼ ਵਿਚ ਸੇਵਾ ਕਰਨ ਲਈ ਦਿੱਲੀ ਜਾਣਗੇ।
