ਨਵੀਂ ਦਿੱਲੀ : ਸਟਾਰ ਵਿਕਟਕੀਪਰ ਬੱਲੇਬਾਜ਼ ਸੰਜੂ ਸੈਮਸਨ ਇੰਗਲੈਂਡ ਖਿਲਾਫ ਪੰਜਵੇਂ ਟੀ-20 ਮੈਚ 'ਚ ਆਪਣੀ ਉਂਗਲੀ ਉੱਤੇ ਸੱਟ ਲੱਗਣ ਕਾਰਨ ਛੇ ਹਫਤਿਆਂ ਲਈ ਕ੍ਰਿਕਟ ਤੋਂ ਦੂਰ ਹੋ ਜਾਵੇਗਾ। ਮੁੰਬਈ ਦੇ ਵਾਨਖੇੜੇ ਸਟੇਡੀਅਮ 'ਚ ਖੇਡੀ ਗਈ ਦੁਵੱਲੀ ਸੀਰੀਜ਼ ਦੇ ਫਾਈਨਲ ਮੈਚ 'ਚ ਜੋਫਰਾ ਆਰਚਰ ਦਾ ਸਾਹਮਣਾ ਕਰਦੇ ਹੋਏ ਸੱਜੇ ਹੱਥ ਦੇ ਬੱਲੇਬਾਜ਼ ਨੂੰ ਗੰਭੀਰ ਸੱਟ ਲੱਗ ਗਈ।
6 ਹਫ਼ਤਿਆਂ ਤੱਕ ਰਹਿਣਗੇ ਮੈਦਾਨ ਤੋਂ ਬਾਹਰ
ਪੀਟੀਆਈ ਦੀ ਰਿਪੋਰਟ ਮੁਤਾਬਕ 30 ਸਾਲਾ ਖਿਡਾਰੀ ਦੇ ਛੇ ਹਫ਼ਤਿਆਂ ਤੱਕ ਮੈਦਾਨ ਤੋਂ ਦੂਰ ਰਹਿਣ ਦੀ ਸੰਭਾਵਨਾ ਹੈ। ਉਹ ਸ਼ਨੀਵਾਰ ਨੂੰ ਜੰਮੂ-ਕਸ਼ਮੀਰ ਦੇ ਖਿਲਾਫ ਰਣਜੀ ਟਰਾਫੀ ਕੁਆਰਟਰ ਫਾਈਨਲ ਤੋਂ ਖੁੰਝ ਜਾਵੇਗਾ। ਰਿਪੋਰਟ ਵਿੱਚ ਅੱਗੇ ਦੱਸਿਆ ਗਿਆ ਹੈ ਕਿ ਸੰਜੂ ਆਪਣੇ ਗ੍ਰਹਿ ਸ਼ਹਿਰ ਤਿਰੂਵਨੰਤਪੁਰਮ ਵਾਪਸ ਆ ਗਿਆ ਹੈ ਅਤੇ ਨੈਸ਼ਨਲ ਕ੍ਰਿਕਟ ਅਕੈਡਮੀ (ਐਨਸੀਏ) ਵਿੱਚ ਆਪਣਾ ਪੁਨਰਵਾਸ ਪੂਰਾ ਕਰਨ ਤੋਂ ਬਾਅਦ ਹੀ ਅਭਿਆਸ ਮੁੜ ਸ਼ੁਰੂ ਕਰੇਗਾ।
ਰਣਜੀ ਟਰਾਫੀ ਦਾ ਕੁਆਰਟਰ ਫਾਈਨਲ ਖੇਡਣ ਦੀ ਸੰਭਾਵਨਾ ਨਹੀਂ
ਮਾਮਲੇ ਦੀ ਜਾਣਕਾਰੀ ਰੱਖਣ ਵਾਲੇ ਬੀਸੀਸੀਆਈ ਦੇ ਇੱਕ ਸੂਤਰ ਨੇ ਪੀਟੀਆਈ ਨੂੰ ਦੱਸਿਆ, 'ਸੈਮਸਨ ਦੀ ਸੱਜੇ ਹੱਥ ਦੀ ਉਂਗਲੀ ਵਿੱਚ ਫਰੈਕਚਰ ਹੈ। ਉਸ ਨੂੰ ਨੈੱਟ 'ਤੇ ਅਭਿਆਸ ਸ਼ੁਰੂ ਕਰਨ 'ਚ ਪੰਜ ਤੋਂ ਛੇ ਹਫ਼ਤੇ ਲੱਗਣਗੇ। ਇਸ ਲਈ ਉਸ ਦੇ ਕੇਰਲ (ਜੰਮੂ-ਕਸ਼ਮੀਰ ਦੇ ਖਿਲਾਫ) ਲਈ 8-12 ਫਰਵਰੀ ਨੂੰ ਪੁਣੇ ਵਿੱਚ ਰਣਜੀ ਟਰਾਫੀ ਦਾ ਕੁਆਰਟਰ ਫਾਈਨਲ ਖੇਡਣ ਦੀ ਕੋਈ ਸੰਭਾਵਨਾ ਨਹੀਂ ਹੈ। ਇਸ ਗੱਲ ਦੀ ਪੂਰੀ ਸੰਭਾਵਨਾ ਹੈ ਕਿ ਆਈਪੀਐਲ ਵਿੱਚ ਰਾਜਸਥਾਨ ਰਾਇਲਸ ਲਈ ਉਸ ਦੀ ਵਾਪਸੀ ਹੋਵੇਗੀ।'
ਆਰਚਰ ਦੁਆਰਾ 150 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫਤਾਰ ਨਾਲ ਸੁੱਟੀ ਗਈ ਤੀਜੀ ਗੇਂਦ 'ਤੇ ਸੈਮਸਨ ਨੂੰ ਸੱਟ ਲੱਗ ਗਈ। ਹਾਲਾਂਕਿ ਸੱਜੇ ਹੱਥ ਦੇ ਇਸ ਬੱਲੇਬਾਜ਼ ਨੇ ਫਿਰ ਚੌਕਾ ਅਤੇ ਛੱਕਾ ਲਗਾਇਆ ਪਰ ਸੱਟ ਕਾਰਨ ਉਨ੍ਹਾਂ ਦੀ ਉਂਗਲੀ 'ਚ ਸੋਜ ਵਧ ਗਈ। ਸੀਰੀਜ਼ 'ਚ ਆਉਣ ਤੋਂ ਪਹਿਲਾਂ ਸੈਮਸਨ ਨੇ ਬੰਗਲਾਦੇਸ਼ ਅਤੇ ਦੱਖਣੀ ਅਫਰੀਕਾ ਖਿਲਾਫ ਪਿਛਲੇ ਸੱਤ ਮੈਚਾਂ 'ਚ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਸੀ ਅਤੇ ਤਿੰਨ ਸੈਂਕੜੇ ਲਗਾਏ ਸਨ। ਹਾਲਾਂਕਿ ਉਹ ਚੈਂਪੀਅਨਜ਼ ਟਰਾਫੀ ਟੀਮ 'ਚ ਜਗ੍ਹਾ ਬਣਾਉਣ ਤੋਂ ਖੁੰਝ ਗਏ। ਸੈਮਸਨ ਆਰਚਰ ਦੀਆਂ ਸ਼ਾਰਟ-ਪਿਚ ਗੇਂਦਾਂ ਤੋਂ ਲਗਾਤਾਰ ਪ੍ਰੇਸ਼ਾਨ ਰਹੇ ਸਨ।
