ਚੰਡੀਗੜ੍ਹ: 1 ਨਵੰਬਰ ਨੂੰ ਸਿਨੇਮਾ ਘਰਾਂ 'ਚ ਰਿਲੀਜ਼ ਹੋਣ ਵਾਲੀ ਫ਼ਿਲਮ ਡਾਕਾ ਦੀ ਸਟਾਰਕਾਸਟ ਨੇ ਈਟੀਵੀ ਭਾਰਤ ਨਾਲ ਖ਼ਾਸ ਗੱਲਬਾਤ ਕੀਤੀ। ਇਸ ਖ਼ਾਸ ਗੱਲਬਾਤ 'ਚ ਜਦੋਂ ਗਿੱਪੀ ਗਰੇਵਾਲ ਨੂੰ ਇਹ ਪੁਛਿੱਆ ਗਿਆ ਕਿ ਇੰਨੀ ਛੇਤੀ ਤਾਂ ਅਕਸ਼ੇ ਕੁਮਾਰ ਨਹੀਂ ਪਰਦੇ 'ਤੇ ਨਜ਼ਰ ਆਉਂਦੇ ਜਿੰਨੀ ਛੇਤੀ ਤੁਸੀਂ ਆ ਜਾਂਦੇ ਹੋ ਤਾਂ ਇਸ ਗੱਲ ਦਾ ਜਵਾਬ ਉਨ੍ਹਾਂ ਇਹ ਦਿੱਤਾ ਕਿ ਫ਼ਿਲਮ ਭਾਵੇਂ ਹਰ ਸ਼ੁਕਰਵਾਰ ਰਿਲੀਜ਼ ਹੋਵੇ ਪਰ ਦਰਸ਼ਕ ਫ਼ਿਲਮ ਵੇਖ ਕੇ ਖੁਸ਼ ਜ਼ਰੂਰ ਹੋਣੇ ਹੋਣੇ ਚਾਹੀਦੇ ਹਨ।
ਫ਼ਿਲਮ ਬਾਰੇ ਗੱਲ ਕਰਦਿਆਂ ਗਿੱਪੀ ਗਰੇਵਾਲ ਨੇ ਕਿਹਾ ਕਿ ਅਰਦਾਸ ਕਰਾਂ ਇੱਕ ਸੋਸ਼ਲ ਫ਼ਿਲਮ ਸੀ ਪਰ ਫ਼ਿਲਮ ਡਾਕਾ ਅਰਦਾਸ ਕਰਾਂ ਨਾਲੋਂ ਬਿਲਕੁਲ ਹੀ ਵੱਖਰੀ ਫ਼ਿਲਮ ਹੈ। ਉਨ੍ਹਾਂ ਕਿਹਾ ਕਿ ਇਸ ਫ਼ਿਲਮ 'ਚ ਉਹ ਸ਼ਿੰਦੇ ਦਾ ਕਿਰਦਾਰ ਅਦਾ ਕਰ ਰਹੇ ਹਨ। ਇਹ ਸ਼ਿੰਦਾ ਝੂਠ ਬਹੁਤ ਬੋਲਦਾ ਹੈ, ਡਾਕਾ ਵੀ ਮਾਰਦਾ ਹੈ। ਉਨ੍ਹਾਂ ਕਿਹਾ ਕਿ ਫ਼ਿਲਮ ਦੇ ਵਿੱਚ ਸ਼ਿੰਦੇ ਦੇ ਕਿਰਦਾਰ ਦੇ ਬਹੁਤ ਰੰਗ ਵੇਖਣ ਨੂੰ ਮਿਲਣਗੇ।
ਫ਼ਿਲਮ 'ਚ ਮੁੱਖ ਕਿਰਦਾਰ ਅਦਾ ਕਰ ਰਹੀ ਜ਼ਰੀਨ ਖ਼ਾਨ ਨੇ ਆਪਣੇ ਕਿਰਦਾਰ ਬਾਰੇ ਗੱਲ ਕਰਦੇ ਦੱਸਿਆ ਕਿ ਉਹ ਇਸ ਫ਼ਿਲਮ 'ਚ ਲਾਲੀ ਦਾ ਕਿਰਦਾਰ ਅਦਾ ਕਰ ਰਹੀ ਹੈ। ਇਹ ਲਾਲੀ ਸ਼ਿੰਦੇ ਨੂੰ ਪਿਆਰ ਕਰਦੀ ਹੈ ਅਤੇ ਉਸ ਨੂੰ ਸੁਧਾਰਣ ਦੀ ਪੂਰੀ ਕੋਸ਼ਿਸ਼ ਕਰਦੀ ਹੈ। ਜਦੋਂ ਜ਼ਰੀਨ ਖ਼ਾਨ ਤੋਂ ਇਹ ਪੁੱਛਿਆ ਗਿਆ ਕਿ ਹਿੰਦੀ ਫ਼ਿਲਮਾਂ ਤੋਂ ਬਾਅਦ ਪੰਜਾਬੀ 'ਚ ਕੰਮ ਕਰਨਾ ਅਤੇ ਡਾਇਲਾਗ ਬੋਲਣ ਸਮੇਂ ਕੀ-ਕੀ ਦਿੱਕਤਾਂ ਆਇਆਂ ਤਾਂ ਉਸ ਨੇ ਕਿਹਾ ਕਿ ਉਹ ਰੱਟਾ ਬੇਸ਼ਕ ਲਗਾਉਂਦੀ ਸੀ, ਬੋਲਣ ਵੇਲੇ ਇੰਨੀ ਜ਼ਿਆਦਾ ਪ੍ਰੇਸ਼ਾਨੀ ਨਹੀਂ ਆਈ।
ਉਸ ਨੇ ਕਿਹਾ ਕਿ ਜਦੋਂ ਫ਼ਿਲਮ ਦਾ ਪਹਿਲਾ ਸੀਨ ਸੀ ਤਾਂ ਨਿਰਦੇਸ਼ਕ ਬਲਜੀਤ ਸਿੰਘ ਦਿਓ ਨੇ ਇਹ ਗੱਲ ਆਖੀ ਸੀ ਕਿ ਉਨ੍ਹਾਂ ਦੀ ਪੰਜਾਬੀ ਪੰਜਾਬਣਾਂ ਨਾਲੋਂ ਵੀ ਵਧੀਆ ਹੈ। ਜ਼ਿਕਰਯੋਗ ਹੈ ਕਿ ਗਿੱਪੀ ਗਰੇਵਾਲ ਅਤੇ ਜ਼ਰੀਨ ਖ਼ਾਨ ਇਸ ਫ਼ਿਲਮ ਰਾਹੀਂ 6 ਸਾਲ ਬਾਅਦ ਇੱਕਠੇ ਨਜ਼ਰ ਆਉਣ ਵਾਲੇ ਹਨ।
