ਬਰਨਾਲਾ: ਪੁਲਿਸ ਵੱਲੋਂ 2 ਦੁਕਾਨਦਾਰਾਂ ਦੇ ਗੋਦਾਮਾਂ 'ਚ ਛਾਪੇਮਾਰੀ ਕਰਕੇ ਭਾਰੀ ਮਾਤਰਾ ਵਿੱਚ ਪਟਾਖੇ ਬਰਾਮਦ ਕੀਤੇ ਗਏ ਹਨ। ਸ਼ਹਿਰ ਦੇ ਫ਼ਰਵਾਹੀ ਰੋਡ ’ਤੇ ਪੁਲਿਸ ਵਲੋਂ 610 ਵੱਡੇ ਪਟਾਖਿਆਂ ਦੇ ਡੱਬੇ ਬਰਾਮਦ ਕਰਕੇ 2 ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਪੁਲਿਸ ਮੁਤਾਬਕ 4 ਟਰੱਕ ਪਟਾਖਿਆਂ ਦੇ ਮਿਲਣਾ ਸ਼ਹਿਰ ਨਿਵਾਸੀਆਂ ਲਈ 1 ਖ਼ਤਰਨਾਕ ਗੱਲ ਹੈ। ਕਿਉਂਕਿ ਪਟਾਖਿਆਂ ਦੀ ਏਨੀ ਭਾਰੀ ਮਾਤਰਾ ਕਿਸੇ ਵੀ ਸਮੇਂ ਕੋਈ ਵੱਡੀ ਘਟਨਾ ਨੂੰ ਅੰਜਾਮ ਦੇ ਸਕਦੀ ਸੀ।
ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਬਰਨਾਲਾ ਦੇ ਡੀਐਸਪੀ ਲਖਵੀਰ ਸਿੰਘ ਟਿਵਾਣਾ ਨੇ ਦੱਸਿਆ ਕਿ ਕੁੱਝ ਸਮਾਂ ਪਹਿਲਾਂ ਅੰਮ੍ਰਿਤਸਰ ਅਤੇ ਹੋਰ ਇਲਾਕਿਆਂ ਵਿੱਚ ਪਟਾਖਿਆਂ ਦੇ ਗੈਰ ਕਾਨੂੰਨਾਂ ਭੰਡਾਰਨ ਕਾਰਨ ਕਈ ਵੱਡੇ ਵਿਸਫ਼ੋਟ ਹੋਣ ਕਾਰਨ ਕੀਮਤੀ ਜਾਨਾਂ ਜਾ ਚੁੱਕੀਆਂ ਹਨ। ਇਸ ਦੇ ਬਾਅਦ ਪੰਜਾਬ ਸਰਕਾਰ ਦੇ ਆਦੇਸ਼ਾਂ ਮੁਤਾਬਕ ਬਰਨਾਲਾ ਦੇ ਐਸਐਸਪੀ ਸੰਦੀਪ ਗੋਇਲ ਦੇ ਨਿਰਦੇਸ਼ਾਂ ਤਹਿਤ ਸ਼ਹਿਰ ਦੇ ਨਜ਼ਦੀਕ ਫ਼ਰਵਾਹੀ ਰੋਡ ’ਤੇ ਬਣੇ ਗੈਰ ਕਾਨੂੰਨਾਂ ਪਟਾਖਿਆਂ ਦੇ ਅੱਡੇ ਦਾ ਪਰਦਾਫ਼ਾਸ ਕੀਤਾ ਗਿਆ ਹੈ।
ਉਨ੍ਹਾਂ ਦੱਸਿਆ ਕਿ ਪਟਾਖਿਆਂ ਦੇ ਇਨ੍ਹਾਂ ਅੱਡਿਆਂ ਤੋਂ ਪੁਲਿਸ ਨੂੰ 610 ਡੱਬੇ ਵੱਡੇ ਪਟਾਖਿਆਂ ਦੇ ਬਰਾਮਦ ਹੋਏ ਹਨ। ਪਟਾਖਿਆਂ ਦੀ ਮਾਤਰਾ ਏਨੀ ਜ਼ਿਆਦਾ ਹੈ ਕਿ ਚਾਰ ਟਰੱਕਾਂ ਵਿੱਚ ਵੀ ਨਹੀਂ ਆਏ। ਪੁਲਿਸ ਵੱਲੋਂ ਇਸ ਮਾਮਲੇ ਵਿੱਚ 2 ਵਿਆਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਜਾ ਚੁੱਕਿਆ ਹੈ ਅਤੇ ਅੱਗੇ ਵੀ ਇਸ ਦੀ ਪੜਤਾਲ ਜਾਰੀ ਹੈ। ਇਸ ਵਿੱਚ ਹੋਰ ਵੀ ਜੋ ਵਿਅਕਤੀ ਜੁੜੇ ਹੋਏ ਹਨ, ਉਨ੍ਹਾਂ ਨੂੰ ਵੀ ਬਖ਼ਸਿਆ ਨਹੀਂ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਇਨ੍ਹਾਂ ਪਟਾਖਿਆਂ ਨੂੰ ਪੰਜਾਬ ਸਰਕਾਰ ਤੋਂ ਮੰਜ਼ੂਰਸ਼ੁਦਾ ਭੰਡਾਰ ਵਾਲੀ ਜਗਾ ’ਤੇ ਭੇਜਿਆ ਜਾਵੇਗਾ। ਗ੍ਰਿਫ਼ਤਾਰ ਕੀਤੇ ਗਏ ਵਿਅਕਤੀਆਂ ਵਿਰੁੱਧ ਵੱਖ- ਵੱਖ ਧਾਰਾਵਾਂ ਤਹਿਤ ਪਰਚਾ ਦਰਜ਼ ਕੀਤਾ ਗਿਆ ਹੈ।
