ਚੰਡੀਗੜ੍ਹ: ਪੰਜਾਬੀ ਸਿਨੇਮਾ ਦੇ ਗਲੋਬਲੀ ਹੋ ਰਹੇ ਅਧਾਰ ਨੂੰ ਇਸ ਮਾਣਮੱਤੇ ਮੁਕਾਮ ਤੱਕ ਪਹੁੰਚਾਉਣ ਵਿੱਚ ਸਟਾਰ ਗਾਇਕ-ਅਦਾਕਾਰ ਗਿੱਪੀ ਗਰੇਵਾਲ ਦੀ ਭੂਮਿਕਾ ਸ਼ਲਾਘਾਯੋਗ ਰਹੀ ਹੈ, ਜੋ ਬਾਲੀਵੁੱਡ ਦੀ ਪਾਲੀਵੁੱਡ ਵਿੱਚ ਸੁਮੇਲਤਾ ਦਾ ਧੁਰਾ ਬਣ ਬੇਸ਼ੁਮਾਰ ਉੱਚ-ਕੋਟੀ ਐਕਟਰਜ਼ ਅਤੇ ਚਰਚਿਤ ਅਦਾਕਾਰਾਂ ਤੋਂ ਇਲਾਵਾ ਨਾਮਵਰ ਪ੍ਰੋਡੋਕਸ਼ਨ ਹਾਊਸ ਨੂੰ ਵੀ ਇਸ ਵਿਹੜੇ ਲਿਆਉਣ ਵਿੱਚ ਲਗਾਤਾਰ ਅਹਿਮ ਅਤੇ ਮੋਹਰੀ ਯੋਗਦਾਨ ਪਾ ਰਿਹਾ ਹੈ।
ਅੰਤਰਰਾਸ਼ਟਰੀ ਸਿਨੇਮਾ ਮਾਰਕੀਟ ਵਿੱਚ ਹੋਰ ਵਿਸ਼ਾਲਤਾ ਭਰਿਆ ਰੂਪ ਅਖ਼ਤਿਆਰ ਕਰਦੇ ਜਾ ਰਹੇ ਪਾਲੀਵੁੱਡ ਦੀਆਂ ਫਿਲਮਾਂ ਵਿੱਚ ਗਿੱਪੀ ਗਰੇਵਾਲ ਦੁਆਰਾ ਇੰਟਰੋਡਿਊਸ ਕਰਵਾਏ ਗਏ ਚਰਚਿਤ ਚਿਹਰਿਆਂ ਅਤੇ ਵੱਡੇ ਨਾਮਾਂ ਵੱਲ ਆਓ ਕਰਦੇ ਹਾਂ ਵਿਸ਼ੇਸ਼ ਨਜ਼ਰਸਾਨੀ:
ਜ਼ਰੀਨ ਖਾਨ: ਸਾਲ 2014 ਵਿੱਚ ਆਈ ਅਤੇ ਰੋਹਿਤ ਜੁਗਰਾਜ ਵੱਲੋਂ ਨਿਰਦੇਸ਼ਿਤ ਕੀਤੀ ਗਈ 'ਜੱਟ ਜੇਮਜ਼ ਬਾਂਡ' ਨੇ ਗਿੱਪੀ ਗਰੇਵਾਲ ਦੇ ਕਰੀਅਰ ਨੂੰ ਮਜ਼ਬੂਤੀ ਦੇਣ ਵਿੱਚ ਖਾਸੀ ਭੂਮਿਕਾ ਨਿਭਾਈ, ਜਿਸ ਦੁਆਰਾ ਹੀ ਪਾਲੀਵੁੱਡ ਦਾ ਹਿੱਸਾ ਬਣਾਈ ਗਈ ਖੂਬਸੂਰਤ ਹਿੰਦੀ ਸਿਨੇਮਾ ਅਦਾਕਾਰਾ ਜ਼ਰੀਨ ਖਾਨ, ਜਿਸ ਨਾਲ ਗਿੱਪੀ ਗਰੇਵਾਲ ਦੀ ਜੋੜੀ ਨੂੰ ਦਰਸ਼ਕਾਂ ਵੱਲੋਂ ਕਾਫੀ ਪਸੰਦ ਕੀਤਾ ਗਿਆ ਜਿਸ ਉਪਰੰਤ ਇਹ ਦਿਲਕਸ਼ ਅਦਾਕਾਰਾ ਗਿੱਪੀ ਗਰੇਵਾਲ ਦੀ ਇੱਕ ਹੋਰ ਬਹੁ-ਚਰਚਿਤ ਪੰਜਾਬੀ ਫਿਲਮ 'ਡਾਕਾ' ਵਿੱਚ ਵੀ ਨਜ਼ਰ ਆਈ।
ਟੀਨਾ ਆਹੂਜਾ: ਸਾਲ 2015 ਵਿੱਚ ਰਿਲੀਜ਼ ਹੋਈ ਸਮੀਪ ਕੰਗ ਨਿਰਦੇਸ਼ਿਤ ਅਤੇ ਗਿੱਪੀ ਗਰੇਵਾਲ ਸਟਾਰਰ 'ਸੈਕੰਡ ਹੈਂਡ ਹਸਬੈਂਡ' ਦਾ ਪੈਟਰਨ ਚਾਹੇ ਹਿੰਦੀ ਰੱਖਿਆ ਗਿਆ, ਪਰ ਇਸ ਦਾ ਬੈਕਡਰਾਪ ਪੂਰਾ ਦਾ ਪੂਰਾ ਪੰਜਾਬ ਦੁਆਲੇ ਹੀ ਕੇਂਦਰਿਤ ਰਿਹਾ, ਜਿਸ ਦੁਆਰਾ ਧਰਮਿੰਦਰ, ਰਤੀ ਅਗਨੀਹੋਤਰੀ ਜਿਹੇ ਦਿੱਗਜ ਬਾਲੀਵੁੱਡ ਐਕਟਰਜ਼ ਤੋਂ ਇਲਾਵਾ ਮਸ਼ਹੂਰ ਸਟਾਰ ਗੋਵਿੰਦਾ ਦੀ ਪੁੱਤਰੀ ਟੀਨਾ ਆਹੂਜਾ ਨੂੰ ਵੀ ਪੰਜਾਬੀਅਤ ਵੰਨਗੀਆਂ ਨਾਲ ਜੁੜੀ ਇਸ ਫਿਲਮ ਦਾ ਅਹਿਮ ਹਿੱਸਾ ਬਣਾਇਆ ਗਿਆ, ਜਿਸ ਨਾਲ ਪਾਲੀਵੁੱਡ ਦਾ ਬਾਲੀਵੁੱਡ ਖਿੱਤੇ ਵਿੱਚ ਦਬਦਬਾ ਵਧਾਉਣ ਅਤੇ ਇਸ ਸਿਨੇਮਾ ਨੂੰ ਇੱਕ ਹੋਰ ਉੱਚੀ ਪਰਵਾਜ਼ ਦੇਣ ਵਿੱਚ ਵੀ ਕਾਫ਼ੀ ਮਦਦ ਮਿਲੀ।
ਅਕਸ਼ੈ ਕੁਮਾਰ ਅਤੇ ਧਰਮਿੰਦਰ: ਸਾਲ 2013 ਵਿੱਚ ਆਈ ਗਿੱਪੀ ਗਰੇਵਾਲ ਦੀ 'ਭਾਜੀ ਇਨ ਪ੍ਰੋਬਲਮ' ਵੀ ਪੰਜਾਬੀ ਸਿਨੇਮਾ ਲਈ ਇੱਕ ਹੋਰ ਅਹਿਮ ਪ੍ਰਾਪਤੀ ਵਜੋਂ ਸਾਹਮਣੇ ਆਈ, ਜਿਸ ਨੂੰ ਬਾਲੀਵੁੱਡ ਸਟਾਰ ਅਕਸ਼ੈ ਕੁਮਾਰ ਨੇ ਨਾ ਕੇਵਲ ਪ੍ਰੋਡਿਊਸ ਕੀਤਾ ਸਗੋਂ ਇਸ ਵਿੱਚ ਉਚੇਚੀ ਮਹਿਮਾਨ ਭੂਮਿਕਾ ਵੀ ਉਨ੍ਹਾਂ ਗਿੱਪੀ ਸੰਗ ਨਿਭਾਈ। ਸਾਲ 2014 ਵਿੱਚ ਰਿਲੀਜ਼ ਹੋਈ ਗਿੱਪੀ ਗਰੇਵਾਲ ਦੀ 'ਡਬਲ ਦੀ ਟ੍ਰਬਲ' ਵਿੱਚ ਇੱਕ ਵਾਰ ਫਿਰ ਬਾਲੀਵੁੱਡ ਸਟਾਰ ਧਰਮਿੰਦਰ ਨੂੰ ਇੱਕ ਅਹਿਮ ਭੂਮਿਕਾ ਲਈ ਚੁਣਿਆ ਗਿਆ, ਜਿਸ ਲਈ ਅਦਾਕਾਰ ਨੇ ਦੂਸਰੀ ਵਾਰ ਪੰਜਾਬ ਦੀ ਧਰਤੀ ਉਤੇ ਕਿਸੇ ਫਿਲਮ ਦਾ ਹਿੱਸਾ ਬਣਨ ਪੁੱਜੇ।
ਜੈਸਮੀਨ ਬਾਜਵਾ: ਸਾਲ 2022 ਵਿੱਚ ਆਈ ਗਿੱਪੀ ਗਰੇਵਾਲ ਦੀ ਇੱਕ ਹੋਰ ਸ਼ਾਨਦਾਰ ਪੰਜਾਬੀ ਫਿਲਮ 'ਹਨੀਮੂਨ' ਵੀ ਪੰਜਾਬੀ ਸਿਨੇਮਾ ਲਈ ਕਾਫ਼ੀ ਮੁਫਾਦਕਾਰੀ ਸਾਬਿਤ ਹੋਈ, ਜਿਸ ਨਾਲ ਜਿੱਥੇ ਬਾਲੀਵੁੱਡ ਦੇ ਵੱਡੇ ਫਿਲਮ ਨਿਰਮਾਣ ਹਾਊਸਜ਼ 'ਟੀ ਸੀਰੀਜ਼ ਅਤੇ ਬਵੈਜਾ ਸਟੂਡਿਓਜ਼' ਨੇ ਪੰਜਾਬੀ ਸਿਨੇਮਾ ਖੇਤਰ ਵਿੱਚ ਕਦਮ ਧਰਾਈ ਕੀਤੀ, ਉੱਥੇ ਜੈਸਮੀਨ ਭਸੀਨ ਜਿਹੀ ਚਰਚਿਤ ਟੀਵੀ ਅਦਾਕਾਰਾਂ ਨੇ ਵੀ ਪਾਲੀਵੁੱਡ ਵਿੱਚ ਪ੍ਰਭਾਵੀ ਦਸਤਕ ਦਿੱਤੀ, ਜੋ ਗਿੱਪੀ ਗਰੇਵਾਲ ਦੀ 'ਵਾਰਨਿੰਗ 2' ਅਤੇ ਕਈ ਹੋਰ ਫਿਲਮਾਂ ਅਤੇ ਮਿਊਜ਼ਿਕ ਵੀਡੀਓ ਵਿੱਚ ਵੀ ਲਗਾਤਾਰ ਨਜ਼ਰ ਆ ਰਹੀ ਹੈ ਅਤੇ ਅੱਜਕੱਲ੍ਹ ਮੁੰਬਈ ਦੀ ਬਜਾਏ ਪੰਜਾਬ ਹੀ ਜਿਆਦਾ ਕੰਮ ਕਰ ਰਹੀ ਹੈ।
