ਚੰਡੀਗੜ੍ਹ: ਦੇਸ਼ ਹੀ ਨਹੀਂ ਸਗੋਂ ਦੂਜੇ ਦੇਸ਼ਾਂ ਦੇ ਲੋਕਾਂ ਦੀ ਨਜ਼ਰ ਵੀ ਉੱਤਰ ਪ੍ਰਦੇਸ਼ ਦੀ ਸੰਗਮ ਨਗਰੀ 'ਤੇ ਟਿਕੀ ਹੋਈ ਹੈ। ਲੋਕ ਮਹਾਂਕੁੰਭ ਵਿੱਚ ਆਸਥਾ ਦੀ ਡਬਕੀ ਲਗਾ ਰਹੇ ਹਨ ਅਤੇ ਹਰ ਦਿਨ ਇੱਥੇ ਲੱਖਾਂ ਦੀ ਗਿਣਤੀ ਵਿੱਚ ਲੋਕ ਪਹੁੰਚ ਰਹੇ ਹਨ। ਲੋਕ ਮਹਾਂਕੁੰਭ ਵਿੱਚ ਹਵਾਈ ਮਾਰਗ, ਆਪਣੇ ਵਾਹਨ, ਬੱਸਾਂ ਅਤੇ ਟ੍ਰੇਨਾਂ ਆਦਿ ਦੇ ਜ਼ਰੀਏ ਪਹੁੰਚ ਰਹੇ ਹਨ।
ਇਸਦੇ ਨਾਲ ਹੀ ਗਾਇਕ ਸਿੰਗਾ ਇਸ ਸਮੇਂ ਆਪਣੇ ਮਹਾਂਕੁੰਭ ਦੇ ਮੇਲੇ ਵਿੱਚ ਕੀਤੀ ਸ਼ਿਰਕਤ ਕਾਰਨ ਕਾਫੀ ਚਰਚਾ ਬਟੋਰ ਰਹੇ ਹਨ, ਇਸ ਦੌਰਾਨ ਸਭ ਤੋਂ ਖਿੱਚ ਦਾ ਕੇਂਦਰ ਬਣਿਆ ਗਾਇਕ ਦਾ ਪਹਿਰਾਵਾ। ਜੀ ਹਾਂ...ਹੁਣ ਗਾਇਕ ਨੇ ਇੱਥੋਂ ਇੱਕ ਵੀਡੀਓ ਸਾਂਝੀ ਕੀਤੀ ਹੈ, ਜਿਸ ਵਿੱਚ ਗਾਇਕ ਸਰੀਰ ਨੂੰ ਲੋਈ ਨਾਲ ਲੁਕਾਏ ਹੋਏ ਨਜ਼ਰੀ ਪਏ। ਇਸ ਵੀਡੀਓ ਨੂੰ ਸਾਂਝਾ ਕਰਦੇ ਹੋਏ ਗਾਇਕ ਨੇ ਲਿਖਿਆ, 'ਫੱਕਰ ਮੂਵੀ ਸ਼ੂਟ, ਮਹਾਂ-ਕੁੰਭ ਵਿੱਚ ਸ਼ੁਰੂ।'
ਇਸ ਤੋਂ ਇਲਾਵਾ ਵੀਡੀਓ ਵਿੱਚ ਗਾਇਕ ਨੇ ਕਿਹਾ, 'ਸਤਿ ਸ੍ਰੀ ਅਕਾਲ ਜੀ, ਮੈਂ ਤੁਹਾਨੂੰ ਫੱਕਰ ਮੂਵੀ ਦੀ ਅਪਡੇਟ ਦੱਸਣਾ ਚਾਹੁੰਦਾ ਹਾਂ, ਅਸੀਂ ਸ਼ੂਟ ਸ਼ੁਰੂ ਕਰ ਦਿੱਤਾ ਹੈ, ਲਓ ਜੀ ਫੱਕਰ ਮੂਵੀ ਦਾ ਸ਼ੂਟ ਅਸੀਂ ਕੁੰਭ ਦੇ ਮੇਲੇ ਤੋਂ ਸ਼ੁਰੂ ਕੀਤਾ ਹੈ।' ਇਸ ਤੋਂ ਇਲਾਵਾ ਗਾਇਕ ਨੇ ਕਈ ਤਰ੍ਹਾਂ ਦੀਆਂ ਫੋਟੋਆਂ ਵੀ ਸਾਂਝੀਆਂ ਕੀਤੀਆਂ ਹਨ, ਜਿਸ ਵਿੱਚ ਗਾਇਕ ਬਹੁਤ ਹੀ ਸਨਸਨੀਖੇਜ਼ ਰੂਪ ਵਿੱਚ ਮੇਲੇ ਵਿੱਚ ਘੁੰਮਦੇ ਨਜ਼ਰੀ ਪੈ ਰਹੇ ਹਨ। ਤੁਹਾਨੂੰ ਦੱਸ ਦੇਈਏ ਕਿ ਗਾਇਕ ਸਿੰਗਾ ਤੋਂ ਪਹਿਲਾਂ ਗਾਇਕ ਨਿੰਜਾ, ਲਖਵਿੰਦਰ ਵਡਾਲੀ ਅਤੇ ਗੁਰੂ ਰੰਧਾਵਾ ਵੀ ਕੁੰਭ ਦੇ ਮੇਲੇ ਵਿੱਚ ਹਾਜ਼ਰੀ ਲਵਾ ਚੁੱਕੇ ਹਨ।
ਕਦੋਂ ਹੋਇਆ ਸੀ 'ਫੱਕਰ' ਦਾ ਐਲਾਨ
ਗਾਇਕ ਸਿੰਗਾ ਦੀ ਫਿਲਮ 'ਫੱਕਰ' ਬਾਰੇ ਗੱਲ ਕਰੀਏ ਤਾਂ ਪਿਛਲੇ ਸਾਲ ਗਾਇਕ ਸਿੰਗਾ ਨੇ ਇਸ ਫਿਲਮ ਦਾ ਐਲਾਨ ਕੀਤਾ ਸੀ ਅਤੇ ਕਈ ਪੋਸਟਰ ਵੀ ਸਾਂਝੇ ਕੀਤੇ ਸਨ। ਫਿਲਮ ਪ੍ਰਤੀ ਦਿਲੀ ਭਾਵਨਾ ਸਾਂਝੀ ਕਰਦੇ ਹੋਏ ਗਾਇਕ ਨੇ ਕਿਹਾ ਸੀ, 'ਮੈਂ ਇੱਕ ਕਲਾਕਾਰ ਹਾਂ ਅਤੇ ਇਹ ਮੇਰੀ ਕਲਾ ਹੈ। ਫੱਕਰ ਨਾਲ ਪੰਜਾਬੀ ਇੰਡਸਟਰੀ ਨੂੰ ਅਗਲੇ ਪੱਧਰ 'ਤੇ ਲੈ ਕੇ ਜਾ ਰਿਹਾ ਹਾਂ, ਪਹਿਲੀ ਵਾਰ ਪੰਜਾਬੀ ਸਿਨੇਮਾ ਵਿੱਚ ਪਹਿਲਾਂ ਕਦੇ ਨਾ ਹੋਏ ਐਕਸ਼ਨ ਅਤੇ ਰੁਮਾਂਚ ਦਾ ਗਵਾਹ ਬਣੋ। ਹਮੇਸ਼ਾ ਵਾਂਗ ਮੈਂ ਤੁਹਾਡੇ ਸਾਰਿਆਂ ਲਈ ਕੁਝ ਨਵਾਂ ਅਤੇ ਦਿਲਚਸਪ ਲਿਆਉਣ ਦੀ ਕੋਸ਼ਿਸ਼ ਕਰਦਾ ਹਾਂ। ਤੁਹਾਡਾ ਸਮਰਥਨ ਸਭ ਕੁਝ ਹੈ।"
ਗਾਇਕ ਸਿੰਗਾ ਦਾ ਵਰਕਫਰੰਟ
ਜੇਕਰ ਗਾਇਕ ਸਿੰਗਾ ਦੇ ਵਰਕਫਰੰਟ ਦੀ ਗੱਲ ਕੀਤੀ ਜਾਵੇ ਤਾਂ ਗਾਇਕ ਫਿਲਮਾਂ ਦੀ ਬਜਾਏ ਅੱਜਕੱਲ੍ਹ ਸਟੇਜ ਸ਼ੋਅਜ਼ ਅਤੇ ਗਾਇਕੀ ਫੀਲਡ ਵਿੱਚ ਹੀ ਵੱਧ ਵਿਅਸਤ ਨਜ਼ਰੀ ਆ ਰਹੇ ਹਨ, ਜਿਸ ਦਾ ਪ੍ਰਗਟਾਵਾ ਆਉਂਦੇ ਦਿਨੀਂ ਰਿਲੀਜ਼ ਹੋਣ ਜਾ ਰਹੇ ਕਈ ਸੋਲੋ ਟਰੈਕ ਵੀ ਕਰਵਾਉਣਗੇ। ਹਾਲ ਹੀ ਵਿੱਚ ਗਾਇਕ ਦਾ ਨਵਾਂ ਗੀਤ 'ਇੰਨੀ ਸੋਹਣੀ' ਰਿਲੀਜ਼ ਹੋਇਆ ਹੈ, ਜਿਸ ਨੂੰ ਪ੍ਰਸ਼ੰਸਕ ਕਾਫੀ ਪਸੰਦ ਕਰ ਰਹੇ ਹਨ।
ਇਹ ਵੀ ਪੜ੍ਹੋ:
