ਵਾਰਾਣਸੀ: ਪੁਲਿਸ ਨੇ ਬੁੱਧਵਾਰ ਨੂੰ ਲੰਕਾ ਇਲਾਕੇ 'ਚ ਇਕ ਘਰ 'ਚ ਦਾਖਲ ਹੋ ਕੇ ਇਕ ਔਰਤ ਦੀ ਲਾਸ਼ ਬਰਾਮਦ ਕੀਤੀ। ਸਭ ਤੋਂ ਵੱਡੀ ਗੱਲ ਇਹ ਹੈ ਕਿ ਇਸ ਔਰਤ ਦੀ ਕਰੀਬ ਇਕ ਸਾਲ ਪਹਿਲਾਂ ਮੌਤ ਹੋ ਗਈ ਸੀ ਅਤੇ ਉਸ ਦੀਆਂ ਦੋ ਬੇਟੀਆਂ ਉਸ ਦੀ ਲਾਸ਼ ਕੋਲ ਰਹਿ ਰਹੀਆਂ ਸਨ। ਆਪਣੀ ਮਾਂ ਦਾ ਅੰਤਿਮ ਸਸਕਾਰ ਕੀਤੇ ਬਿਨਾਂ ਇਹ ਦੋਵੇਂ ਧੀਆਂ ਇਸ ਮ੍ਰਿਤਕ ਦੇਹ ਨਾਲ ਖਾਂਦੇ-ਪੀਂਦੇ ਅਤੇ ਸੌਂਦੇ ਵੀ ਸਨ। ਇਹ ਆਪਣੇ ਆਪ ਵਿੱਚ ਇੱਕ ਦਿਲ ਦਹਿਲਾ ਦੇਣ ਵਾਲਾ ਮਾਮਲਾ ਹੈ। ਇਸ ਦੇ ਨਾਲ ਹੀ ਪੁਲਿਸ ਅਧਿਕਾਰੀ ਨੇ ਕਿਹਾ ਕਿ ਲਾਸ਼ ਦਾ ਡੀਐਨਏ ਟੈਸਟ ਕਰਵਾਇਆ ਜਾਵੇਗਾ। ਇਸਦੀ ਰਿਪੋਰਟ ਕਰੀਬ ਤਿੰਨ ਮਹੀਨਿਆਂ ਵਿੱਚ ਆ ਜਾਵੇਗੀ।
ਆਖ਼ਰ ਅਜਿਹਾ ਕੀ ਕਾਰਨ ਸੀ ਕਿ ਇਨ੍ਹਾਂ ਦੋਵਾਂ ਧੀਆਂ ਨੇ ਆਪਣੀ ਮਾਂ ਦੀ ਮੌਤ ਤੋਂ ਬਾਅਦ ਇਕ ਸਾਲ ਤੱਕ ਇਸ ਗੱਲ ਨੂੰ ਲੁਕੋ ਕੇ ਰੱਖਿਆ? ਦੋਵਾਂ ਨੇ ਮਾਂ ਦੀ ਮ੍ਰਿਤਕ ਦੇਹ ਘਰ ਕਿਉਂ ਰੱਖੀ? ਕਿਸੇ ਨੂੰ ਸੂਚਿਤ ਕਿਉਂ ਨਹੀਂ ਕੀਤਾ? ਇਨ੍ਹਾਂ ਸਵਾਲਾਂ ਦੇ ਜਵਾਬ ਜਾਣਨਾ ਬਹੁਤ ਜ਼ਰੂਰੀ ਹੈ? ਮਾਂ ਦੀ ਮੌਤ ਤੋਂ ਬਾਅਦ ਇੱਕ ਸਾਲ ਤੱਕ ਉਨ੍ਹਾਂ ਦੇ ਘਰੇਲੂ ਖਰਚੇ ਕਿਵੇਂ ਚੱਲੇ? ਕਿਉਂਕਿ ਕਿਸੇ ਦੀ ਮੌਤ ਤੋਂ ਬਾਅਦ ਉਸ ਦੀ ਆਤਮਾ ਦੀ ਸ਼ਾਂਤੀ ਲਈ ਕੇਵਲ ਅੰਤਿਮ ਸਸਕਾਰ ਹੀ ਜ਼ਰੂਰੀ ਨਹੀਂ ਹੁੰਦੇ, ਸਗੋਂ ਹੋਰ ਧਾਰਮਿਕ ਪਹਿਲੂ ਵੀ ਜ਼ਰੂਰੀ ਹੋ ਜਾਂਦੇ ਹਨ। ਪਰ ਇਨ੍ਹਾਂ ਦੋਵਾਂ ਧੀਆਂ ਨੇ ਅਜਿਹਾ ਕਿਉਂ ਕੀਤਾ? ਇਨ੍ਹਾਂ ਸਵਾਲਾਂ ਦੇ ਜਵਾਬ ਗੁਆਂਢੀਆਂ ਅਤੇ ਉਨ੍ਹਾਂ ਦੇ ਕੁਝ ਰਿਸ਼ਤੇਦਾਰਾਂ ਨੇ ਦਿੱਤੇ।
ਦਰਅਸਲ, ਵਾਰਾਣਸੀ ਦੇ ਲੰਕਾ ਖੇਤਰ ਦੇ ਮਦਰਵਾ ਇਲਾਕੇ ਦੀ ਰਹਿਣ ਵਾਲੀ ਊਸ਼ਾ ਤ੍ਰਿਪਾਠੀ (52) ਦੀਆਂ ਦੋ ਬੇਟੀਆਂ ਪੱਲਵੀ ਅਤੇ ਵੈਸ਼ਨਵੀ ਆਪਣੀ ਮਾਂ ਦੀ ਮੌਤ ਤੋਂ ਬਾਅਦ ਇੱਕ ਸਾਲ ਤੱਕ ਮ੍ਰਿਤਕ ਦੇਹ ਨੂੰ ਘਰ 'ਚ ਰੱਖ ਕੇ ਉਸ ਦੇ ਨਾਲ ਰਹਿ ਰਹੀਆਂ ਸਨ। ਬੁੱਧਵਾਰ ਨੂੰ ਜਦੋਂ ਉਨ੍ਹਾਂ ਦੇ ਚਾਚਾ ਧਰਮਿੰਦਰ ਉੱਥੇ ਪਹੁੰਚੇ ਤਾਂ ਦਰਵਾਜ਼ਾ ਨਾ ਖੁੱਲ੍ਹਣ 'ਤੇ ਪੁਲਿਸ ਨੂੰ ਸੂਚਨਾ ਦਿੱਤੀ ਗਈ। ਜਦੋਂ ਪੁਲਿਸ ਦਰਵਾਜ਼ਾ ਤੋੜ ਕੇ ਅੰਦਰ ਦਾਖ਼ਲ ਹੋਈ ਤਾਂ ਸਾਰੇ ਹੈਰਾਨ ਰਹਿ ਗਏ। ਅੰਦਰ ਊਸ਼ਾ ਤ੍ਰਿਪਾਠੀ ਦੀ ਰਜਾਈ ਨਾਲ ਢੱਕੀ ਹੋਈ ਲਾਸ਼ ਮੰਜੇ 'ਤੇ ਪਈ ਸੀ ਅਤੇ ਪੂਰੇ ਸਰੀਰ ਦਾ ਮਾਸ ਗਾਇਬ ਹੋਣ ਤੋਂ ਬਾਅਦ, ਸਿਰਫ ਨਰਮੁੰਦ ਅਤੇ ਬਾਕੀ ਸਰੀਰ ਪਿੰਜਰ ਦੇ ਰੂਪ ਵਿਚ ਦਿਖਾਈ ਦੇ ਰਿਹਾ ਸੀ।
ਪੁਲਿਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ। ਪੁੱਛਗਿੱਛ ਦੌਰਾਨ ਸਭ ਤੋਂ ਪਹਿਲਾਂ ਗੁਆਂਢੀ ਰਮੇਸ਼ ਸਿੰਘ ਅਤੇ ਉਸ ਦੇ ਪਰਿਵਾਰਕ ਮੈਂਬਰਾਂ ਨਾਲ ਗੱਲ ਕੀਤੀ। ਰਮੇਸ਼ ਸਿੰਘ ਨੇ ਦੱਸਿਆ ਕਿ ਪਰਿਵਾਰ ਵਿੱਚ ਸਿਰਫ਼ ਤਿੰਨ ਵਿਅਕਤੀ ਹਨ। ਊਸ਼ਾ ਅਤੇ ਉਸ ਦੀਆਂ ਦੋ ਧੀਆਂ। ਕਾਸਮੈਟਿਕ ਦੀ ਦੁਕਾਨ ਚਲਾਉਣ ਵਾਲੀ ਊਸ਼ਾ ਦੀ ਤਬੀਅਤ ਟੀਬੀ ਕਾਰਨ ਵਿਗੜ ਗਈ ਸੀ। ਟੀਬੀ ਹੋਣ ਤੋਂ ਬਾਅਦ ਊਸ਼ਾ ਘਰ ਹੀ ਰਹੀ ਅਤੇ ਕੋਈ ਵੀ ਉਸ ਨੂੰ ਮਿਲਣ ਨਹੀਂ ਆਇਆ। ਹਾਂ, ਕਦੇ-ਕਦੇ ਉਸ ਦੇ ਪਿਤਾ ਅਤੇ ਉਸ ਦੀ ਭੈਣ ਉਸ ਨੂੰ ਮਿਲਣ ਆ ਜਾਂਦੇ ਸਨ। ਪਰ, ਉਹ ਵੀ ਕਾਫੀ ਦੇਰ ਤੋਂ ਨਹੀਂ ਆਏ ਸਨ। ਕਰੀਬ ਦੋ ਮਹੀਨੇ ਪਹਿਲਾਂ ਜਦੋਂ ਊਸ਼ਾ ਤ੍ਰਿਪਾਠੀ ਦੇ ਪਿਤਾ ਰਾਮਕ੍ਰਿਸ਼ਨ ਘਰ ਪਹੁੰਚੇ ਤਾਂ ਦੋਵੇਂ ਧੀਆਂ ਨੇ ਦਰਵਾਜ਼ਾ ਨਹੀਂ ਖੋਲ੍ਹਿਆ, ਜਿਸ ਕਾਰਨ ਉਹ ਵਾਪਸ ਚਲੇ ਗਏ। ਇਸ ਤੋਂ ਬਾਅਦ ਇੰਨ੍ਹਾਂ ਦੀ ਮਾਸੀ ਸੀਮਾ ਵੀ ਆਪਣੀ ਭੈਣ ਨੂੰ ਮਿਲਣ ਆਈ ਪਰ ਦਰਵਾਜ਼ਾ ਨਹੀਂ ਖੁੱਲ੍ਹਿਆ ਅਤੇ ਉਨ੍ਹਾਂ ਨੂੰ ਵੀ ਵਾਪਸ ਪਰਤਣਾ ਪਿਆ।
