ਹੈਦਰਾਬਾਦ: ਮੀਂਹ ਦਾ ਮੌਸਮ ਸਾਹ ਦੇ ਮਰੀਜ਼ਾਂ ਲਈ ਚੁਣੌਤੀਆਂ ਲੈ ਕੇ ਆ ਸਕਦਾ ਹੈ, ਪਰ ਸਹੀ ਸਾਵਧਾਨੀਆਂ ਅਤੇ ਇਲਾਜ ਨਾਲ ਇਨ੍ਹਾਂ ਸਮੱਸਿਆਵਾਂ ਤੋਂ ਬਚਿਆ ਜਾ ਸਕਦਾ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਸਾਫ਼-ਸਫ਼ਾਈ, ਦਵਾਈਆਂ ਦਾ ਨਿਯਮਤ ਸੇਵਨ ਅਤੇ ਸਹੀ ਖਾਣ-ਪੀਣ ਵਰਗੇ ਉਪਾਵਾਂ ਨਾਲ ਸਾਹ ਰੋਗੀ ਇਸ ਮੌਸਮ ਵਿੱਚ ਵੀ ਤੰਦਰੁਸਤ ਰਹਿ ਸਕਦੇ ਹਨ ਅਤੇ ਮੀਂਹ ਦੇ ਮੌਸਮ ਦਾ ਆਨੰਦ ਮਾਣ ਸਕਦੇ ਹਨ।
ਮੀਂਹ ਦੇ ਮੌਸਮ ਵਿੱਚ ਸਾਹ ਦੀ ਸਮੱਸਿਆ: ਦਿੱਲੀ ਦੇ ਡਾਕਟਰ ਅਸ਼ਰੀਰ ਕੁਰੈਸ਼ੀ ਦਾ ਕਹਿਣਾ ਹੈ ਕਿ ਮੀਂਹ ਦੇ ਮੌਸਮ ਦੌਰਾਨ ਵਾਤਾਵਰਣ ਵਿੱਚ ਨਮੀ ਅਤੇ ਠੰਡਕ ਦਮੇ ਦੇ ਮਰੀਜ਼ਾਂ ਲਈ ਗੰਭੀਰ ਸਮੱਸਿਆਵਾਂ ਪੈਦਾ ਕਰ ਸਕਦੀ ਹੈ। ਇਸ ਦੇ ਨਾਲ ਹੀ, ਨਮੀ ਕਾਰਨ ਵਾਤਾਵਰਨ ਵਿਚ ਉੱਲੀ ਅਤੇ ਧੂੜ ਦੇ ਕਣ ਵੱਧ ਜਾਂਦੇ ਹਨ, ਜੋ ਦਮੇ ਦੇ ਮਰੀਜ਼ਾਂ ਵਿੱਚ ਅਸਥਮਾ ਦੇ ਦੌਰੇ ਨੂੰ ਵਧਾ ਸਕਦੇ ਹਨ।
ਇਸ ਮੌਸਮ 'ਚ ਐਲਰਜੀ ਦੇ ਮਾਮਲੇ ਵੀ ਵੱਧ ਜਾਂਦੇ ਹਨ। ਦਰਅਸਲ, ਇਸ ਮੌਸਮ ਦੌਰਾਨ ਵਾਤਾਵਰਨ ਵਿੱਚ ਉੱਲੀ ਅਤੇ ਧੂੜ ਦੇ ਕਣਾਂ ਦੇ ਨਾਲ-ਨਾਲ ਪਰਾਗ ਕਣਾਂ, ਮੱਛਰਾਂ, ਮੱਖੀਆਂ, ਮੱਕੜੀਆਂ ਅਤੇ ਹੋਰ ਕਈ ਕੀੜਿਆਂ ਦਾ ਪ੍ਰਕੋਪ ਵੀ ਵੱਧ ਜਾਂਦਾ ਹੈ, ਜੋ ਸਿੱਧੇ ਅਤੇ ਅਸਿੱਧੇ ਤੌਰ 'ਤੇ ਸਾਹ ਦੇ ਮਰੀਜ਼ਾਂ ਅਤੇ ਕਈ ਵਾਰ ਆਮ ਲੋਕਾਂ ਵਿੱਚ ਵੀ ਐਲਰਜੀ ਦਾ ਕਾਰਨ ਬਣ ਸਕਦੇ ਹਨ। ਇਸ ਤੋਂ ਇਲਾਵਾ, ਜਿਨ੍ਹਾਂ ਲੋਕਾਂ ਦੇ ਘਰ ਵਿੱਚ ਕੁੱਤੇ ਜਾਂ ਬਿੱਲੀਆਂ ਵਰਗੇ ਪਾਲਤੂ ਜਾਨਵਰ ਹਨ ਜਾਂ ਜੋ ਇਸ ਮੌਸਮ ਵਿੱਚ ਜਾਨਵਰਾਂ ਦੇ ਜ਼ਿਆਦਾ ਸੰਪਰਕ ਵਿੱਚ ਰਹਿੰਦੇ ਹਨ, ਉਨ੍ਹਾਂ ਵਿੱਚ ਜਾਨਵਰਾਂ ਤੋਂ ਹੋਣ ਵਾਲੀ ਐਲਰਜੀ ਵੀ ਵੱਧ ਸਕਦੀ ਹੈ। ਇਸ ਕਾਰਨ ਪੀੜਤ ਨੂੰ ਕਈ ਵਾਰ ਕੁਝ ਪਲਾਂ ਲਈ ਅਤੇ ਕਈ ਵਾਰ ਲੰਬੇ ਸਮੇਂ ਤੱਕ ਐਲਰਜੀ ਹੋ ਸਕਦੀ ਹੈ। ਅਜਿਹੀ ਸਥਿਤੀ ਵਿੱਚ ਪੀੜਤ ਨੂੰ ਛਿੱਕ ਆਉਣਾ, ਅੱਖਾਂ ਵਿੱਚ ਜਲਨ, ਨੱਕ ਵਿੱਚ ਪਾਣੀ ਆਉਣਾ ਅਤੇ ਸਾਹ ਲੈਣ ਵਿੱਚ ਮੁਸ਼ਕਲ ਵਰਗੀਆਂ ਕਈ ਸਮੱਸਿਆਵਾਂ ਹੋ ਸਕਦੀਆਂ ਹਨ।
ਮੀਂਹ ਦੇ ਮੌਸਮ ਵਿੱਚ ਬੈਕਟੀਰੀਆ ਅਤੇ ਵਾਇਰਸ ਵੀ ਤੇਜ਼ੀ ਨਾਲ ਫੈਲਦੇ ਹਨ। ਇਸ ਲਈ ਇਨਫੈਕਸ਼ਨ ਦਾ ਖ਼ਤਰਾ ਵੀ ਵੱਧ ਜਾਂਦਾ ਹੈ, ਜਿਸ ਨਾਲ ਸਾਹ ਦੀ ਸਮੱਸਿਆ ਅਤੇ ਐਲਰਜੀ ਹੋ ਸਕਦੀ ਹੈ। ਇਸ ਮੌਸਮ ਵਿੱਚ ਖਾਸ ਤੌਰ 'ਤੇ ਅਸਥਮਾ, ਬ੍ਰੌਨਕਾਈਟਸ ਅਤੇ ਨਿਮੋਨੀਆ ਵਰਗੀਆਂ ਸਮੱਸਿਆਵਾਂ ਦੇ ਮਾਮਲੇ ਬਹੁਤ ਵੱਧ ਜਾਂਦੇ ਹਨ।
- ਕੀ ਪਿਆਜ਼ ਦਾ ਜੂਸ ਵਾਲਾਂ ਦੇ ਝੜਨ ਨੂੰ ਰੋਕਣ ਅਤੇ ਵਧਾਉਣ ਵਿੱਚ ਕਾਰਗਰ ਹੈ? ਜਾਣੋ ਕੀ ਕਹਿੰਦੀ ਹੈ ਖੋਜ - Onion Juice for Hair
- ਸਵੇਰੇ ਉੱਠਦੇ ਹੀ ਸਭ ਤੋਂ ਪਹਿਲਾ ਪੀਓ ਨਿੰਬੂ ਪਾਣੀ, ਕਈ ਸਮੱਸਿਆਵਾਂ ਤੋਂ ਮਿਲੇਗੀ ਰਾਹਤ - Health Benefits of Lemon Water
