ਚੰਡੀਗੜ੍ਹ: ਸੁਰੱਖਿਆ ਵਾਪਸ ਲੈਣ ਦਾ ਮੁੱਦਾ ਅਕਸਰ ਹਰ ਸਰਕਾਰ ਲਈ ਚੁਣੌਤੀ ਬਣਿਆ ਰਹਿੰਦਾ ਹੈ, ਹੁਣ ਆਮ ਆਦਮੀ ਪਾਰਟੀ ਨੇ ਸੱਤਾ ਵਿੱਚ ਬੈਠਣ ਤੋਂ ਪਹਿਲਾਂ ਹੀ ਫੈਸਲਾ ਕਰ ਲਿਆ ਹੈ। ਇੱਕ ਫੈਸਲੇ ਵਿੱਚ 13 ਸਾਬਕਾ ਮੰਤਰੀਆਂ, ਇੱਕ ਸਾਬਕਾ ਸਪੀਕਰ, ਇੱਕ ਸਾਬਕਾ ਡਿਪਟੀ ਸਪੀਕਰ ਸਮੇਤ 122 ਲੋਕਾਂ ਦੀ ਸੁਰੱਖਿਆ ਵਾਪਸ ਲੈ ਲਈ ਗਈ ਹੈ। ਇਨ੍ਹਾਂ ਵਿੱਚ 100 ਤੋਂ ਵੱਧ ਸਾਬਕਾ ਅਤੇ ਮੌਜੂਦਾ ਵਿਧਾਇਕ ਹਨ, ਪਰ ਇਸ ਸੂਚੀ ਵਿੱਚ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ, ਸੁਖਬੀਰ, ਹਰਸਿਮਰਤ ਅਤੇ ਬਿਕਰਮ ਮਜੀਠੀਆ ਦਾ ਨਾਂ ਨਹੀਂ ਹੈ।
ਕਿਸਤੋਂ ਵਾਪਸ ਲਈ ਗਈ ਸੁਰੱਖਿਆ
ਪੰਜਾਬ ਦੇ ਵਧੀਕ ਡਾਇਰੈਕਟਰ ਜਨਰਲ ਪੁਲਿਸ ਵੱਲੋਂ ਬੀਤੀ ਰਾਤ ਇੱਕ ਸੂਚੀ ਜਾਰੀ ਕੀਤੀ ਗਈ ਸੀ, ਜਿਸ ਵਿੱਚ 122 ਵਿਅਕਤੀਆਂ ਤੋਂ ਤੁਰੰਤ ਪ੍ਰਭਾਵ ਨਾਲ ਸੁਰੱਖਿਆ ਵਾਪਸ ਲੈਣ ਦਾ ਜ਼ਿਕਰ ਕੀਤਾ ਗਿਆ ਸੀ। ਪੰਜਾਬ ਦੀ ਪਿਛਲੀ ਸਰਕਾਰ ਵਿੱਚ ਮੰਤਰੀ ਰਹੇ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਅਤੇ ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਤੋਂ ਵੱਧ ਸੁਰੱਖਿਆ ਵਾਪਸ ਲੈ ਲਈ ਗਈ ਹੈ। ਮਨਪ੍ਰੀਤ ਬਾਦਲ ਨੂੰ ਸੁਰੱਖਿਆ ਦੇਣ ਵਾਲੇ 19, ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਤੋਂ 21, ਪਰਗਟ ਸਿੰਘ ਤੋਂ 17, ਅਰੁਣਾ ਚੌਧਰੀ, ਰਾਣਾ ਗੁਰਜੀਤ ਸਿੰਘ ਤੋਂ 14-14 ਮੁਲਾਜ਼ਮ ਵਾਪਸ ਲੈ ਲਏ ਗਏ ਹਨ।
ਇਹ ਵੀ ਪੜੋ: ਕੀ ਪੰਜਾਬ ਦੀਆਂ ਸਿਹਤ ਸਹੂਲਤਾਂ ਵਿੱਚ ਆਵੇਗਾ ਵੱਡਾ ਬਦਲਾਅ ?