ਨੇਹਾ ਸ਼ਰਮਾ: ਇਸੇ ਸਿਲਸਿਲੇ ਅਧੀਨ ਹੀ ਨਿਰਦੇਸ਼ਕ ਰਾਕੇਸ਼ ਮਹਿਤਾ ਵੱਲੋਂ ਨਿਰਦੇਸ਼ਿਤ ਕੀਤੀ ਗਈ ਅਤੇ ਸਾਲ 2022 ਵਿੱਚ ਰਿਲੀਜ਼ ਹੋਈ ਗਿੱਪੀ ਗਰੇਵਾਲ ਸਟਾਰਰ 'ਇੱਕ ਸੰਧੂ ਹੁੰਦਾ ਸੀ' ਨਾਲ ਇੱਕ ਹੋਰ ਬਾਲੀਵੁੱਡ ਅਦਾਕਾਰਾ ਪੰਜਾਬੀ ਸਿਨੇਮਾ ਦੀਆਂ ਬਰੂਹਾਂ ਵਿੱਚ ਆ ਢੁੱਕੀ, ਉਹ ਸੀ ਨੇਹਾ ਸ਼ਰਮਾ, ਜੋ ਹਿੰਦੀ ਸਿਨੇਮਾ ਦੀਆਂ ਕਈ ਵੱਡੀਆਂ ਫਿਲਮਾਂ ਵਿੱਚ ਲੀਡਿੰਗ ਭੂਮਿਕਾਵਾਂ ਅਦਾ ਕਰ ਚੁੱਕੀ ਹੈ।
ਹਿਨਾ ਖਾਨ: ਇਸੇ ਵਰ੍ਹੇ ਰਿਲੀਜ਼ ਹੋਈ ਗਿੱਪੀ ਗਰੇਵਾਲ ਦੀ ਇੱਕ ਹੋਰ ਕਾਮਯਾਬ ਫਿਲਮ 'ਸ਼ਿੰਦਾ ਸ਼ਿੰਦਾ ਨੋ ਪਾਪਾ' ਨਾਲ ਇੱਕ ਹੋਰ ਬਾਲੀਵੁੱਡ ਅਦਾਕਾਰਾ ਹਿਨਾ ਖਾਨ ਨੂੰ ਪੰਜਾਬੀ ਸਿਨੇਮਾ ਦਾ ਹਿੱਸਾ ਬਣਾਇਆ ਗਿਆ ਹੈ, ਜਿਸ ਨਾਲ ਇੱਕ ਦਰਜਨ ਤੋਂ ਵੀ ਵੱਧ ਬਾਲੀਵੁੱਡ ਚਿਹਰਿਆਂ ਨੂੰ ਇੱਧਰਲੀ ਇੰਡਸਟਰੀ ਲਿਆਉਣ ਦਾ ਸਿਹਰਾ ਗਿੱਪੀ ਗਰੇਵਾਲ ਦਾ ਮਾਣ ਅਪਣੀ ਝੋਲੀ ਪਾ ਲਿਆ ਹੈ। ਇਸ ਤੋਂ ਇਲਾਵਾ ਹਾਲ ਹੀ ਵਿੱਚ ਗਿੱਪੀ ਨੇ ਤੇਜਸਵੀ ਪ੍ਰਕਾਸ਼ ਨਾਲ ਇੱਕ ਗੀਤ ਵੀ ਰਿਲੀਜ਼ ਕੀਤਾ, ਜਿਸ ਨੂੰ ਲੋਕ ਕਾਫੀ ਪਸੰਦ ਕਰ ਰਹੇ ਹਨ।