- ਮਾਪੇ ਹੋ ਜਾਣ ਸਾਵਧਾਨ! ਮੀਂਹ ਦਾ ਮੌਸਮ ਬੱਚਿਆਂ 'ਚ ਇੰਨਫੈਕਸ਼ਨ ਅਤੇ ਐਲਰਜ਼ੀ ਦਾ ਬਣੇਗਾ ਕਾਰਨ, ਬਚਾਅ ਲਈ ਬਸ ਅਪਣਾਓ ਇਹ ਤਰੀਕਾ - Child Care in Rain
ਸਾਹ ਦੀ ਸਮੱਸਿਆ ਤੋਂ ਬਚਣ ਲਈ ਸਾਵਧਾਨੀਆਂ: ਡਾ: ਅਸ਼ੀਰ ਕੁਰੈਸ਼ੀ ਦੱਸਦੇ ਹਨ ਕਿ ਜੋ ਲੋਕ ਸਾਹ ਦੀ ਕਿਸੇ ਵੀ ਸਮੱਸਿਆ ਜਿਵੇਂ ਕਿ ਦਮੇ, ਬ੍ਰੌਨਕਾਈਟਸ ਜਾਂ ਫੇਫੜਿਆਂ ਨਾਲ ਸਬੰਧਤ ਕਿਸੇ ਵੀ ਬਿਮਾਰੀ ਤੋਂ ਪੀੜਤ ਹਨ ਜਾਂ ਜੋ ਐਲਰਜੀ ਪ੍ਰਤੀ ਵਧੇਰੇ ਸੰਵੇਦਨਸ਼ੀਲ ਹਨ, ਉਨ੍ਹਾਂ ਨੂੰ ਇਸ ਮੌਸਮ ਵਿੱਚ ਵਧੇਰੇ ਸਾਵਧਾਨ ਰਹਿਣ ਦੀ ਲੋੜ ਹੈ। ਇਹ ਬਹੁਤ ਜ਼ਰੂਰੀ ਹੈ ਕਿ ਅਜਿਹੇ ਲੋਕਾਂ ਨੂੰ ਆਪਣੀਆਂ ਦਵਾਈਆਂ, ਖੁਰਾਕ ਅਤੇ ਵਿਵਹਾਰ ਬਾਰੇ ਅਨੁਸ਼ਾਸਨ ਅਤੇ ਸਾਵਧਾਨੀਆਂ ਵਰਤਣੀਆਂ ਚਾਹੀਦੀਆਂ ਹਨ। ਇਸ ਤੋਂ ਇਲਾਵਾ, ਕੁਝ ਅਜਿਹੀਆਂ ਗੱਲ੍ਹਾਂ ਅਤੇ ਸਾਵਧਾਨੀਆਂ ਹਨ, ਜਿਨ੍ਹਾਂ ਨੂੰ ਅਪਣਾ ਕੇ ਲੋਕ ਇਸ ਦਾ ਪ੍ਰਭਾਵ ਵਧਣ ਤੋਂ ਪਹਿਲਾਂ ਹੀ ਇਸ ਸਮੱਸਿਆ 'ਤੇ ਕਾਬੂ ਪਾ ਸਕਦੇ ਹਨ ਅਤੇ ਮੀਂਹ ਦੇ ਮੌਸਮ 'ਚ ਹੋਣ ਵਾਲੀਆਂ ਸਮੱਸਿਆਵਾਂ ਦੇ ਪ੍ਰਭਾਵਾਂ ਤੋਂ ਵੀ ਸੁਰੱਖਿਅਤ ਰਹਿ ਸਕਦੇ ਹਨ। ਉਨ੍ਹਾਂ ਵਿੱਚੋਂ ਕੁਝ ਹੇਠ ਲਿਖੇ ਅਨੁਸਾਰ ਹਨ:-
ਸਫਾਈ ਬਣਾਈ ਰੱਖੋ: ਆਪਣੇ ਘਰ ਨੂੰ ਸਾਫ਼ ਰੱਖੋ। ਉੱਲੀ ਅਤੇ ਧੂੜ ਦੇ ਕਣਾਂ ਨੂੰ ਘਟਾਉਣ ਲਈ ਨਿਯਮਿਤ ਤੌਰ 'ਤੇ ਸਫ਼ਾਈ ਕਰੋ। ਏਅਰ ਪਿਊਰੀਫਾਇਰ ਦੀ ਵਰਤੋਂ ਕਰਨਾ ਵੀ ਮਦਦਗਾਰ ਹੋ ਸਕਦਾ ਹੈ।
