ਮੁੰਬਈ: ਬਾਲੀਵੁੱਡ ਅਦਾਕਾਰਾ ਕੰਗਨਾ ਰਣੌਤ ਅਤੇ ਫਿਲਮ ਇੰਡਸਟਰੀ 'ਚ ਉਸ ਦੇ ਸਹਿ-ਵਰਕਰਾਂ ਦਰਮਿਆਨ ਲੜਾਈ ਜਾਰੀ ਹੈ ਅਤੇ ਇਸ ਵਾਰ ਕੰਗਨਾ ਨੇ ਅਦਾਕਾਰਾ ਸੋਨਮ ਕਪੂਰ ਨੂੰ ਨਿਸ਼ਾਨਾ ਬਣਾਇਆ ਹੈ। ਉਹ ਸੁਸ਼ਾਂਤ ਮਾਮਲੇ 'ਚ ਦੋਸ਼ੀ ਅਦਾਕਾਰਾ ਰੀਆ ਚੱਕਰਵਰਤੀ ਨੂੰ ਆਪਣਾ ਸਮਰਥਨ ਦੇ ਰਹੀ ਹੈ, ਜਿਸ ਨੂੰ ਕੰਗਨਾ ਨੇ 'ਸਮਾਲ ਟਾਈਮ ਡਰੱਗੀ' ਕਹਿ ਕੇ ਬੁਲਾਇਆ ਹੈ।
ਕੰਗਨਾ ਨੇ ਵੀਰਵਾਰ ਸ਼ਾਮ ਨੂੰ ਆਪਣੇ ਅਧਿਕਾਰਤ ਅਕਾਊਂਟ ਤੋਂ ਟਵੀਟ ਕੀਤਾ, “ਮਾਫੀਆ ਬਿੰਬੋ ਨੇ ਅਚਾਨਕ ਮੇਰੇ ਘਰ ਬਾਰੇ ਦੁੱਖ ਪ੍ਰਗਟ ਕਰਦਿਆਂ ਰੀਆ ਜੀ ਦੇ ਲਈ ਇਨਸਾਫ਼ ਦੀ ਮੰਗ ਕਰਨੀ ਸ਼ੁਰੂ ਕਰ ਦਿੱਤੀ। ਮੇਰੀ ਲੜਾਈ ਲੋਕਾਂ ਦੇ ਲਈ ਹੈ। ਮੇਰੇ ਸੰਘਰਸ਼ਾਂ ਦੀ ਤੁਲਨਾ ਕਿਸੇ 'ਸਮਾਲ ਟਾਈਮ ਡਰੱਗੀ' ਦੇ ਨਾਲ ਨਾ ਕਰੋ, ਜੋ ਆਪਣੇ ਦੱਮ 'ਤੇ ਸਟਾਰ ਬਣੇ ਵਿਅਕਤੀ ਦੇ ਟੁਕੜਿਆਂ 'ਤੇ ਪਲ ਰਹੀ ਸੀ। ਅਜਿਹਾ ਕਰਨਾ ਬੰਦ ਕਰੋ। "
ਦਰਅਸਲ, ਬੀਐਮਸੀ ਵੱਲੋਂ ਗ਼ੈਰ-ਕਾਨੂੰਨੀ ਉਸਾਰੀ ਦੇ ਦੋਸ਼ ਲਾਉਂਦਿਆਂ ਕੰਗਨਾ ਦੇ ਦਫ਼ਤਰ ਨੂੰ ਨੁਕਸਾਨ ਪਹੁੰਚਾਏ ਜਾਣ ਦੇ ਮਾਮਲੇ ’ਤੇ ਆਪਣੀ ਪ੍ਰਤੀਕਿਰਿਆ ਦਿੰਦੇ ਹੋਏ ਸੋਨਮ ਨੇ ਲਿਖਿਆ ਸੀ, “ਅੱਖ ਦੇ ਬਦਲੇ ਅੱਖ ਨਾਲ ਪੂਰੀ ਦੁਨੀਆ ਅੰਨ੍ਹੀ ਹੀ ਹੋ ਜਾਵੇਗੀ।”
ਸੋਨਮ ਨੇ ਅਦਾਕਾਰਾ ਦੀਆ ਮਿਰਜ਼ਾ ਦੇ ਇੱਕ ਟਵੀਟ 'ਤੇ ਆਪਣੀ ਟਿੱਪਣੀ ਕਰਦਿਆਂ ਕਿਹਾ, "ਕੰਗਨਾ ਦੇ ਦਫ਼ਤਰ ਵਿੱਚ ਹੋਏ ਤੋੜ-ਫੋੜ ਦੀ ਨਿੰਦਾ ਕਰਦੀ ਹਾਂ। ਰੀਆ ਦੇ ਖ਼ਿਲਾਫ਼ ਪ੍ਰੇਸ਼ਾਨ ਕਰਨ ਅਤੇ ਬਦਸਲੂਕੀ ਦੀ ਨਿੰਦਾ ਕਰਦੀ ਹਾਂ। ਮੈਂ ਇੱਥੇ ਕਿਸੇ ਦਾ ਪੱਖ ਨਹੀਂ ਲੈ ਰਹੀ, ਜੋ ਸਹੀ ਹੈ ਉਸ 'ਤੇ ਆਪਣੀ ਗੱਲ ਰੱਖ ਰਹੀ ਹਾਂ। ਯਾਦ ਰੱਖੋ ਕਿ ਇਹ ਤੁਹਾਡੇ ਨਾਲ ਵੀ ਹੋ ਸਕਦਾ ਹੈ।"
