ਨਵੀਂ ਦਿੱਲੀ: ਨਿਊਜ਼ੀਲੈਂਡ ਦੀ ਪ੍ਰਧਾਨ ਮੰਤਰੀ ਜੇਸਿੰਡਾ ਅਰਡਨ ਨੇ 9 ਜੂਨ ਨੂੰ ਐਲਾਨ ਕੀਤਾ ਕਿ ਉਨ੍ਹਾਂ ਦਾ ਦੇਸ਼ ਕੋਰੋਨਾ ਮੁਕਤ ਹੋ ਗਿਆ ਹੈ ਇਸ ਤਰ੍ਹਾਂ ਨਿਊਜ਼ੀਲੈਂਡ ਵਿਸ਼ਵ ਦਾ ਨੌਵਾਂ ਕੋਰੋਨਾ ਮੁਕਤ ਦੇਸ਼ ਬਣ ਗਿਆ ਹੈ। ਨਿਉਜ਼ੀਲੈਂਡ ਨੂੰ ਕੋਰੋਨਾ ਮੁਕਤ ਬਣਾਉਣ ਲਈ ਦੇਸ਼ ਵੱਲੋਂ ਕੀਤੇ ਗਏ ਉਪਰਾਲਿਆਂ ਦੀ ਦੁਨੀਆ ਭਰ 'ਚ ਸ਼ਲਾਘਾ ਕੀਤੀ ਜਾ ਰਹੀ ਹੈ। ਹਾਲਾਂਕਿ ਨਿਊਜ਼ੀਲੈਂਡ ਲਈ ਕੋਰੋਨਾ ਤੋਂ ਨਿਜਾਤ ਪਾਉਣਾ ਆਸਾਨ ਨਹੀਂ ਸੀ ਪਰ ਸਖ਼ਤ ਫੈਸਲੇ ਅਤੇ ਸਰਕਾਰ ਦੀ ਦੂਰ ਆਗਾਮੀ ਸੋਚ ਨੇ ਦੇਸ਼ ਨੂੰ ਇਸ ਵਾਇਰਸ ਤੋਂ ਉਭਾਰਿਆ ਹੈ। ਦੱਸਣਯੋਗ ਹੈ ਕਿ ਨਿਊਜ਼ੀਲੈਂਡ 'ਚ 29 ਮਈ ਨੂੰ ਕੋਰੋਨਾ ਦਾ ਆਖ਼ਰੀ ਮਾਮਲਾ ਸਾਹਮਣੇ ਆਇਆ ਸੀ।
ਸੀਨੀਅਰ ਪੱਤਰਕਾਰ ਸਮਿਤਾ ਸ਼ਰਮਾ ਨਾਲ ਗੱਲਬਾਤ ਕਰਦਿਆਂ ਭਾਰਤੀ ਹਾਈ ਕਮਿਸ਼ਨਰ ਮੁਕਤੇਸ਼ ਨੇ ਦੱਸਿਆ ਕਿ ਕਿਸ ਤਰ੍ਹਾਂ ਨਿਊਜ਼ੀਲੈਂਡ ਨੇ ਕੋਰੋਨਾ ਵਾਇਰਸ ਤੋਂ ਨਿਜਾਤ ਪਾਈ ਹੈ। ਹਾਈ ਕਮਿਸ਼ਨਰ ਮੁਕਤੇਸ਼ ਨੇ ਕਿਹਾ ਕਿ ਦੇਸ਼ 'ਚ 1500 ਲੋਕ ਕੋਰੋਨਾ ਤੋਂ ਪੀੜਤ ਸਨ ਜਿਨ੍ਹਾਂ 'ਚੋਂ 22 ਲੋਕਾਂ ਦੀ ਮੌਤ ਹੋ ਗਈ ਹੈ। ਨਿਊਜ਼ੀਲੈਂਡ 50 ਲੱਖ ਦੀ ਆਬਾਦੀ ਵਾਲਾ ਦੇਸ਼ ਹੈ ਪਰ ਖੇਤਰਫਲ ਦੀ ਨਜ਼ਰ ਤੋਂ ਬਹੁਤ ਫੈਲਿਆ ਹੋਇਆ ਹੈ ਇਸ ਲਈ ਭਾਰਤ ਦੇ ਮੁਕਾਬਲੇ ਇੱਥੇ ਲੋਕਾਂ ਲਈ ਆਪਣੇ ਆਪ ਨੂੰ ਏਕਾਂਤਵਾਸ 'ਚ ਰੱਖਣਾ ਵਧੇਰੇ ਆਸਾਨ ਹੈ।
ਇਸ ਦੇ ਨਾਲ ਹੀ ਉਨ੍ਹਾਂ ਕਿਹਾ ਕਿ ਇਹ ਵੀ ਵੱਡਾ ਸਵਾਲ ਹੈ ਕਿ ਸਰਕਾਰ ਲੋਕਾਂ ਨੂੰ ਆਪਣੇ ਭਰੋਸੇ 'ਚ ਕਿਵੇਂ ਲੈਂਦੀ ਹੈ। ਉਨ੍ਹਾਂ ਨਿਊਜ਼ੀਲੈਂਡ ਦੇ ਕੋਰੋਨਾ ਮੁਕਤ ਹੋਣ ਦਾ ਸਿਹਰਾ ਲੋਕਾਂ ਦਾ ਸਰਾਕਰ 'ਤੇ ਭਰੋਸਾ ਅਤੇ ਸਹਿਯੋਗ ਦੇਣ ਨੂੰ ਦਿੱਤਾ।
ਇਸ ਦੇ ਨਾਲ ਹੀ ਪੱਤਰਕਾਰ ਸਮਿਤਾ ਨਾਲ ਗੱਲਬਾਤ ਕਰਦਿਆਂ ਜਿੱਥੇ ਮੁਕਤੇਸ਼ ਨੇ ਨਿਊਜ਼ੀਲੈਂਡ ਦੇ ਕੋਰੋਨਾ ਮੁਕਤ ਹੋਣ ਸਬੰਧੀ ਕਈ ਗੱਲਾਂ ਦੱਸੀਆਂ ਉੱਥੇ ਹੀ ਕੌਮਾਂਤਰੀ ਖੇਡਾਂ ਅਤੇ ਵਪਾਰ ਨੂੰ ਲੈ ਕੇ ਚੀਨ 'ਤੇ ਨਿਊਜ਼ੀਲੈਂਡ ਦੇ ਰਿਸ਼ਤਿਆਂ 'ਤੇ ਵੀ ਗੱਲਬਾਤ ਕੀਤੀ।