ਲਾਗ ਤੋਂ ਬਚੋ: ਮੀਂਹ ਦੇ ਮੌਸਮ ਵਿੱਚ ਲਾਗ ਦਾ ਖ਼ਤਰਾ ਵੱਧ ਹੁੰਦਾ ਹੈ। ਇਸ ਲਈ ਆਪਣੇ ਹੱਥਾਂ ਨੂੰ ਨਿਯਮਿਤ ਤੌਰ 'ਤੇ ਧੋਵੋ ਅਤੇ ਭੀੜ ਵਾਲੀਆਂ ਥਾਵਾਂ ਤੋਂ ਬਚੋ। ਸੰਕਰਮਿਤ ਲੋਕਾਂ ਦੇ ਸੰਪਰਕ ਵਿੱਚ ਆਉਣ ਤੋਂ ਬਚੋ।
ਇਨਹੇਲਰ ਅਤੇ ਦਵਾਈਆਂ ਨਾਲ ਸਬੰਧਤ ਸਾਵਧਾਨੀਆਂ: ਆਪਣੇ ਡਾਕਟਰ ਦੁਆਰਾ ਦੱਸੇ ਅਨੁਸਾਰ ਇਨਹੇਲਰ ਅਤੇ ਦਵਾਈਆਂ ਦੀ ਨਿਯਮਤ ਵਰਤੋਂ ਕਰੋ। ਇਸ ਦੇ ਨਾਲ ਹੀ, ਦਮੇ ਦੇ ਰੋਗੀਆਂ ਨੂੰ ਡਾਕਟਰ ਦੁਆਰਾ ਦੱਸੀਆਂ ਐਮਰਜੈਂਸੀ ਦਵਾਈਆਂ ਅਤੇ ਇਨਹੇਲਰ ਹਮੇਸ਼ਾ ਆਪਣੇ ਨਾਲ ਰੱਖਣੇ ਚਾਹੀਦੇ ਹਨ, ਤਾਂ ਜੋ ਅਸਥਮਾ ਅਟੈਕ ਹੋਣ ਦੀ ਸੂਰਤ ਵਿੱਚ ਹਾਲਤ ਵਿਗੜਨ ਤੋਂ ਬਚਾਅ ਕੀਤਾ ਜਾ ਸਕੇ।
ਆਪਣੀ ਖੁਰਾਕ ਦਾ ਧਿਆਨ ਰੱਖੋ: ਆਪਣੀ ਖੁਰਾਕ ਵਿੱਚ ਪੌਸ਼ਟਿਕ ਤੱਤ ਸ਼ਾਮਿਲ ਕਰੋ। ਤਾਜ਼ੇ ਫਲ, ਸਬਜ਼ੀਆਂ ਅਤੇ ਹਰਬਲ ਚਾਹ ਦਾ ਸੇਵਨ ਕਰੋ। ਮਸਾਲੇਦਾਰ ਅਤੇ ਤੇਲਯੁਕਤ ਭੋਜਨ ਤੋਂ ਪਰਹੇਜ਼ ਕਰੋ।
ਕਸਰਤ ਅਤੇ ਯੋਗਾ: ਸਾਹ ਦੇ ਰੋਗੀਆਂ ਲਈ ਨਿਯਮਤ ਕਸਰਤ ਅਤੇ ਯੋਗਾ ਫਾਇਦੇਮੰਦ ਹੈ। ਇਹ ਸਾਹ ਪ੍ਰਣਾਲੀ ਨੂੰ ਮਜ਼ਬੂਤ ਕਰਨ ਵਿੱਚ ਮਦਦ ਕਰਦਾ ਹੈ। ਸਾਹ ਲੈਣ ਦੇ ਅਭਿਆਸ ਜਿਵੇਂ ਕਿ ਪ੍ਰਾਣਾਯਾਮ ਅਤੇ ਅਨੁਲੋਮ-ਵਿਲੋਮ ਵਿਸ਼ੇਸ਼ ਤੌਰ 'ਤੇ ਲਾਭਕਾਰੀ ਹੋ ਸਕਦੇ ਹਨ।
ਸਾਵਧਾਨ ਰਹੋ: ਮੌਸਮ ਦੇ ਬਦਲਾਅ ਵੱਲ ਧਿਆਨ ਦਿਓ ਅਤੇ ਆਪਣੇ ਸਰੀਰ ਦੇ ਸੰਕੇਤਾਂ ਨੂੰ ਸਮਝੋ। ਜੇਕਰ ਕੋਈ ਅਸਾਧਾਰਨ ਲੱਛਣ ਦਿਖਾਈ ਦਿੰਦੇ ਹਨ, ਤਾਂ ਤੁਰੰਤ ਡਾਕਟਰ ਨਾਲ ਸੰਪਰਕ ਕਰੋ।
