ਅੰਮ੍ਰਿਤਸਰ: ਮੋਹਾਲੀ ਪੁਲਿਸ ਵੱਲੋਂ ਨਸ਼ਾ ਤਸਕਰੀ ਦੇ ਦੋਸ਼ ਤਹਿਤ 2 ਅੰਤਰ ਰਾਸ਼ਟਰੀ ਨਸ਼ਾ ਤਸਕਰਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਪੁਲਿਸ ਮੁਤਾਬਿਕ ਹਵੇਲੀਆਂ ਪਿੰਡ ਦਾ ਰਹਿਣ ਵਾਲਾ ਬਲਵਿੰਦਰ ਸਿੰਘ ਉਰਫ ਬਿੱਲਾ 'ਤੇ ਚੰਡੀਗੜ੍ਹ ਦਾ ਅਮਰੀਕ ਸਿੰਘ ਦੋਵੇਂ ਹੀ ਮੋਸਟ ਵਾਂਟੇਡ ਤਸਕਰ ਹਨ ਅਤੇ ਇਨ੍ਹਾਂ ਦੀ ਪੁਲਿਸ ਨੂੰ ਲੰਮੇ ਸਮੇਂ ਤੋਂ ਤਲਾਸ਼ ਸੀ।
ਸੂਤਰਾਂ ਮੁਤਾਬਕ ਬਲਵਿੰਦਰ ਸਿੰਘ ਬਿੱਲਾ ਦੀ ਸਿਆਸੀ ਗਲਿਆਰਿਆਂ ਵਿੱਚ ਪਹੁੰਚ ਦੇ ਨਾਲ-ਨਾਲ ਪੁਲਿਸ ਪ੍ਰਸ਼ਾਸ਼ਨ ਵਿੱਚ ਵੀ ਪੁਰਾ ਦਬਦਬਾ ਸੀ। ਬਿੱਲੇ ਦੇ ਤਰਨ ਤਾਰਨ ਦੇ ਸਾਬਕਾ ਅਕਾਲੀ ਵਿਧਾਇਕ ਦੇ ਨਾਲ ਨਾਲ ਪੁਲਿਸ ਦੇ ਉਚ ਅਧਿਕਾਰੀਆਂ ਨਾਲ ਵੀ ਸਬੰਧ ਸਨ। ਅਕਾਲੀ ਦਲ ਵੱਲੋਂ ਬਿੱਲੇ ਨੂੰ ਜ਼ਿਲ੍ਹਾ ਤਰਨ ਤਾਰਨ ਦੀ ਕਬੱਡੀ ਐਸੋਸੀਏਸ਼ਨ ਦਾ ਚੇਅਰਮੈਨ ਬਣਾਇਆ ਗਿਆ ਸੀ।
ਬਿੱਲੇ ਨੇ ਆਪਣੇ ਜੱਦੀ ਪਿੰਡ ਹਵੇਲੀਆਂ ਤੋਂ ਇਲਾਵਾ ਅੰਮ੍ਰਿਤਸਰ, ਜਲੰਧਰ 'ਤੇ ਮੋਹਾਲੀ ਵਿੱਚ ਵੀ ਕਰੋੜਾਂ ਦੀ ਜਾਇਦਾਦ ਖ਼ਰੀਦੀ ਹੋਈ ਸੀ। ਪੁਲਿਸ ਕਸਟਮ ਵਿਭਾਗ ਵੱਲੋਂ ਫੜੀ ਗਈ 532 ਕਿੱਲੋ ਹੈਰੋਇਨ ਦੇ ਮਾਮਲੇ ਵਿੱਚ ਵੀ ਬਿੱਲੇ ਕੋਲੋਂ ਪੁੱਛ ਗਿੱਛ ਜਾਰੀ ਹੈ।
ਇਸ ਸਬੰਧੀ ਮੋਹਾਲੀ ਦੇ ਐੱਸ.ਐੱਸ.ਪੀ. ਕੁਲਦੀਪ ਸਿੰਘ ਚਾਹਲ ਨੇ ਪੱਤਰਕਾਰਾਂ ਨਾਲ ਗੱਲ ਬਾਤ ਕਰਦਿਆਂ ਦੱਸਿਆ ਕਿ ਬਲਵਿੰਦਰ ਸਿੰਘ ਬਿੱਲਾ ਖਿਲਾਫ਼ ਪਹਿਲਾਂ ਵੀ 14 ਪਰਚੇ ਦਰਜ ਸਨ ਅਤੇ ਪਿਛਲੇ 5 ਮਹੀਨਿਆਂ ਤੋਂ ਪੁਲਿਸ ਲਗਾਤਾਰ ਇਸਦੀ ਭਾਲ ਵਿੱਚ ਸੀ। ਬਲਵਿੰਦਰ ਸਿੰਘ ਬਿੱਲਾ ਦੀਆਂ ਅਕਾਲੀ ਵਿਧਾਇਕਾਂ ਨਾਲ ਤਸਵੀਰਾਂ ਨੇ ਅਕਾਲੀ ਦਲ ਨੂੰ ਕਟਗਹਿਰੇ ਵਿੱਚ ਖੜਾ ਕਰ ਦਿੱਤਾ ਹੈ।