ਪਹਿਲਾਂ ਪੱਲਵੀ ਆਪਣੇ ਨਾਨੇ ਨਾਲ ਹੀ ਰਹਿੰਦੀ ਸੀ ਪਰ ਉਸਦੇ ਅਣਉਚਿਤ ਵਿਵਹਾਰ ਕਾਰਨ ਉਹ ਉਸ ਨੂੰ ਬਨਾਰਸ ਛੱਡ ਕੇ ਚਲੇ ਗਏ। ਪੁਲਿਸ ਪੁੱਛਗਿੱਛ ਦੌਰਾਨ ਗੁਆਂਢੀਆਂ ਨੇ ਦੱਸਿਆ ਕਿ ਪੱਲਵੀ ਨੇ ਕਰੀਬ ਇਕ ਮਹੀਨਾ ਪਹਿਲਾਂ ਹੀ ਆਪਣਾ ਜਨਮਦਿਨ ਮਨਾਇਆ ਸੀ। ਘਰੋਂ ਬਾਹਰ ਆ ਕੇ ਦੋਵੇਂ ਭੈਣਾਂ ਨੇ ਕੇਕ ਕੱਟਣ ਦੀ ਇੱਛਾ ਪ੍ਰਗਟਾਈ ਸੀ ਤਾਂ ਗੁਆਂਢੀਆਂ ਨੇ ਕੇਕ ਮੰਗਵਾ ਕੇ ਕੱਟ ਲਿਆ। ਪੱਲਵੀ ਨੇ ਆਪਣੀ ਛੋਟੀ ਭੈਣ ਦਾ ਜਨਮਦਿਨ ਵੀ ਮਨਾਇਆ ਸੀ ਕਿਉਂਕਿ ਦੋਵੇਂ ਭੈਣਾਂ ਕਿਸੇ ਦੀ ਪਰਵਾਹ ਨਹੀਂ ਕਰਦੀਆਂ ਸਨ। ਇਸ ਲਈ ਦੋਵਾਂ ਦੇ ਜ਼ੋਰ ਪਾਉਣ 'ਤੇ ਪਰਿਵਾਰ ਤੋਂ ਬਾਹਰ ਦੇ ਲੋਕਾਂ ਨੇ ਕੇਕ ਕੱਟ ਕੇ ਉਨ੍ਹਾਂ ਨਾਲ ਆਪਣਾ ਦਿਨ ਮਨਾਇਆ। ਪਰ ਕਿਸੇ ਨੂੰ ਕਿਥੇ ਪਤਾ ਸੀ ਕਿ ਅੰਦਰ ਊਸ਼ਾ ਦੀ ਲਾਸ਼ ਪਈ ਹੈ।
ਗੁਆਂਢੀ ਨੇ ਦੱਸਿਆ, ਵੱਡੀ ਧੀ ਚਾਹੁੰਦੀ ਸੀ ਲੋਨ : ਰਮੇਸ਼ ਸਿੰਘ ਨੇ ਪੁਲਿਸ ਨੂੰ ਇਹ ਵੀ ਦੱਸਿਆ ਹੈ ਕਿ ਪੱਲਵੀ ਉਸ ਨੂੰ 10 ਲੱਖ ਰੁਪਏ ਦਾ ਕਰਜ਼ਾ ਲੈਣ ਲਈ ਵਾਰ-ਵਾਰ ਕਹਿੰਦੀ ਸੀ। ਪਰ, ਰਮੇਸ਼ ਮਾਮਲੇ ਨੂੰ ਟਾਲ ਦਿੰਦੇ ਸਨ। ਪੱਲਵੀ ਨੇ ਵਾਰ-ਵਾਰ ਕਿਹਾ ਕਿ ਉਹ ਆਪਣਾ ਕਾਰੋਬਾਰ ਸਥਾਪਤ ਕਰਨਾ ਚਾਹੁੰਦੀ ਹੈ। ਇਸ ਲਈ ਪੈਸੇ ਦੀ ਲੋੜ ਹੈ। ਕਰਜ਼ਾ ਦਿਲਵਾ ਦਿਓ ਤਾਂ ਜੋ ਕੰਮ ਸ਼ੁਰੂ ਕਰ ਸਕਣ। ਪੁਲਿਸ ਪੁੱਛਗਿੱਛ ਦੌਰਾਨ ਇਹ ਵੀ ਸਾਹਮਣੇ ਆਇਆ ਕਿ ਊਸ਼ਾ ਤ੍ਰਿਪਾਠੀ ਜਿਸ ਘਰ ਵਿਚ ਰਹਿ ਰਹੀ ਸੀ, ਉਹ ਉਸ ਦੇ ਪਿਤਾ ਰਾਮਕ੍ਰਿਸ਼ਨ ਦਾ ਸੀ। ਰਾਮਕ੍ਰਿਸ਼ਨ ਨੇ ਬਨਾਰਸ ਛੱਡ ਦਿੱਤਾ ਸੀ ਅਤੇ ਲਖਨਊ ਰਹਿਣ ਲੱਗੇ ਸਨ ਅਤੇ ਇਹ ਘਰ ਆਪਣੀ ਬੇਟੀ ਨੂੰ ਦੇ ਦਿੱਤਾ ਸੀ। ਉਹ ਇੱਥੇ ਆਪਣੀਆਂ ਦੋ ਬੇਟੀਆਂ ਨਾਲ ਰਹਿ ਰਹੀ ਸੀ। ਤਪਦਿਕ ਦੀ ਬਿਮਾਰੀ ਤੋਂ ਬਾਅਦ ਊਸ਼ਾ ਦਿਨੋਂ-ਦਿਨ ਕਮਜ਼ੋਰ ਹੁੰਦੀ ਜਾ ਰਹੀ ਸੀ।
14 ਮਹੀਨੇ ਪਹਿਲਾਂ ਆਪਣੀ ਭੈਣ ਨੂੰ ਮਿਲਣ ਆਈ ਸੀ ਸੀਮਾ: ਪੱਲਵੀ ਨੇ 2021 ਵਿੱਚ ਐਮ.ਕਾਮ ਦੀ ਪੜ੍ਹਾਈ ਪੂਰੀ ਕੀਤੀ ਸੀ, ਜਦੋਂ ਕਿ ਛੋਟੀ ਭੈਣ ਵੈਸ਼ਨਵੀ 2 ਸਾਲਾਂ ਤੋਂ ਪੜ੍ਹਾਈ ਨਹੀਂ ਕਰ ਰਹੀ ਸੀ। 10ਵੀਂ ਪਾਸ ਕਰਨ ਤੋਂ ਬਾਅਦ ਉਹ ਘਰ ਹੀ ਸੀ। ਪੁਲਿਸ ਪੁੱਛਗਿੱਛ ਦੌਰਾਨ ਊਸ਼ਾ ਦੀ ਭੈਣ ਸੀਮਾ ਨੇ ਦੱਸਿਆ ਕਿ ਕਰੀਬ 14 ਮਹੀਨੇ ਪਹਿਲਾਂ ਉਹ ਆਪਣੀ ਭੈਣ ਨੂੰ ਮਿਲਣ ਆਈ ਸੀ। ਉਸ ਸਮੇਂ ਸਭ ਕੁਝ ਠੀਕ ਸੀ। ਉਹ ਬਿਮਾਰੀ ਕਾਰਨ ਨਿਸ਼ਚਿਤ ਤੌਰ 'ਤੇ ਕਮਜ਼ੋਰ ਸੀ ਪਰ ਇਹ ਸਮਝ ਨਹੀਂ ਆ ਰਿਹਾ ਸੀ ਕਿ ਕੋਈ ਅਣਸੁਖਾਵੀਂ ਘਟਨਾ ਵਾਪਰ ਸਕਦੀ ਹੈ। ਉਹ ਫੋਨ 'ਤੇ ਗੱਲ ਕਰਨ ਲਈ ਲਗਾਤਾਰ ਫੋਨ ਵੀ ਕਰਦੀ ਸੀ। ਪਰ ਦੋਵੇਂ ਧੀਆਂ ਨੇ ਫੋਨ ਨਹੀਂ ਚੁੱਕਿਆ ਅਤੇ ਜਦੋਂ ਵੀ ਫੋਨ ਚੁੱਕਦੀਆਂ ਸੀ ਤਾਂ ਭੈਣ ਨਾਲ ਗੱਲ ਨਹੀਂ ਕਰਵਾਉਂਦੀਆਂ ਸੀ। ਸੀਮਾ ਨੇ ਪੁਲਿਸ ਨੂੰ ਦੱਸਿਆ ਕਿ ਇਕ-ਦੋ ਵਾਰ ਊਸ਼ਾ ਦੀਆਂ ਬੇਟੀਆਂ ਨੇ ਉਸ ਤੋਂ ਕੁਝ ਪੈਸੇ ਮੰਗੇ ਸਨ। ਜੋ ਉਸ ਨੇ ਆਨਲਾਈਨ ਟਰਾਂਸਫਰ ਕਰ ਦਿੱਤੇ ਸੀ।
ਘਰ ਦੀ ਆਰਥਿਕ ਹਾਲਤ ਮਾੜੀ ਹੋਣ ਕਾਰਨ ਖਾਣ-ਪੀਣ ਸਮੇਤ ਹਰ ਚੀਜ਼ ਦਾ ਬਹੁਤ ਬੁਰਾ ਹਾਲ ਸੀ। ਕਿਉਂਕਿ, ਉਨ੍ਹਾਂ ਨੂੰ ਸਰਕਾਰੀ ਰਾਸ਼ਨ ਮਿਲਦਾ ਸੀ। ਇਸ ਲਈ ਉਹ ਸਰਕਾਰੀ ਰਾਸ਼ਨ ਦੇ ਨਾਲ-ਨਾਲ ਆਪਣੀ ਮਾਂ ਵੱਲੋਂ ਘਰ ਵਿੱਚ ਰੱਖੇ ਗਹਿਣੇ ਵੇਚ ਕੇ ਆਪਣੇ ਘਰ ਦਾ ਖਰਚਾ ਪੂਰਾ ਕਰ ਰਹੀ ਸੀ। ਊਸ਼ਾ ਦੇ ਪਿਤਾ ਰਾਮਕ੍ਰਿਸ਼ਨ ਘਰ ਦਾ ਬਿਜਲੀ ਬਿੱਲ ਅਦਾ ਕਰਦੇ ਸਨ। ਇਸ ਲਈ ਬਿਜਲੀ ਦਾ ਕੋਈ ਕੱਟ ਨਹੀਂ ਸੀ ਅਤੇ ਸਭ ਕੁਝ ਆਮ ਵਾਂਗ ਚੱਲ ਰਿਹਾ ਸੀ।
ਗੰਦੀ ਬਦਬੂ ਆਉਣ ਦੀ ਗੱਲ ਕਿਸੇ ਨੂੰ ਵੀ ਹਜ਼ਮ ਨਹੀਂ ਹੋ ਰਹੀ : ਪੁਲਿਸ ਪੁੱਛਗਿੱਛ ਦੌਰਾਨ ਗੁਆਂਢੀਆਂ ਨੇ ਵੀ ਕੁਝ ਅਜਿਹੀਆਂ ਗੱਲਾਂ ਦੱਸੀਆਂ, ਜਿਨ੍ਹਾਂ ਨੇ ਪੁਲਿਸ ਨੂੰ ਸ਼ੱਕ 'ਚ ਪਾ ਦਿੱਤਾ। ਇਹ ਗੱਲ ਕਿਸੇ ਨੂੰ ਹਜ਼ਮ ਨਹੀਂ ਹੋ ਰਹੀ ਕਿ ਇੱਕ ਸਾਲ ਤੋਂ ਘਰ ਵਿੱਚ ਇੱਕ ਲਾਸ਼ ਪਈ ਸੀ ਅਤੇ ਕੋਈ ਬਦਬੂ ਨਹੀਂ ਸੀ ਆ ਰਹੀ। ਹਾਲਾਂਕਿ ਇਸ ਸਬੰਧੀ ਜਦੋਂ ਦੋਵਾਂ ਲੜਕੀਆਂ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੇ ਲਾਸ਼ ਨੂੰ ਘਰ 'ਚ ਇਸ ਲਈ ਰੱਖਿਆ ਸੀ ਕਿਉਂਕਿ ਉਨ੍ਹਾਂ ਨੂੰ ਲੱਗਦਾ ਸੀ ਕਿ ਜੇਕਰ ਉਨ੍ਹਾਂ ਨੇ ਕਿਸੇ ਨੂੰ ਦੱਸਿਆ ਤਾਂ ਉਨ੍ਹਾਂ ਨੂੰ ਜੇਲ੍ਹ ਭੇਜ ਦਿੱਤਾ ਜਾਵੇਗਾ। ਡਰ ਕਾਰਨ ਉਨ੍ਹਾਂ ਨੇ ਇਸ ਬਾਰੇ ਕਿਸੇ ਨੂੰ ਜਾਣਕਾਰੀ ਨਹੀਂ ਦਿੱਤੀ। ਜਦੋਂ ਉਨ੍ਹਾਂ ਦੀ ਮਾਂ ਦੀ ਲਾਸ਼ ਦੀ ਬਦਬੂ ਘਰ ਵਿਚ ਫੈਲਣ ਲੱਗੀ ਤਾਂ ਉਹ ਛੱਤ 'ਤੇ ਰਹਿਣ ਲੱਗ ਪਏ। ਉਹ ਛੱਤ 'ਤੇ ਖਾਣਾ ਬਣਾਉਂਦੀਆਂ ਸੀ ਅਤੇ ਉਥੇ ਹੀ ਖਾਣਾ ਖਾਂਦੀਆਂ ਸੀ। ਗੁਆਂਢੀਆਂ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਲਾਸ਼ ਦੀ ਬਦਬੂ ਜ਼ਰੂਰ ਆ ਰਹੀ ਸੀ ਪਰ ਲੋਕ ਇਹ ਸੋਚ ਕੇ ਚੁੱਪ ਸਨ ਕਿ ਸ਼ਾਇਦ ਇਹ ਬਦਬੂ ਆਸ-ਪਾਸ ਪਏ ਕਿਸੇ ਮਰੇ ਜਾਂ ਅਵਾਰਾ ਪਸ਼ੂ ਕਾਰਨ ਆ ਰਹੀ ਹੈ ਪਰ ਕਿਸੇ ਨੂੰ ਕੀ ਪਤਾ ਸੀ ਕਿ ਇਲਾਕੇ ਵਿੱਚ ਇੰਨੀ ਵੱਡੀ ਘਟਨਾ ਵਾਪਰ ਗਈ ਹੈ ਅਤੇ ਕਿਸੇ ਨੂੰ ਪਤਾ ਵੀ ਨਹੀਂ ਲੱਗਾ।
- ਜੋਧਪੁਰ 'ਚ ਵੋਟਿੰਗ ਤੋਂ ਬਾਅਦ ਰਿਜ਼ਰਵ EVM ਗਾਇਬ, ਸੈਕਟਰ ਅਫਸਰ ਮੁਅੱਤਲ, ਜਾਣੋ ਪੂਰਾ ਮਾਮਲਾ
- ਸਾਬਕਾ ਮੰਤਰੀ ਧਰਮਸੋਤ ਅਤੇ ਗਿਲਜ਼ੀਆਂ ਦੇ ਘਰ 'ਤੇ ਈਡੀ ਦੀ ਰੇਡ, ਤੜਕੇ ਰਿਹਾਇਸ਼ 'ਤੇ ਪਹੁੰਚੀਆਂ ਈਡੀ ਦੀਆਂ ਟੀਮਾਂ, ਕਈ ਕਰੀਬੀ ਵੀ ਰਡਾਰ 'ਤੇ
