ਬਰਨਾਲਾ: ਇੱਥੋ ਦੇ ਪਿੰਡ ਭਦੌੜ ਦਾ ਸਰਕਾਰੀ ਹਸਪਤਾਲ ਅਕਸਰ ਹੀ ਸੁਰਖ਼ੀਆਂ ਵਿੱਚ ਰਹਿੰਦਾ ਹੈ। ਬੀਤੇ ਲੰਮੇ ਸਮੇਂ ਤੋਂ ਡਾਕਟਰਾਂ ਦੀ ਭਾਰੀ ਘਾਟ ਦੇ ਮੱਦੇਨਜ਼ਰ ਅਕਸਰ ਹੀ ਮਰੀਜ਼ਾਂ ਨੂੰ ਇਲਾ ਲਈ ਖੱਜਲ-ਖੁਆਰ ਹੋਣਾ ਪੈਂਦਾ ਹੈ। ਹੈਰਾਨੀ ਕਰਨ ਵਾਲੀ ਗੱਲ ਇਹ ਸਾਹਮਣੇ ਆਈ ਕਿ ਜੋ ਡਾਕਟਰ ਇੱਥੇ ਮੌਜੂਦ ਹਨ, ਉਸ ਵੱਲੋਂ ਵੀ ਡਿਊਟੀ ਦੌਰਾਨ ਅਕਸਰ ਹੀ ਨਸ਼ੇ ਵਿੱਚ ਧੁੱਤ ਰਹਿਣ ਕਾਰਨ ਮਰੀਜਾਂ ਨੂੰ ਭਾਰੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਉਕਤ ਡਾਕਟਰ ਨੂੰ ਪਹਿਲਾਂ ਵੀ ਡਿਊਟੀ ਮੌਕੇ ਹਸਪਤਾਲ ਅਤੇ ਸਰਕਾਰੀ ਕੁਆਟਰਾਂ ਵਿੱਚ ਸ਼ਰਾਬ ਪੀਂਦੇ ਵੇਖਿਆ ਗਿਆ ਹੈ। ਸ਼ਰਾਬੀ ਡਾਕਟਰ ਦੀ ਸ਼ਿਕਾਇਤ ਮਿਲਣ 'ਤੇ ਅੱਜ ਹਲਕਾ ਭਦੌੜ ਦੇ ਵਿਧਾਇਕ ਪਿਰਮਲ ਸਿੰਘ ਧੌਲਾ ਨੇ ਸਿਵਲ ਹਸਪਤਾਲ ਭਦੌੜ ਵਿੱਚ ਜਾ ਕੇ ਵੇਖਿਆ ਤਾਂ ਸਰਕਾਰੀ ਡਾਕਟਰ ਬਿਕਰਮ ਨੂੰ ਸ਼ਰਾਬੀ ਹਾਲਤ ਵਿੱਚ ਪਾਇਆ।
ਵਿਧਾਇਕ ਨੇ ਜਦ ਡਾਕਟਰ ਨਾਲ ਗੱਲ ਕਰਨੀ ਚਾਹੀ ਤਾਂ ਡਾਕਟਰ ਗ਼ਲਤ ਢੰਗ ਨਾਲ ਪੇਸ਼ ਆਇਆ। ਵਿਧਾਇਕ ਪਿਰਮਲ ਸਿੰਘ ਧੌਲਾ ਨੇ ਇਸ ਡਾਕਟਰ ਵਿਰੁੱਧ ਸਿਵਲ ਸਰਜਨ, ਬਰਨਾਲਾ ਨੂੰ ਫ਼ੋਨ ਕਰਕੇ ਜਾਣਕਾਰੀ ਦਿੰਦਿਆਂ ਕਾਰਵਾਈ ਦੀ ਮੰਗ ਕੀਤੀ ਹੈ।
ਇਸ ਸਬੰਧੀ ਜਦ ਉਕਤ ਡਾਕਟਰ ਦਾ ਪੱਖ ਜਾਣਿਆਂ ਤਾਂ ਉਸ ਨੇ ਆਖਿਆ ਓਹ ਬਹੁਤ ਵਧੀਆ ਕੰਮ ਕਰ ਕੇ ਲੋਕਾਂ ਦੀ ਸੇਵਾ ਕਰਦੇ ਆ ਰਹੇ ਹਨ। ਕਦੇ ਵੀ ਗ਼ਰੀਬ ਮਰੀਜ਼ਾਂ ਲਈ ਮਹਿੰਗੇ ਭਾਅ ਦੀ ਦਵਾਈ ਨਹੀਂ ਲਿਖਦਾ ਪਰ ਸ਼ਰਾਬ ਸਬੰਧੀ ਪੁੱਛੇ ਜਾਣ 'ਤੇ ਡਾਕਟਰ ਬਿਕਰਮਜੀਤ ਸਿੰਘ ਕੋਈ ਸਪਸ਼ਟੀਕਰਨ ਨਹੀਂ ਦੇ ਸਕਿਆ।
ਇਸ ਸਬੰਧੀ ਜਦ ਭਦੌੜ ਦਾ ਵਾਧੂ ਚਾਰਜ ਦੇਖ਼ ਰਹੇ ਐੱਸ.ਐੱਮ.ਓ ਡਾ. ਰਾਜ ਕੁਮਾਰ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਆਖਿਆ ਕਿ ਉਹ ਇਸ ਸਬੰਧੀ ਮਹਿਕਮੇ ਨੂੰ ਕਾਰਵਾਈ ਲਈ ਲਿਖ਼ਤੀ ਸ਼ਿਕਾਇਤ ਭੇਜ ਰਹੇ ਹਨ।
