ਚੰਡੀਗੜ੍ਹ: ਈਕੋ ਸਿੱਖ ਨੇ ਇੱਕ ਵੱਡਾ ਉਪਰਾਲਾ ਕਰਦਿਆਂ ਪੰਜਾਬ ਨੂੰ ਹਰਾ-ਭਰਾ ਬਣਾਉਣ ਦੀ ਪਿਰਤ ਪਾ ਦਿੱਤੀ ਹੈ। ਪਿਛਲੇ ਢਾਈ ਸਾਲਾਂ ਦੀ ਮਿਹਨਤ ਰੰਗ ਲਿਆਈ ਹੈ ਕਿ ਹੁਣ ਈਕੋ ਸਿੱਖ ਵੱਲੋਂ ਲਗਾਏ ਡੇਢ ਲੱਖ ਤੋਂ ਵੱਧ ਰੁੱਖ ਜਵਾਨ ਹੋ ਗਏ ਹਨ। ਜੋ 303 ਜੰਗਲਾਂ ਵਿੱਚ ਹਰਿਆਲੀ ਬਿਖੇਰ ਰਹੇ ਹਨ। ਇੱਥੋਂ ਤੱਕ ਕਿ ਇਸ ਸੰਸਥਾ ਨਾਲ ਜੁੜੇ ਨੌਜਵਾਨਾਂ ਨੇ ਆਪਣੇ ਵਿਆਹ ਅਤੇ ਮਿਲਣੀ ਮੌਕੇ ਵੀ ਪੌਦੇ ਲਗਾਉਣੇ ਸ਼ੁਰੂ ਕਰ ਦਿੱਤੇ ਹਨ।
ਸੰਸਥਾ ਨਾਲ ਜੁੜੇ ਸਹਿਜਬੀਰ ਸਿੰਘ ਨੇ ਆਪਣੇ ਵਿਆਹ ਦੀ ਮਿਲਣੀ ਮੌਕੇ ਗੁਰੂ ਨਾਨਕ ਦੇਵ ਜੀ ਦੇ ਸਾਢੇ ਪੰਜ ਸੌ ਸਾਲਾ ਗੁਰਪੁਰਬ ਨੂੰ ਸਮਰਪਤ ਸਾਢੇ ਪੰਜ ਸੌ ਪੌਦੇ ਖਰੜ ਦੇ ਨੇੜੇ ਲਾਏ।
ਈਕੋ ਸਿੱਖ ਦੇ ਆਗੂ ਰਵਨੀਤ ਸਿੰਘ ਨੇ ਜਾਣਕਾਰੀ ਦਿੰਦੇ ਦੱਸਿਆ ਕਿ ਭਵਿੱਖ ਵਿੱਚ ਉਨ੍ਹਾਂ ਦਾ ਸਾਢੇ ਪੰਜ ਸੌ ਜੰਗਲ ਸਥਾਪਤ ਕਰਨ ਦਾ ਟੀਚਾ ਵੀ ਪੂਰਾ ਹੋ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਪੰਜਾਬ ਵਿਚ ਵਧੇਰੇ ਦਰੱਖਤ ਲਗਾ ਕੇ ਹੀ ਇੱਥੋਂ ਦੇ ਪੰਛੀਆਂ ਅਤੇ ਜਾਨਵਰਾਂ ਨੂੰ ਵੀ ਸੰਭਾਲਿਆ ਜਾ ਸਕਦਾ ਹੈ।
ਈਟੀਵੀ ਭਾਰਤ ਨਾਲ ਸਹਿਜਬੀਰ ਨੇ ਗੱਲਬਾਤ ਕਰਦਿਆਂ ਕਿਹਾ ਕਿ ਉਹ ਆਪਣੇ ਵਿਆਹ ਨੂੰ ਬਿਲਕੁਲ ਸਿੰਪਲ ਅਤੇ ਵਧੀਆ ਤਰੀਕੇ ਨਾਲ ਕਰਵਾਉਣਾ ਚਾਹੁੰਦੇ ਸਨ ਅਤੇ ਬੂਟੇ ਲਾ ਕੇ ਆਪਣੀ ਕਮਿਊਨਿਟੀ ਨੂੰ ਚੰਗਾ ਵਾਤਾਵਰਨ ਦੇਣ ਇਸ ਤੋਂ ਵੱਡਾ ਉਪਰਾਲਾ ਵਿਆਹ ਮੌਕੇ ਨਹੀਂ ਹੋ ਸਕਦਾ ਸੀ ਅਤੇ ਅਸੀਂ ਮਿਲਣੀ ਦੌਰਾਨ ਦੋਨੋ ਪਰਿਵਾਰ ਮਿਲ ਕੇ ਬੂਟੇ ਲਾਉਣ ਦਾ ਫ਼ੈਸਲਾ ਕੀਤਾ।
ਉੱਥੇ ਹੀ ਨਿਹਮਤ ਕੌਰ ਨੇ ਕਿਹਾ ਕਿ ਅਕਸਰ ਲੋਕ ਮਿਲਣੀ 'ਤੇ ਕੰਬਲ ਵੰਡਦੇ ਹਨ ਪਰ ਜੇ ਦੋਨੇ ਪਰਿਵਾਰ ਇਸ ਤਰੀਕੇ ਦੇ ਨਾਲ ਵਾਤਾਵਰਨ ਨੂੰ ਸੁਰੱਖਿਅਤ ਕਰਨ ਵਾਸਤੇ ਇਕੱਠੇ ਹੋਣ ਤਾਂ ਇਸ ਤੋਂ ਵੱਡੀ ਮਿਲਣੀ ਨਹੀਂ ਹੋ ਸਕਦੀ