- ਲੁਧਿਆਣਾ ਪੁਲਿਸ ਵਲੋਂ ਐਨਕਾਉਂਟਰ ਵਿੱਚ ਮਾਰੇ ਗਏ ਗੈਂਗਸਟਰ ਸੰਜੂ ਬਾਹਮਣ ਦੇ ਪਿਤਾ ਨੇ ਕਿਹਾ- ਸਾਡੇ ਕਹਿਣੇ ਤੋਂ ਬਾਹਰ ਸੀ ਪੁੱਤ..., ਦਿਖਾਏ ਘਰ ਦੇ ਹਾਲਾਤ
ਪਰਿਵਾਰ ਦੀ ਆਰਥਿਕ ਹਾਲਤ ਸੀ ਖ਼ਰਾਬ: ਪੁਲਿਸ ਪੁੱਛਗਿੱਛ ਵਿੱਚ ਇਹ ਵੀ ਸਾਹਮਣੇ ਆਇਆ ਕਿ ਊਸ਼ਾ ਦੁਆਰਾ ਚਲਾਈ ਜਾਂਦੀ ਕਾਸਮੈਟਿਕ ਦੀ ਦੁਕਾਨ 2021 ਵਿੱਚ ਕੋਵਿਡ ਕਾਲ ਦੌਰਾਨ ਬੰਦ ਹੋ ਗਈ ਸੀ। ਇਸ ਤੋਂ ਬਾਅਦ ਪਰਿਵਾਰ ਦੀ ਆਰਥਿਕ ਹਾਲਤ ਵਿਗੜਨ ਲੱਗੀ ਅਤੇ ਊਸ਼ਾ ਤਪਦਿਕ ਦਾ ਸ਼ਿਕਾਰ ਹੋ ਗਈ। ਇਸ ਤੋਂ ਬਾਅਦ ਹੌਲੀ-ਹੌਲੀ ਦੋਵਾਂ ਧੀਆਂ ਦਾ ਮਾਨਸਿਕ ਸੰਤੁਲਨ ਵਿਗੜਨਾ ਸ਼ੁਰੂ ਹੋ ਗਿਆ। ਆਰਥਿਕ ਤੰਗੀ ਅਤੇ ਘਰ ਦੀਆਂ ਕਈ ਤਰ੍ਹਾਂ ਦੀਆਂ ਮੁਸ਼ਕਲਾਂ ਕਾਰਨ ਦੋਵੇਂ ਧੀਆਂ ਬਾਹਰੀ ਦੁਨੀਆਂ ਤੋਂ ਦੂਰ ਹੋ ਕੇ ਘਰਾਂ ਤੱਕ ਹੀ ਸੀਮਤ ਹੋ ਕੇ ਰਹਿ ਗਈਆਂ। ਫਿਲਹਾਲ ਪੁਲਿਸ ਨੇ ਲਾਸ਼ ਨੂੰ ਪੋਸਟਮਾਰਟਮ ਅਤੇ ਫੋਰੈਂਸਿਕ ਜਾਂਚ ਲਈ ਭੇਜ ਦਿੱਤਾ ਹੈ। ਦੋਵੇਂ ਧੀਆਂ ਤੋਂ ਵੀ ਪੁੱਛਗਿੱਛ ਕੀਤੀ ਜਾ ਰਹੀ ਹੈ। ਪੁਲਿਸ ਨੇ ਘਰ ਨੂੰ ਸੀਲ ਕਰ ਦਿੱਤਾ ਹੈ ਅਤੇ ਦੋਵੇਂ ਲੜਕੀਆਂ ਫਿਲਹਾਲ ਗੁਆਂਢੀ ਦੇ ਘਰ ਹਨ।
