ਹਰਿਆਣਾ:ਪਾਕਿਸਤਾਨੀ ਕ੍ਰਿਕਟ ਟੀਮ ਦੇ ਤੇਜ਼ ਗੇਂਦਬਾਜ਼ ਹਸਨ ਅਲੀ ਅਤੇ ਹਰਿਆਣਾ ਦੇ ਮੇਵਾਤ ਜ਼ਿਲ੍ਹੇ ਦੀ ਸਾਮਿਆ ਆਰਜ਼ੂ ਦਾ ਵਿਆਹ ਹੋ ਚੁੱਕਾ ਹੈ। ਇਹ ਵਿਆਹ ਮੰਗਲਵਾਰ ਦੇਰ ਸ਼ਾਮ ਨੂੰ ਦੁਬਈ ਦੇ ਆਲੀਸ਼ਾਨ ਰਿਜ਼ਾਰਟ 'ਚ ਹੋਇਆ। ਦੁਬਈ ਦੇ ਵਿੱਚ ਹੋਏ ਇਸ ਨਿਕਾਹ ਸਮਾਰੋਹ 'ਚ ਤਕਰੀਬਨ 30 ਲੋਕ ਮੌਜੂਦ ਸਨ।
ਕਾਬਿਲ-ਏ-ਗੌਰ ਹੈ ਕਿ ਸਾਮਿਆ ਆਰਜ਼ੂ ਤੇ ਹਸਨ ਅਲੀ ਦੇ ਰਿਸ਼ਤੇ ਦੀਆਂ ਖ਼ਬਰਾਂ ਪਿਛਲੇ ਇੱਕ ਮਹੀਨੇ ਤੋਂ ਚਰਚਾ ਦੇ ਵਿੱਚ ਰਹੀਆਂ ਹਨ। ਉਸ ਤੋਂ ਬਾਅਦ ਹੀ ਤੈਅ ਹੋ ਗਿਆ ਸੀ ਕਿ ਦੋਵੇਂ 20 ਅਗਸਤ ਨੂੰ ਵਿਆਹ ਕਰਵਾ ਲੈਣਗੇ। ਵਿਆਹ ਤੋਂ ਬਾਅਦ ਪਾਕਿਸਤਾਨ 'ਚ ਆਲੀਸ਼ਾਨ ਰਿਸੈਪਸ਼ਨ ਦਿੱਤਾ ਜਾਵੇਗਾ।
ਇਸ ਰਿਸੈਪਸ਼ਨ 'ਚ ਕ੍ਰਿਕੇਟ ਜਗਤ ਤੋਂ ਇਲਾਵਾ ਫ਼ਿਲਮੀ ਜਗਤ ਅਤੇ ਦੋਹਾਂ ਦੇਸ਼ਾਂ ਦੇ ਰਾਜਨੇਤਾ ਵੀ ਸ਼ਿਰਕਤ ਕਰਨਗੇ। ਮੰਗਲਵਾਰ ਨੂੰ ਦੇਰ ਸ਼ਾਮ ਕਾਜ਼ੀ ਨੇ ਜਿਵੇਂ ਹੀ ਨਿਕਾਹ ਪੜ੍ਹਿਆ ਤਾਂ ਸਾਮਿਆ ਆਰਜ਼ੂ ਹਮੇਸ਼ਾ ਦੇ ਲਈ ਹਸਨ ਅਲੀ ਦੀ ਹੋ ਗਈ।
ਨਿਕਾਹ ਸਮਾਰੋਹ 'ਚ ਕ੍ਰਿਕੇਟਰ ਹਸਨ ਅਲੀ ਦੇ ਪਿਤਾ ਅਜ਼ੀਜ਼ ਅਤੇ ਉਨ੍ਹਾਂ ਦੀ ਮਾਤਾ ਕਨੀਜ਼ ਤੋਂ ਇਲਾਵਾ ਆਰਜ਼ੂ ਦੇ ਪਿਤਾ ਸਾਬਕਾ ਬੀਡੀਪੀਓ ਲਿਆਕਤ ਅਲੀ ਤੋਂ ਇਲਾਵਾ ਉਨ੍ਹਾਂ ਦੀ ਮਾਤਾ ਅਮੀ ਰਈਸਨ ਵੀ ਮੌਜੂਦ ਸਨ।