ਰਾਜ ਕੁਮਾਰ ਵੇਰਕਾ ਤੋਂ 11, ਭਾਰਤ ਭੂਸ਼ਣ ਆਸ਼ੂ ਤੋਂ 16, ਬ੍ਰਹਮ ਮਹਿੰਦਰਾ ਤੋਂ 14, ਸੰਗਤ ਸਿੰਘ ਗਿਲਜੀਆ ਤੋਂ 15, ਰਣਦੀਪ ਸਿੰਘ ਨਾਭਾ ਤੋਂ 15, ਅਜੈਬ ਸਿੰਘ ਭੱਟੀ ਤੋਂ 2, ਰਾਣਾ ਕੇਪੀ ਸਿੰਘ ਤੋਂ 13, ਰਜੀਆ ਸੁਲਤਾਨਾ ਤੋਂ 4, ਕੰਗੜ ਤੋਂ ਗੁਰਪ੍ਰੀਤ ਸਿੰਘ ਕਾਗੜ ਤੋਂ 6, ਤ੍ਰਿਪਤ ਰਜਿੰਦਰ ਬਾਜਵਾ ਤੋਂ 14, ਸੁਖਵਿੰਦਰ ਸਿੰਘ ਸਰਕਾਰੀਆ ਤੋਂ 14, ਬਰਿੰਦਰ ਸਿੰਘ ਪਹਾੜਾ ਤੋਂ 3, ਸੁਖਪਾਲ ਸਿੰਘ ਤੋਂ 4, ਕੁਲਜੀਤ ਸਿੰਘ ਨਾਗਰਾ ਤੋਂ 2, ਕੁਸ਼ਲਦੀਪ ਸਿੰਘ ਕਿੱਕੀ ਢਿੱਲੋਂ ਤੋਂ 4, ਹਰਪ੍ਰਤਾਪ ਸਿੰਘ ਅਜਨਾਲਾ ਤੋਂ 4 ਸੁਰੱਖਿਆ ਕਰਮੀ ਵਾਪਸ ਲਏ ਗਏ ਹਨ।
| ਨਾਂ | ਸੁਰੱਖਿਆ ਮੁਲਾਜ਼ਮ |
| ਮਨਪ੍ਰੀਤ ਬਾਦਲ | 19 |
| ਅਮਰਿੰਦਰ ਸਿੰਘ ਰਾਜਾ ਵੜਿੰਗ | 21 |
| ਪਰਗਟ ਸਿੰਘ | 17 |
| ਰਾਣਾ ਗੁਰਜੀਤ ਸਿੰਘ | 14 |
| ਅਰੁਣਾ ਚੌਧਰੀ | 14 |
| ਰਾਜ ਕੁਮਾਰ ਵੇਰਕਾ | 11 |
| ਬ੍ਰਹਮ ਮਹਿੰਦਰਾ | 14 |
| ਭਾਰਤ ਭੂਸ਼ਣ ਆਸ਼ੂ | 16 |
| ਸੰਗਤ ਸਿੰਘ ਗਿਲਜੀਆ | 15 |
| ਰਣਦੀਪ ਸਿੰਘ ਨਾਭਾ | 15 |
| ਅਜੈਬ ਸਿੰਘ ਭੱਟੀ | 2 |
| ਰਾਣਾ ਕੇਪੀ ਸਿੰਘ | 13 |
| ਰਜੀਆ ਸੁਲਤਾਨਾ | 4 |
| ਗੁਰਪ੍ਰੀਤ ਸਿੰਘ ਕਾਗੜ | 6 |
| ਤ੍ਰਿਪਤ ਰਜਿੰਦਰ ਬਾਜਵਾ | 14 |
| ਸੁਖਵਿੰਦਰ ਸਿੰਘ ਸਰਕਾਰੀਆ | 14 |
| ਬਰਿੰਦਰ ਸਿੰਘ ਪਹਾੜਾ | 3 |
| ਸੁਖਪਾਲ ਸਿੰਘ | 4 |
| ਕੁਲਜੀਤ ਸਿੰਘ ਨਾਗਰਾ | 2 |
| ਕੁਸ਼ਲਦੀਪ ਸਿੰਘ ਕਿੱਕੀ ਢਿੱਲੋਂ | 4 |
| ਹਰਪ੍ਰਤਾਪ ਸਿੰਘ ਅਜਨਾਲਾ | 4 |
ਬਾਕੀ ਸਾਬਕਾ ਵਿਧਾਇਕਾਂ, ਸਿਆਸੀ ਪਾਰਟੀਆਂ ਦੇ ਸਾਬਕਾ ਪ੍ਰਧਾਨਾਂ ਦੀ ਸੁਰੱਖਿਆ ਲਈ ਇੱਕ ਤੋਂ ਦੋ ਪੁਲਿਸ ਮੁਲਾਜ਼ਮ ਤਾਇਨਾਤ ਸਨ। ਆਮ ਆਦਮੀ ਪਾਰਟੀ ਦੇ ਸਾਬਕਾ ਵਿਧਾਇਕ ਅਮਰਜੀਤ ਸਿੰਘ ਸੰਦੋਆ ਤੋਂ ਵੀ ਸੁਰੱਖਿਆ ਵਾਪਸ ਲੈ ਲਈ ਗਈ ਹੈ। ਕੁੱਲ ਮਿਲਾ ਕੇ 400 ਤੋਂ ਵੱਧ ਪੁਲਿਸ ਮੁਲਾਜ਼ਮ ਇਨ੍ਹਾਂ ਵਿਸ਼ੇਸ਼ ਵਿਅਕਤੀਆਂ ਦੀ ਸੁਰੱਖਿਆ ਵਿੱਚ ਲੱਗੇ ਹੋਏ ਸਨ।
ਹੁਕਮਾਂ ਵਿੱਚ ਕਿਹਾ ਗਿਆ ਹੈ ਕਿ ਇਨ੍ਹਾਂ ਸਾਬਕਾ ਮੰਤਰੀਆਂ ਤੇ ਵਿਧਾਇਕਾਂ ਦੀ ਸੁਰੱਖਿਆ ਵਾਪਸ ਲੈ ਕੇ ਸਬੰਧਤ ਯੂਨਿਟ ਨੂੰ ਤੁਰੰਤ ਸੂਚਿਤ ਕੀਤਾ ਜਾਵੇ। ਹਦਾਇਤਾਂ ਵਿੱਚ ਇਹ ਵੀ ਕਿਹਾ ਗਿਆ ਹੈ ਕਿ ਜਿਨ੍ਹਾਂ ਸਾਬਕਾ ਮੰਤਰੀਆਂ ਤੇ ਸਾਬਕਾ ਵਿਧਾਇਕਾਂ ਨੂੰ ਅਦਾਲਤੀ ਹੁਕਮਾਂ ’ਤੇ ਸੁਰੱਖਿਆ ਦਿੱਤੀ ਗਈ ਹੈ, ਉਨ੍ਹਾਂ ਨੂੰ ਵਾਪਸ ਨਾ ਲਿਆ ਜਾਵੇ। ਜੇਕਰ ਕਿਸੇ ਸਾਬਕਾ ਮੰਤਰੀ ਜਾਂ ਸਾਬਕਾ ਵਿਧਾਇਕ ਦੀ ਜਾਨ ਨੂੰ ਖਤਰਾ ਹੈ ਤਾਂ ਉਸ ਦੀ ਸੁਰੱਖਿਆ ਵਾਪਸ ਲੈਣ ਤੋਂ ਪਹਿਲਾਂ ਏਡੀਜੀਪੀ (ਸੁਰੱਖਿਆ) ਤੋਂ ਮਨਜ਼ੂਰੀ ਲੈਣੀ ਚਾਹੀਦੀ ਹੈ।
ਸੁਰੱਖਿਆ ਵਾਪਸ ਲੈਣ ਦਾ ਸਿਲਸਿਲਾ ਪੁਰਾਣਾ
ਹਾਲਾਂਕਿ ਜਿਨ੍ਹਾਂ ਲੋਕਾਂ ਨੂੰ ਜ਼ਿਆਦਾ ਸੁਰੱਖਿਆ ਮਿਲੀ ਹੈ, ਉਹ ਇੰਨੇ ਵੱਡੇ ਖਤਰੇ 'ਚ ਨਹੀਂ ਹਨ, ਪਰ ਪੰਜਾਬ 'ਚ ਸੁਰੱਖਿਆ ਲੈਣਾ ਵੀ 'ਸਟੇਟਸ ਸਿੰਬਲ' ਬਣ ਗਿਆ ਹੈ। ਪਿਛਲੀ ਕਾਂਗਰਸ ਸਰਕਾਰ ਨੇ ਸੱਤਾ ਵਿੱਚ ਆਉਂਦੇ ਹੀ ਵੀ.ਆਈ.ਪੀ ਕਲਚਰ ਨੂੰ ਤਿਆਗ ਕੇ ਬੇਲੋੜੀ ਸੁਰੱਖਿਆ ਵਾਪਸ ਲੈਣ ਦਾ ਸਿਲਸਿਲਾ ਸ਼ੁਰੂ ਕਰ ਦਿੱਤਾ ਸੀ।
ਇਹ ਵੀ ਪੜੋ: ਲੁਧਿਆਣਾ ਤੋਂ ਕਿਹੜਾ ਵਿਧਾਇਕ ਹੋ ਸਕਦਾ ਹੈ ਆਪ ਦੇ ਮੰਤਰੀ ਮੰਡਲ ’ਚ ਸ਼ਾਮਿਲ ? ਵੇਖੋ ਖਾਸ ਰਿਪੋਰਟ...
ਵੀ.ਆਈ.ਪੀਜ਼ ਅਤੇ ਅਖੌਤੀ ਵੀ.ਆਈ.ਪੀਜ਼ ਤੋਂ 1500 ਤੋਂ ਵੱਧ ਪੁਲਿਸ ਮੁਲਾਜ਼ਮ ਵਾਪਸ ਲੈ ਲਏ ਗਏ ਸਨ, ਪਰ ਤਤਕਾਲੀ ਸਰਕਾਰ ਦਾ ਇਹ ਰੁਝਾਨ ਬਹੁਤਾ ਚਿਰ ਨਾ ਚੱਲ ਸਕਿਆ। ਫਿਰ ਚਰਨਜੀਤ ਸਿੰਘ ਚੰਨੀ ਦੇ ਮੁੱਖ ਮੰਤਰੀ ਬਣਦਿਆਂ ਹੀ ਕੈਪਟਨ ਅਮਰਿੰਦਰ ਸਿੰਘ ਅਤੇ ਉਨ੍ਹਾਂ ਦੇ 20 ਕਰੀਬੀਆਂ ਦੀ ਸੁਰੱਖਿਆ ਘਟਾ ਦਿੱਤੀ ਗਈ। ਅਗਸਤ 2020 ਵਿੱਚ ਕਾਂਗਰਸ ਵਿੱਚ ਟਕਰਾਅ ਕਾਰਨ ਕਾਂਗਰਸ ਦੇ ਰਾਜ ਸਭਾ ਮੈਂਬਰ ਪ੍ਰਤਾਪ ਸਿੰਘ ਬਾਜਵਾ ਦੀ ਸੁਰੱਖਿਆ ਵੀ ਘਟਾ ਦਿੱਤੀ ਗਈ ਸੀ।
